那些年，我等待的那個男孩子: 47

「丫，估唔到小恐怖雞個男朋友咁大個，應該同我地同Form」
 
「佢真係夠膽喎，但係果個應該係好男仔黎，如果唔係恐怖雞一定唔會俾佢同小雞來往」
 
「唔…都係嘅」
 
「做咩呀Jessie?妳羨慕小雞呀?」
 
「係囉，唔洗羨慕丫，妳有Jonathan呀」
 




「邊…邊係呀…咪講笑啦」
 
「但係妳同佢發展得好快喎，真係一D意思都冇?」
 
「其實有少少嘅…不過…」
 
「不過妳仲係鍾意果個男仔?」
 
「嗯…佢話過，10年之後我同佢仲有聯絡對方，仲係朋友嘅話…佢會…」
 




「唔好同我講佢話會娶妳呀」
 
「嗯…」
 
「就係咁樣所以妳就等佢呀?Jessie呀!!!女仔青春係有限架」
 
「咁如果…佢仲係不停咁搵我呢?」
 
「妳點知佢一定搵緊妳?」
 




「我d小學同學話…佢一直都搵緊我，但係佢地唔想俾佢知我係邊…所以…」
 
「妳D小學同學真係好保護妳，但係妳對Jonathan都有d意思，真係唔打算發展下?」
 
「又唔係嘅……其實我自己都唔知…」
 
其實我係諗過，當晚Jonathan同我表白嘅話，我係會應承佢嘅，但係，又俾我好似遇上心中嘅佢，真係好煩呀…
 
我自己一個係床到望住佢同我嘅合照，我竟然仲會鍾意佢…再諗一諗，佢同Jasmine應該一定有關係。當年係校門果個小妹妹同Jasmine一樣，叫張詩敏，再計返數，Jasmine係6-7年前應該係得果5歲左右…而當日佢同佢家姐一齊上左果部車，果位司機係…咁即係…我冇估錯嘅話，Jasmine阿哥就係佢…因為當日係學校接走Jasmine果個，係怡姐姐。
我終於load到啦，Jasmine係佢同怡姐姐嘅契妹，即係…佢係Miss孔個契仔?
而根據雪晴所講，青梅竹馬嘅契妹，最後都係會鍾意自己個契哥，所以Jasmine咁講，要同我爭一樣野嘅意思係…佢會同我爭程逸風?即係阿風一早就知我係英華女校?
佢會唔會黎搵我?因為Jasmine嘅關係，我會同佢相遇?
係又點?佢都唔知係唔係仲鍾意我…Jasmine係同Joanne齊名嘅校花，佢笑果陣又好甜，身材又一定唔會差，點睇都好，阿風係會揀佢多…
咁Jonathan又點呢……我個心唔係冇佢，但係阿風已經隱約係我身邊出現左…接受佢，如果阿風出現左，我又要點做?唉……