那些年，我等待的那個男孩子: 2

「各位同學，而家大家可以試下搓麵粉啦」當老師講完呢句說話之後，大家都好開心咁搓麵粉，我打算整個麵包返屋企俾ba b同媽媽食，仲有我K2嘅妹妹。 Ba b返工好攰架，其他人見到醫生係渣車住大屋，個個都以為醫生係好舒服嘅工，但我就知道ba b其實係好辛苦，on call 36小時之後，佢返屋企仲要進修讀書，一黎佢想換間大少少嘅屋俾我地，二黎聽媽媽講，ba b想出黎自己掛牌做私家醫生，抽多d時間陪下我地。所以我都做個乖乖女，盡量唔去打搞ba b同媽媽。
 
「唏!!唏!!」我自己不停係到搓麵粉，搓得非常起勁，而佢，就係我隔離睇住我整麵包
 
「你唔試下整嘅?」
 
「我?我成日俾家姐捉去幫佢手整麵包，我整慣哂」
 
「你家姐?佢整俾你食?」
 




「傻啦，佢F.2架啦，不過佢家政有時要整麵包，會捉埋我幫手囉」
 
「哦…咁你可唔可以幫我手一齊整麵包?我想整俾屋企人食」
 
佢望左我一陣「好啦，見係妳咋，就幫下妳啦」
 
我聽到呢句說話時有D開心，所以我就用手肘撞左佢一下「唔該哂你喎」
 
忽然，佢伸隻手黎摸一摸我塊面，我個心突然跳得好快好快，當佢隻手掂到我塊面果時，個心痛左一下
 




「妳呀，小心D啦，D麵粉彈到成面都係啦，唔靚女啦，林雪凝」
 
原來…佢知我叫咩名…
 
「你…點知我個名架?」
 
「同妳一組點會唔知妳叫咩名呢，妳係3C班林雪凝，每次測驗考試都拎第一」佢係我面前微笑咁講，其時我心跳愈來愈快
 
點解…佢會咁清楚我嘅事?佢同我一齊搓麵粉，有時我地雙手仲會掂埋一齊，我望住佢認真做野個樣，忽然知道左一件事
 




我第一次鍾意左人，第一次鍾意男仔，我鍾意左呢個隔離班嘅同學，佢叫Leon，程逸風。