那些年，我等待的那個男孩子: 49

不知不覺，暑假差唔多完啦，今日上埋最後一堂英文暑期班，我就唔補習啦。Joanne同Ivana嘅計劃失敗左，識唔到男朋友，唯獨係我同Jonathan好close
 
「Jessie呀，過埋今堂就補哂啦喎」Ivana好似好心咁提醒我咁樣
 
「唔?有問題?」我仲係一舊雲咁樣
 
「可能今日Jonathan會表白呢」
 
「表白呀…我都未準備好…」
 




其實我唔係未準備好，我知道我自己個心仍然係佢到，所以我接受左Jonathan嘅話，真係會對佢好唔公平，因為如果突然間佢出現係我身邊嘅話，又會點呢
 
果然Jonathan送我返去果時……佢對我表白了，佢送到我屋企附近海邊
 
「Jessie，其實…我有少少野…想同妳講」
 
微微嘅海風吹過我地身邊，我個心跳得好快好快，我低住頭等佢同我講
 
「嗯…有…咩事?」我專登唔望佢雙眼，我怕我會俾佢吸引左，令我應承佢，所以我決定點都唔可以望佢
 




「Jessie…妳覺得我點呀?」佢都係怕怕羞羞咁同我講，又好緊張
 
我望住海中嘅浪同佢講
 
「你…幾好呀…冇咩架子，又好照顧朋友」
 
「我係指……做男朋友方面，我合唔合格呀?」
 
「男…男朋友?」
 




「係呀…」
 
「咁…你應該去問Joanne….佢咁多男仔追過」
 
「其實Jessie……我…鍾意妳呀…」
 
「你…講真?」腦中出現左天使同魔鬼
 
天使：唔可以應承佢呀!!林雪凝!!!妳就快會考啦!!!仲有阿風呢?妳唔係話想嫁俾佢咩?
 
魔鬼：試下拍拖啦，有人錫好開心架
 
「Jessie，妳可唔可以俾次機會我……做我女朋友?我地一定會好開心架，我唔會因為妳而唔讀書架」
 
天使同魔鬼係我心中角力，我真係唔知道要點揀。多年黎睇得愛情小說多，自然對拍拖有憧憬，如今有個男仔對我表白，俾著係其他女仔，好快就應承左佢架啦，係我心中仲係唔知點好之時，佢捉起左我隻手




 
「可以俾次機會我嘛」終於我忍唔住望左佢對眼，我個心跳得好快，就快俾佢吸走啦!!
係我準備開口講左「好」之際，有一部車經過並停係我地附近，車上播住我最鍾意聽嘅歌「天空之城」，再一次諗起點解我會扎雙麻花辮，我小學成日諗，如果可以同佢好似Pasu同Sheeta咁去故鄉兩個人靜靜咁生活幾好
 
Pasu夢想係飛行尋夢，而佢係小學一篇作文「我的志願」之中，佢話想自由自在係天空中飛翔，希望可以駕駛飛機，載乘客到唔同地方，佢志願係想做一個飛機師。
 
而我就為左支持佢，所以就決定成個小學生涯都扎起同Sheeta一樣嘅辮去支持佢
 
我諗左陣……一個係我初戀情人，其實都唔知算唔算。另一個就企係我面前，係一個好好嘅男仔……但係…我清楚知道我心入邊最鍾意果個係佢…所以…