［愛情純愛］由嗰一個Kiss開始，我地唔再係青梅竹馬: 146. 是你嗎⋯？

「你咁講又好似真係。」霍思傑點點頭，「可能真係因為捉唔到嗰個人。」

「嗰個人咁過份，比Miss Tam捉到嘅話，佢記硬缺點。」張子萊拎起放喺自己面前嘅嘢飲

梁玥嘉望向宋千辰，佢記起宋千辰上次講過話佢嘅推論

「千辰，你上次咪推論過事件經過嘅～」梁玥嘉望住宋千辰講道

楊楠恩頓時瞳孔地震起嚟，本來平穩嘅呼吸都變得更快，手顫抖得更嚴重





「你有頭緒唔同我地講？」張子萊同手肘撞一推撞宋千辰，「講嚟聽下嘛！大家一齊諗嘛！」

「咪係囉！」李穎容和應道，「快啲講啦！要還玥嘉一個公道先係！」

「快啲講啦！」霍思傑都催促道

「嗰次，咪得嘉嘉一個人去廁所嘅，但我地喺課室等嘅途中，如果有人經過我地課室去廁所嘅話，我地一定會睇到。」宋千辰喺群聚壓力下緩緩開口，「但係嗰陣根本就冇人經過我地課室，後來我再問嘉嘉，佢話隔離班得番幾個人，個個都係孭好書包準備走嘅狀態。」

「嗰日我地班仲要遲咗落堂，我經過隔離班嘅時候，嗰啲人已經孭晒書包，行緊去課室門口啦！」梁玥嘉補充道，「我去到toilet嘅時候，toilet係真係得我一個。」





「你唔係話你去到toilet嘅時候，嗰桶水已經喺度咩？」李穎容問道

「咁即係嗰個人一早就知道有桶水喺度！」霍思傑好似搶答一樣講道，「仲知道廁所得梁玥嘉一個。」

「但唔可以排除嗰個人係隔離班嘅人㗎喎！就算佢地係孭咗書包打算走都好⋯」張子萊托住下巴疑惑地講道，「嗰個人如果係有心作案，佢大可以番轉頭去廁所。」

「但嗰日我地要清locker，大家嘅書包唔輕㗎喎！」李穎容斷時將張子萊嘅想法打破，「你會唔會孭住個咁重嘅書包跑去廁所，然後跑番出嚟，一啲其他碰撞嘅聲音都冇？你識飛㗎？」

「梁玥嘉唔係話佢一開門已經見唔到嗰個人啦咩？」霍思傑無奈地望一望張子萊，「嗰個人一淋完水，即刻就掉低個桶，然後跑去門口走，孭住個咁重嘅書包仲可以跑得咁快，睇卡通片咩～」





楊楠恩聽到大家嘅推論，心中就更慌，佢想開口講啲咩令大家停止呢個話題，但係佢又怕自己講咗啲咩唔應該講嘅嘢

「我地課室喺正中間，前面嘅班要去廁所一定要經過我地班，我地一定會睇到，唔係前面嗰班，就一定係後面啦！」李穎容講道，「唉⋯我地一層就得四班，唔係前面就係後面㗎啦⋯！」

「千辰，上次你同我講嗰個方法，咪可以做到囉⋯！」梁玥嘉靈機一動，諗起上次宋千辰講嘅可能性，「無論係前面嘅班定後面嘅班都好，都唔洗經過我地課室去到廁所。」

「原來你諗到啦已經⋯！」李穎容一臉驚訝地講道，「你知係點啦？」

「如果嗰個人係先從前梯落一層，然後再從後梯上嚟，去完廁所淋完水之後，去番後梯，咁就唔洗經過我地課室。」宋千辰講道

「又啱喎，如果有人經過我地班房去完廁所，梁玥嘉尖叫之後我地都即刻望出去啦～咁嗰個人如果係原路番嚟，咁咪會比我地睇到，知道係佢做囉！」張子萊聽完宋千辰嘅推論後覺得佢講嘅方法的確可行，「但如果佢行去廁所嗰邊，轉個頭喺前梯上嚟，咪重奇怪？」

「咁樣嘅話，個個都有可能啫⋯」霍思傑無奈地講道，「諗完咁多之後一切都歸零咁⋯」

「冇歸零呀，既然個個都有嫌疑，咁離開過課室嘅人嘅嫌疑唔係最大咩？」宋千辰平靜地講道，目光投向楊楠恩，「我地呢度都有人離開過課室呀。」





楊楠恩訝異地抬起頭望向宋千辰，宋千辰面無表情地望住楊楠恩，似乎佢唔打算留半點情面，楊楠恩嘅心嚇得要跳出嚟似的，眾人嘅目光頓時都聚集喺楊楠恩身上

「你唔好亂講啦～點會係楠恩呀？」梁玥嘉笑咗一笑，望向楊楠恩

楊楠恩望住宋千辰，連呼吸都唔敢咁大聲，成個人都微微顫抖着；所有人都望住楊楠恩，楊楠恩都唔知點算好，佢唔知可以講咩自辯，因為佢真係咁樣做咗

「楊楠恩點解要咁做？」霍思傑不解地望一望楊楠恩後，望向宋千辰問道，「你點解覺得係佢？」

「嗰日我地咁啱撞到，我最後叫你唔好對嘉嘉亂嚟，但你直接就將我講嘅說話嘅意思理解成我叫你唔好害嘉嘉。」宋千辰銳利嘅目光落喺楊楠恩身上，「你一嚟就答我同嘉嘉係朋友，又點會害佢，唔係你心有鬼身有屎，你點會咁答？」

「我、我只不過係下意識⋯」楊楠恩比宋千辰咁大一大，講嘢嗰陣連口都窒埋，「所、所以⋯！」

「我地每次一講起呢件事，你就唔會再出聲，怕講錯嘢比我地捉到呀？」宋千辰毫不留情地問道





「楠恩，你唔係嘅話唔洗驚，我地會信⋯」梁玥嘉伸手捉住楊楠恩嘅手，但當感覺到楊楠恩嘅手正顫抖着，「你隻手做咩震得咁勁⋯？」

楊楠恩下意識反應，頓時企起身，心虛地耷低頭，其他人見到佢嘅反應，一頭霧水地望住楊楠恩；梁玥嘉企起身，望住楊楠恩

「楠恩⋯係你做㗎⋯？」梁玥嘉嘅聲音都微微顫抖着，「係你用凍水淋我㗎⋯？」




IG Link: https://www.instagram.com/nd_cotttoncandy/?hl=zh-tw