［愛情純愛］由嗰一個Kiss開始，我地唔再係青梅竹馬: 147. 友情決裂

「玥、玥嘉，我⋯」楊楠恩突然間一時語塞，一個字都講唔出口，佢輕輕地握着拳，心虛地撇開臉，唔敢望住梁玥嘉

「係你做㗎⋯？係你淋我⋯？點解呀？」梁玥嘉不解地問道

楊楠恩無法解釋，因為事實係真係佢將嗰一桶凍水淋到廁格中；所有人都唔理解，目瞪口呆地望住楊楠恩

「我之前仲因為懷疑過你而覺得自己好衰，但原來真係你做⋯！」梁玥嘉感覺到自己被背叛，佢冇諗過真係楊楠恩做

「難怪嗰日你突然間話要落去拎嘢啦！」李穎容企起身，企到梁玥嘉同楊楠恩中間，「要落去拎嘢根本就係假嘅！要趁呢個空檔去廁所先係真嘅！」





「點解你要咁做呀？」霍思傑輕皺着眉頭開口問道，「差唔多考試你先搞啲咁嘅嘢⋯」

「你因為咩呀？成績呀？」張子萊問道，「你同梁玥嘉成績都差唔多呀，你點解要咁呀？」

所有人都企喺梁玥嘉嗰邊，楊楠恩好慌張，覺得大家都喺心中鬧緊佢，當秘密一下子被戳破咗後⋯一切都會消失，友情連同其他嘅一切都會消失⋯

「我地唔係朋友咩？你點解要咁做呀楠恩？」梁玥嘉企到去李穎容嘅身旁問道，眼眶通紅，「我地唔係朋友咩⋯？」

「玥嘉，我⋯」楊楠恩眼眶泛起淚光，佢知道佢點解釋都冇用





楊楠恩一直支支吾吾，再加上佢嘅反應，完全代表佢已經默認咗成件事係佢做，十目所視，佢又可以點解釋？

梁玥嘉偶然抬眼望向宋千辰，再望向楊楠恩，佢嘅心似乎變得更混亂

「係唔係因為你中意千辰⋯」梁玥嘉定睛地望住楊楠恩，「因為你中意千辰，而我又成日同千辰一齊，你妒忌係唔係？」

楊楠恩望向宋千辰，宋千辰嘅表情冇因為梁玥嘉講嘅嘢而變得愕然，反而眉頭深鎖着

「玥嘉對唔住⋯！」楊楠恩向梁玥嘉道歉，捉住梁玥嘉嘅手腕，「我都後悔㗎，對唔住⋯！」





「所以，你真係因為中意千辰，因為妒忌，所以用我嚟出氣⋯？」梁玥嘉抽一抽鼻子後問道，淚水已經喺眼眶打轉，「你一開始同我做朋友，都係因為咁⋯？」

楊楠恩喊着搖頭，捉住梁玥嘉嘅手唔放，抽一抽鼻子，望住梁玥嘉；梁玥嘉一副「心已死」嘅表情，望住楊楠恩嘅雙眼都變得空洞起嚟

「我認我當初同你地做朋友，真係因為我中意宋千辰，我認⋯」楊楠恩微微點頭，「但同你地一齊嗰陣我真係覺得好開心，好中意同你地一齊，呢一點都係真⋯！」

梁玥嘉撇開臉，抹去眼淚，宋千辰行到梁玥嘉嘅身旁，遞咗張紙巾比佢

「楠恩你好過份⋯！」李穎容忍唔住出聲，「你利用我同玥嘉都算，你點解要咁做呀？我同玥嘉都係真心當你係朋友，你就算係妒忌都唔好做埋啲咁嘅嘢啦！你個良心唔痛㗎咩！？」

「我、我都好後悔⋯！對唔住呀玥嘉⋯！係我錯！對唔住呀⋯！」楊楠恩用手抹眼淚

楊楠恩抬頭一望，見到梁玥嘉面無表情，李穎容、張子萊佢地個個都皺起眉頭，擺出厭惡嘅表情，佢嘅心不禁一顫，眼淚不斷湧出

「對唔住，玥嘉，對、對唔住呀⋯！」楊楠恩腿一軟跪低喺地上，「我一開始係真係利用你，但後來我係真心中意同你做朋友⋯！」





「真心同玥嘉做朋友？你會用凍水惡意淋你嘅朋友？」李穎容聽完都覺得好笑，直接質問楊楠恩，「我當你係朋友，玥嘉都當你係朋友，我地冇話過唔同你做朋友喎，但你咁一桶凍水淋落去⋯朋友係咁㗎咩？」

「Miss Tam可以輕鬆下，我地幫Miss Tam搵到『兇手』啦。」霍思傑喺一旁講道，人地雪中送炭，霍思傑再送多一大堆雪過嚟

楊楠恩聽到霍思傑咁講，心中一顫

「唔好呀⋯！我成績表上面有缺點嘅話，我媽一定鬧死我！」楊楠思慌張地喊起嚟，比起啱啱喊得更厲害，「唔好呀⋯！求下你⋯！」

「你做之前唔諗下後果？」張子萊無奈地問道，「諗咗後果先做，咪唔洗好似宜家咁囉～」

「玥、玥嘉⋯！你原諒我啦！對唔住呀！」楊楠恩苦苦哀求道，「我、我知道係、係我唔好，對唔住呀！」

「你就係因為覺得玥嘉好恰，所以先會咁！」李穎容講道，「你叫玥嘉點原諒你？」





「我知錯啦⋯！」楊楠恩喊住咁講道，臉頰上全都係淚水，「玥嘉，對唔住呀⋯！」

梁玥嘉企喺李穎容身後一直都冇出聲，抹去臉上嘅淚水，佢冇諗過佢打從心底當係朋友嘅人會咁對佢，梁玥嘉因為楊楠恩所做嘅嘢而寒心

「Party room book到幾點⋯？」梁玥嘉緩緩開口問道

「10點半。」張子萊講道

「嗯，都差唔多啦。」梁玥嘉點點頭，「都25分啦，走啦⋯」

其他人望一望楊楠恩，然後都行到梳化前拎起袋

「楠恩，起身啦⋯」梁玥嘉孭住袋行到楊楠恩面前，微微彎下腰捉起楊楠恩嘅手，想將楊楠恩拉起身








IG Link: https://www.instagram.com/nd_cotttoncandy/?hl=zh-tw