［愛情純愛］由嗰一個Kiss開始，我地唔再係青梅竹馬: 145. 重提

「一齊挽啦～玥嘉同楠恩都唔會介意嘅～咦⋯？」李穎容講完回頭一望，發現梁玥嘉同楊楠恩已經唔係企喺佢嘅身邊，坐得遠遠的，「你兩個做咩坐到咁遠⋯」

「費是阻住你兩個嘛～」梁玥嘉邊笑邊講，楊楠恩挽住梁玥嘉嘅手臂，兩個女仔笑得開心

「講乜鬼呀！」李穎容沒好氣又害羞地講道，然後獨自行到梁玥嘉嘅身旁坐低

「張子萊係唔係一齊挽？坐穎容隔離啦～」梁玥嘉故意講道

張子萊無奈地行到李穎容身旁打算坐低，正當佢打算坐低時，楊楠恩忽然開口



「我地會唔會坐番去電視正中間好啲？」楊楠恩講道，「我地坐到咁過，要打斜睇⋯」

張子萊企番好個人，然後行到去電視中間嘅位置坐低

梁玥嘉推着李穎容，李穎容逼住坐向張子萊嗰邊；梁玥嘉同楊楠恩故意一直逼過去李穎容嗰邊，李穎容移到過去張子萊身旁，梁玥嘉再故意地輕輕推咗李穎容一下

李穎容失重心，下意識伸手撐住地面，但佢嘅手直接跨過咗張子萊個人，成個人幾乎係要瞓低喺張子萊身上

張子萊瞬間愣住，不禁瞪大眼，李穎容下意識抬頭，瞬間與張子萊四目交投；李穎容即刻坐番好，微微耷低頭拉一拉衣角，整理好外套，其實只係想掩蓋自己泛起紅霞嘅臉頰



「係唔係挽呀⋯？」張子萊開口問咗一句

「係！」「係～」

梁玥嘉同楊楠恩舉起手制同時回答道

張子萊望都唔望李穎容，拎住手制就好似冇事發生過一樣，照樣同三個女仔一齊挽overcooked

霍思傑同宋千辰行到去雪櫃前拎咗包嘢飲，然後行番去梳化坐低，睇住佢地挽



「楠恩！Pizza呀！燶啦燶啦！」梁玥嘉緊張地嗌度

「拎咗拎咗！」楊楠恩鬆一口氣，將Pizza掉比梁玥嘉，「好彩好彩！」

「張子萊！你快啲切嗰個蕃茄啦！」李穎容伸手拍張子萊

「等陣啦！個餅就得啦！」張子萊專注地望住電視，「你切住先啦！」

四個人拎住手制坐喺電視前，緊張嘅程度就好似真實地喺廚房一樣，每一道菜嘅製造過程都特別驚險

「張子萊！廚房著火呀！」李穎容緊張地一手捉住張子萊，「快啲整熄佢啦！」

「你搞到個廚房著火係咩事？」梁玥嘉不禁微咗出嚟

「得番3秒咋嘛，由佢啦！」張子萊無奈地講道



「Yeah～我地又贏啦～」楊楠恩同梁玥嘉high five，「你兩個場場都輸嘅？」

「你呀張子萊！」李穎容用手嘅前臂輕輕地推咗張子萊一下，「醒少少啦⋯！」

「我醒少少？你好醒咩李穎容⋯」張子萊無奈地反一下白眼，「唔得呀，我要休息下⋯好攰呀救命⋯」

張子萊向後灘低喺地上，李穎容望住張子萊，輕輕力地掐咗佢嘅腰一下；梁玥嘉企起身，行到去梳化坐低

「有嘢飲嘅？」梁玥嘉望到宋千辰手上拎住嘅蘋果綠茶

「喺雪櫃拎，嘢飲任飲。」宋千辰飲埋最後一啖，然後慣性地將紙盒㩒扁

「我又要拎嘢飲～」梁玥嘉一下子企起身朝住雪櫃嘅方向行去



梁玥嘉企起身，宋千辰都跟住佢企起身，一下子伸手搭住梁玥嘉嘅膊頭，同佢一齊行去雪櫃拎嘢飲

「你又要拎嘢飲咩？你啱啱先飲完一包咋喎～」梁玥嘉望向宋千辰

「散下步唔比？」宋千辰無厘頭嘅回答直接將梁玥嘉逗笑

「噗⋯喺個咁細嘅房入面散步？」梁玥嘉笑問道，「你講呀？」

楊楠恩望向企喺雪櫃前嘅二人，心裏妒忌但唔敢再做啲咩，上次宋千辰認真警告佢嘅模樣，令人生畏

「睇嚟佢真係開始懷疑我⋯我唔可以再亂嚟⋯」楊楠恩喺心中講道，「如果唔係，得不償失⋯」

楊楠恩企起身行到去梁玥嘉身旁，挽着梁玥嘉嘅手臂

「你飲咩呀？」楊楠恩問梁玥嘉，望到梁玥嘉手上拎住嘅蘋果綠茶，「我都飲呢個～」



楊楠恩從雪櫃中拎咗一包蘋果綠茶，梁玥嘉微微一笑，然後拎住嘢飲行番去李穎容身旁坐低

⋯

夜晚9點半，大家都食完飯，霍思傑將外賣飯盒放番入膠袋入面，打算離開嘅時候先一次過掉去外面嘅垃圾桶

「咁就9點半啦～」張子萊坐低喺地上，李穎容同楊楠恩坐喺梁玥嘉身旁

大家自覺地圍圈坐，挽咗大半日，嚟到最後一個鐘，大家都決定要進行啲靜態啲嘅活動，坐埋一齊傾下計

「話說呢，玥嘉嗰件事，好似不了了之咁⋯」李穎容忽然間又提起梁玥嘉比人淋凍水嗰件事，「Miss Tam都冇再問過啲咩。」

楊楠恩聽到李穎容咁樣一講，手不禁一顫，表情瞬間凝重起嚟，心跳加速起嚟



「好地地做咩又講起⋯」楊楠恩喺心中講道，或者因為心中有鬼，所以楊楠恩更加唔敢出

宋千辰嘅視線默默地落喺楊楠恩身上，見到楊楠恩突然間安靜咗落嚟，宋千辰似乎更加肯定心中嘅疑問





下星期就係結局週啦！


IG Link: https://www.instagram.com/nd_cotttoncandy/?hl=zh-tw