那些年，我等待的那個男孩子: 7

轉眼間，我地就快小學畢業，我地學校安排左個宿營俾我地畢業班
 
係個camp內，好多男仔對心儀嘅女同學表白，因為大家相處機會唔多。而我都有俾人表白過，我亦都拒絕哂佢地，始終…我由三年級果陣，就鍾意左果個男仔
 
我同佢最親密果張相，正正係畢業營中影嘅，我係鞦韆上坐低，而佢就係我身後，雙手按住我膊頭，我同佢面貼面咁影左張相，渣機嘅係我地班主任楊sir，佢影相好叻，捕捉畫面係非常之好。
 
畢業營最後一晚，佢自己坐係到睇星
 
「你自己一個唔悶?」
 




「微波爐?妳自己一個人?」
 
「唔…見你瞓唔著，睇下你咩事」
 
「呢兩年…無論我點蝦妳…妳都咁關心我」
 
「始終…大家都係同學…」
 
「多謝妳」
 




「做咩係到睇星星?你鍾意觀星?」
 
「爸爸…以前經常陪我睇星星，經常帶我去機場睇飛機，每次係九龍城見到飛機飛過，我都會好開心」
 
「你仲好掛住叔叔?」
 
「點會唔掛住，我睇下，爸爸變為邊粒星，係天上守護住我地一家人」
 
「不如…我陪你睇?」
 




「妳唔怕…我地有緋聞?」
 
「我地兩個點會有緋聞?我地大纜都扯唔埋」
 
果晚我係佢膊頭上一齊睇星，當我打開眼時，我係女仔房入邊
 
「嘩!雪凝!!尋晚係程逸風孭妳返黎喎」
 
「妳同佢拍拖呀?」
 
原來…我去到兩點果時瞓左，阿風就孭我返房