那些年，我等待的那個男孩子: 1

每一個人，都會有初戀。
 
學生時代嘅初戀，永遠係最甜，大家眼中只有對方，傻到為對方做任何事。但往往初戀都係傷得最痛，流淚最多。
 
我比較特別嘅，我嘅初戀情人一早出現左，其實都唔知係咪初戀，可能只係我對佢嘅暗戀
 
但係我可以為佢呢個男仔，放棄好多野，為左一個初吻，而暗戀佢好多年，就算見唔到佢，我仍然係鍾意住佢……
 
 
「哈哈哈哈!!!!微波爐呀!!!!!」


 
「你…你咪再搞我條辮呀!!!」
 
「妳扎條孖辮唔係預左俾人咁玩架咩!!!行呀!!!」
 
呢個男仔每一日都要整鬼我，掹下我對孖辮先安樂，不過我又好鍾意同佢玩。佢份人好有正義感，雖然成績差左少少…都唔係少少…活躍左D…其實唔止一DD…但係只要佢身邊朋友需要佢幫手時，佢永遠都唔會拒絕人地。另一方面，佢又非常細心。
 
第一次見佢，係小學三年級。佢係隔離班嘅同學，有一次佢個水樽碌左過我到，我幫佢執返，佢好似呆左咁望住我，我亦對佢微笑。自從果日開始，佢就經常排我隔離，我同佢之間，有兩米距離…
 
我同佢相識於三年級嘅課外活動，佢係唯一一個去學整麵包同蛋糕嘅男同學，其他男同學都揀踢波、打籃球之類。對佢產生好奇心嘅我，就決定走去同佢一組。