［愛情純愛］由嗰一個Kiss開始，我地唔再係青梅竹馬: 148. 自作自受

「玥嘉⋯」楊楠恩哽咽着抬頭望住梁玥嘉，緩緩地企起身

「我真係冇諗到你會咁對我⋯」梁玥嘉淡淡地講咗一句，然後直接朝門口走去，「走啦⋯」

其他人望咗楊楠恩一眼之後紛紛跟喺梁玥嘉身後離開，楊楠恩自己一個人行到出去，見到佢地都唔敢企埋佢地嘅身邊

內疚、後悔、自責，所有負面情緒湧上心頭，楊楠恩唔敢為自己搵借口，亦唔敢同梁玥嘉狡辯，事實擺在眼前，發生咗就係發生咗，結果要由佢自己承受，亦必須如此⋯！

⋯





「玥嘉，好好休息下啦！」喺分別時李穎容對梁玥嘉講道，「有事搵我呀！」

「嗯！」梁玥嘉點點頭

喺落車前，梁玥嘉望咗坐喺另一邊嘅楊楠恩一眼，咩都冇講就落咁車

梁玥嘉嘅心都好混亂，佢估唔到佢嘅懷疑真係會成真，原來楊楠恩係利用佢，係淋佢水嗰個；喺梁玥嘉嘅心中，最介意嘅唔係楊楠恩中意宋千辰，而係楊楠恩係淋佢水嗰個

宋千辰見到梁玥嘉喊到兩隻眼都腫腫的，心裏都唔好受，但佢知道自己宜家講啲咩都冇用，佢要做嘅，就只係喺梁玥嘉需要佢嘅時候喺度





本來梁玥嘉打算今晚比回覆宋千辰，但突然間發生咗件咁嘅事，梁玥嘉都已經冇心情比答覆，心情沉甸甸的

「番去啦，唔好諗咁多啦。」宋千辰對梁玥嘉講道，「有咩搵我，我地都喺度。」

「嗯⋯」梁玥嘉無力地點點頭，聽到佢嘅聲線都感覺到佢已經好攰

梁玥嘉推門入屋，番到屋企即刻就去沖涼，但熱水似乎無法令佢清醒，滿腦子都係啱啱發生嘅事

平日一齊講笑、一齊喺IG睇靚仔、一齊講秘密，呢啲事突然間都變成曇花一樣一瞬即逝，所有呢啲回憶都好似係假嘅一樣，只不過係一個假象





梁玥嘉努力地令自己唔好去諗呢件事，因為一諗起呢件事壓住佢嘅胸口，令佢覺得好辛苦；梁玥嘉不禁諗起楊楠恩同佢地一齊挽時嘅笑容係幾咁真摯，但原來佢只係利用緊佢⋯

「唉⋯」梁玥嘉不禁沉重地嘆一口氣

沖完涼番到房後嘅梁玥嘉直接灘咗喺床上放空，咩都唔想諗、咩都唔想知，今日嘅疲倦已經令佢直接投降，連手機都唔想睇

宋千辰坐喺書枱前拎住手機，望住喺IG顯示着梁玥嘉嘅最後上線時間，心中不禁嘆一口氣

「嘉嘉連手機都冇睇⋯」宋千辰嘅心裏有啲擔心，想send個message比梁玥嘉睇下佢點，「不過佢宜家應該想自己一個人靜下⋯」

宋千辰將手機放番低喺枱上，然後默默地起身行到門邊閂上房燈，只留下一盞枱燈亮着，坐回書枱前後托着腮思考着今日發生嘅事

「如果嘉嘉唔知，係唔係會比較好⋯」宋千辰不禁喺心中問自己

楊楠恩雙眼喊到微腫，推開家門後拖着疲倦番到房，喺床邊坐低後直接伏低





「感覺⋯失去咗啲唔可以失去嘅嘢⋯」楊楠恩喺心裏弱弱地道，「點解我要咁做⋯」

後悔，心裏全是懊悔⋯但早知今日，又何必當初⋯？

淚水滑過楊楠恩嘅臉頰，楊楠恩連喊都唔敢唔得咁大聲，只可以喺黑暗嘅房間中偷偷啜泣

「就算記咗缺點，都係我應該承受⋯」楊楠恩說服自己接受會被記缺點嘅事實，「種咩因得咩果⋯係我自作自受⋯」

⋯

星期日

梁玥嘉已經恢復正常，只係當諗起楊楠恩時，心裏就好似有個缺口一樣⋯唔自在





「楠恩佢果然⋯係中意千辰⋯」梁玥嘉坐喺梳化上放空，但佢心裏最在意嘅都唔係楊楠恩中意宋千辰呢個事實，「唉⋯我在意嘅都係楠恩咁對我⋯」

梁玥嘉悶悶不樂地盤腿坐着，連電視都冇心情睇，一個人思考着應該點做

「雖然楠恩呢度我都唔知可以點，但⋯千辰⋯」梁玥嘉又諗緊另一個更重要嘅問題

啱啱咁樣諗完，手機即刻就震咗一震，梁玥嘉順手地拎起放喺茶几上嘅手機睇下

「今晚一唔一齊食飯？」

原來係宋千辰嘅message，梁玥嘉望住手機無力地笑一笑

「好」梁玥嘉回覆道

宋千辰望住梁玥嘉send過嚟嘅回覆，總覺得梁玥嘉仲係煩惱緊，但佢又唔想開口問梁玥嘉關於楊楠恩嘅嘢，唔想喺梁玥嘉嘅煩惱上再加重





去到7點嘅時候，宋千辰推開大門，見到梁玥嘉已經企咗喺度

「你今日冇孭袋嘅？」梁玥嘉先開口問宋千辰




IG Link: https://www.instagram.com/nd_cotttoncandy/?hl=zh-tw