［愛情純愛］由嗰一個Kiss開始，我地唔再係青梅竹馬: 144. 願打願捱

宋千辰打開家門，見到梁玥嘉已經企定定喺家門前等佢

「你咁早嘅？難得有一次係你等我。」宋千辰笑一笑，將大門閂上，半跪落嚟將鞋著好

「咩啫～我早換好衫咪早出門口囉！」梁玥嘉微微鼓起兩泡腮

「知啦知啦，你最叻！」宋千辰企起身笑一笑，「行啦！」

宋千辰同梁玥嘉去到地鐵站，一上車梁玥嘉就企喺玻璃前，同宋千辰對住企



「你今日唔著裙嘅？」宋千辰沒頭沒腦地問道

「你中意我著裙多啲咩？」梁玥嘉反應好快地反問道，宋千辰頓時窒咗一窒

「我以為你今日會著裙啫⋯」宋千辰嘅回答完全就係答非所問，然後停頓咗一陣之後又緩緩地開口，「著裙定褲都好睇。」

「梗係啦～」梁玥嘉似乎好滿意宋千辰嘅回答，用力地點著頭，「我著咩都好睇～」

梁玥嘉抬頭定睛望住宋千辰，宋千辰亦望住梁玥嘉，四目交投，小鹿亂撞



宋千辰理直氣壯地直視着梁玥嘉，但梁玥嘉卻紅了臉頰，撇開臉移開視線

「我地好似都冇咩點嗌過交⋯」梁玥嘉忽然間講道，想拉開話題，「除咗嗰次，你呷醋之外⋯」

「嗯，我一早就講咗我會呷醋。」宋千辰理直氣壯地講道，毫不遲疑，「等你仲同李子迪行得咁埋。」

「我同佢係好兄弟！況且⋯我又唔係對佢有多餘嘅想法⋯」梁玥嘉愈講愈細聲，什至都唔敢望住宋千辰講

宋千辰聽到後嘴角悄悄地上揚起嚟



「嗯，我知。」宋千辰嘅回覆簡單而直接，語氣堅定

梁玥嘉悄悄地瞄咗宋千辰一眼，總覺得自己挖咗個窿比自己踩落去一樣，宋千辰嘅回答統統都係理直氣壯，搞到梁玥嘉唔知可以講咩，最後尷尬嘅又係自己

去到約定地點A2出口嘅時候，梁玥嘉左望右望都見唔到其他人

「佢地仲未到呀？」梁玥嘉自言自語一樣講道

宋千辰喺group send咗個message話比大家知佢地到咗同時問下其他人到邊

「穎容同張子萊。」梁玥嘉望住朝佢地呢度行緊過嚟嘅兩個人對宋千辰講道

「message一send完你兩個就到啦。」宋千辰對行到過嚟嘅張子萊講道，然後下意識又望一望行咗去梁玥嘉旁邊嘅李穎容，「一齊嚟嘅？」

「哦，咁啱撞到。」張子萊睇起嚟有啲心虛咁講道，望向李穎容，李穎容笑咗一笑



「咁啱撞到？」梁玥嘉唔信，細細聲地問李穎容

「一齊食完嘢先過嚟～」李穎容湊近梁玥嘉嘅耳邊講道，梁玥嘉頓時忍唔住笑一笑

「哦～」梁玥嘉笑道

李穎容同張子萊對望咗一眼，張子萊睇到梁玥嘉嘅反應，都估到李穎容一定係同梁玥嘉講咗佢兩個先唔係咁啱撞到而一齊嚟

「啱啱好～唔遲唔早～」楊楠恩從出閘機小跑過嚟到大家嘅面前

「你都唔係最遲，仲差霍先生。」李穎容笑一笑講道，「張子萊，你快啲問下佢到邊啦！」

「落緊嚟。」張子萊望一望手機講道



待霍思傑都嚟到之後，大家終於出發去party room

入到party room之後，大家先喺門口除鞋，將鞋放到門邊嘅鞋櫃上；party room嘅地上鋪咗軟墊，踩落去時有啲軟軟嘅感覺

「哦～呢度幾好喎～」霍思傑行到梳化前，將袋放低喺梳化旁，一個轉身坐咗喺地上，「識搵喎張子萊～果然係挽開呀～」

「比你發現咗我挽開添～」張子萊將袋掉到梳化上，「唔夠你挽得咁多～」

「佢有overcooked！挽唔挽呀！？」李穎容企喺電視前，望緊旁邊櫃中有咩switch game

張子萊行到去李穎容身旁，企喺三個女仔旁邊，四個人一齊擋住咗成個電視

「啱你挽呀李穎容，你都唔識煮飯～」張子萊喺一旁挪揄道，「煮燶晒啲嘢～」

「張子萊！你想死呀？」李穎容用力地掐張子萊嘅手臂



「呀、呀、呀、呀！」張子萊連忙拍着李穎容嘅手，「好痛呀！你成日都掐到我隻手瘀晒呀！」

「略略略～」李穎容調皮地吐舌頭

李穎容彎腰將放喺電視櫃上嘅手制拎起遞比張子萊

「你同唔同我地一齊挽？」李穎容問張子萊

「挽咩？Overcooked呀？」張子萊接過手制

「嗯，同我地一齊挽～」李穎容笑起嚟講道

梁玥嘉同楊楠恩趁佢兩個唔為意，攝手攝腳地行開咗，行後咗兩步坐低喺地上，一邊等李穎容同張子萊，一邊食花生睇好戲






IG Link: https://www.instagram.com/nd_cotttoncandy/?hl=zh-tw