那些年，我等待的那個男孩子: 林雪凝日記(2)

17-2-199X
死人程逸風!!!我都唔知鍾意佢D咩呀!!!無啦啦同D男仔一齊幫我改花名，叫我做微波爐!!!喂呀!!!小學4年級邊到會有女仔係大胸架!!!正一衰人黎架!!!
 
佢又成日掹我條辮，痛架!!!!
 
今日派小測嘅測驗成績，我又考第一啦，ba b又有獎勵俾我，今日我要ba b買左本小說俾我睇，佢見到我睇小說果時都嚇親，點解個女會睇呢d科幻小說?其實我好鍾意科學架，可能世上真係有原醫生呢d咁有冒險經歷嘅人呢。
 
Ba b今日佢都買左本英文小說睇呀，佢話係醫院有時好攰，又瞓唔著，就會睇下小說減壓，不過佢又點會瞓唔著呢，醫生係世上最鍾意瞓覺嘅生物呢黎架，做醫生真係好辛苦，所以我將來我都係唔好做醫生啦。不過ba b好似想自己開診所，抽多d時間陪屋企啦。
 
19-2-199X




死啦!!!我今日同幾個女仔貪玩，向程逸風反擊，我地捉實佢，再用羽毛球拍去拍佢。點知我唔小心整爛左佢隻錶呀!!!!佢每日都拎住隻錶係到較時間架。我整爛左佢隻錶之後，佢返左埋位好唔開心咁，佢會唔會嬲左我架?死啦……點算好呀?俾自己鍾意嘅男仔討厭呀……
 
20-3-199X
自從上次我整當左佢隻錶之後，佢就冇黎掹我條辮啦，其實我有D唔慣。以前每日都同佢打打鬧鬧好開心架，但係呢個月佢都靜靜地自己一個人，又唔理我，但係冇理由要我自己去同佢傾計架嘛。
 
所以我就嘗試叫Ada去同佢傾計啦，其實Ada鍾意阿風，我係知道架，阿風好似唔想同Ada講野咁，睇黎佢真係好嬲啦
 
22-3-199X
今日阿風又係自己一個坐埋一邊，佢好似好攰好攰咁樣，我真係想知佢咩事
 




係上緊數學堂果陣，校長好快帶左阿風上的士，落堂果時有兩個中學大姐姐黎幫阿風執好書包，然後就同我地班主任一齊搭的士走左
 
果兩個大姐姐雙眼紅哂，應該係喊過黎。唔通係怡姐姐有事?
 
但係我又冇阿風屋企電話…就算有又點呢…佢嬲左我
 
15-4-199X
今日我放學之後，拎全班功課去教員室。呢個係班長嘅責任黎架
 
去到教員室我又見到兩個聖嘉勒大姐姐，今次仲有個氣場好強勁嘅姨姨係到，佢以為我偷聽佢地講野呀….佢望住我果時，我真係全身都震哂，原來佢係英華女學校嘅訓導主任，死啦…我第一志願就係英華女校……




 
今日我先知道，阿風爸爸過左身，就係上次校長帶佢走果一日。
 
19-4-199X
阿風最近經常缺席，今日佢終於返學啦，小息果時佢坐埋一邊。於是我鼓起勇氣坐埋佢身邊陪佢，呢個時候嘅佢，係最需要朋友陪佢，更何況…我自己鍾意佢呢
 
今日我偷偷地捉實佢隻手，同佢講我會陪住佢。佢果一下對住我微笑啦，佢唔係強行微笑，係用心笑出黎。
 
佢竟然應承我，如果10年之後，我同佢仲係朋友，仲記得對方嘅話，就會娶我同我結婚，我聽到之後好開心啦。
 
林雪凝妳傻左咩!!!!!4年級就想嫁人!!!!!