［愛情純愛］由嗰一個Kiss開始，我地唔再係青梅竹馬: 143. 想被愛

「之前你中意Joshua嗰陣，我從來都冇聽過你咁講。」梁玥嘉打從心底替李穎容開心，「張子萊又真係唔錯嘅～」

「你眼中唔係只有宋千辰咋咩？」李穎容揄挪地笑道，「仲有其他人㗎原來？」

梁玥嘉無言反駁，只好無奈一笑

「後日就可以去挽啦～諗到都覺得開心！」李穎容盤着腿坐喺電腦椅上，手上抱住本來放喺梁玥嘉床上嘅白兔公仔

⋯





「拜拜～我地後日見啦～」梁玥嘉對踏出佢家門嘅李穎容講道

「好呀～你表白加油呀！」李穎容湊近梁玥嘉嘅耳邊對佢講道，「希望你早日出pool～」

「出啦出啦！就出pool啦，應該！」梁玥嘉無奈地反一下白眼後講道

梁玥嘉閂上門之後唔係第一時間番房，而係行咗去廚房，打開雪櫃拎咗包嘢飲後先番房

李穎容啱啱先踏出住宅大廈嘅門口，就拎手機回覆張子萊，臉上漸漸地掛上笑容





李穎容舉起手機，直接影咗張相比張子萊當作回覆

「去邊？」張子萊好快就seen咗李穎容啱啱send出去嘅message並回覆

李穎容：放學之後去咗玥嘉屋企

張子萊：番屋企食飯？

李穎容：係呀～～番屋企食飯！我媽話今晚煮我中意食嘅炒蜆！





張子萊：做咩抄我中意食蜆！

李穎容：邊個抄你！你抄我就真呀！

「小學雞⋯」李穎容望住手機螢幕，等待張子萊嘅回覆同時細細聲地講道，嘴角微微上揚着

李穎容嘅心似乎完全承認咗自己係中意張子萊嘅事實，佢嘅心底裏覺得目前呢個關係狀態幾好，啱啱先受咗傷，傷口又點會好得咁快⋯？

「如果我一開始中意嘅人係張子萊⋯」李穎容嘅心不禁諗道

當完全信任一個人嘅時候，去到最後卻發現原來佢早就狠狠地背叛咗自己⋯信任就連同愛情一同粉身碎骨⋯

同張子萊更熟絡後嘅日子，李穎容都唔敢將碎滿一地嘅心收拾好，只可以默默地望住喺地上嘅碎片⋯再堅強嘅李穎容，都有想被愛護、被珍惜嘅一面

唔敢被愛亦唔敢去愛，因為愛一個人嘅代價⋯太大⋯！





「呼⋯」李穎容輕呼一口氣，扁起嘴，滿懷心事地抬頭望向天空

此時手機一震，將李穎容拉番嚟現實，原來係張子萊喺group send咗嗰間嘢嘅地點

張子萊：後日我地1點20喺觀塘地鐵站等？齊人之後一齊去

李穎容先啱啱㩒咗個Okay嘅emoji打算send出去，就收到張子萊喺IG send過嚟嘅message

張子萊：快啲覆group

李穎容將emoji send咗出去，然後轉番去IG頁面又再回覆張子萊

李穎容：覆咗啦～





望住代表着輸入中嘅三個點，李穎容心裏總會帶着期待，就算喺輕輕抿唇後都好，嘴角都係會不自覺地上揚起嚟

另一邊廂，坐喺書枱前發呆嘅梁玥嘉忽然間好似記起啲咩一樣回過神來，拎起手機，螢幕一亮一解鎖

「差啲唔記得！」梁玥嘉㩒入WhatsApp

晏就放咗學番嚟之後，宋千辰有send過messag比佢，但因為同李穎容一齊講緊戀愛心事，所以就冇覆到

宋千辰：後日約幾點？

梁玥嘉：group話1點4等，我地約12點9？

宋千辰：好

宋千辰將手機放低喺枱上，伸手拉開右邊桶櫃，將嗰個裝住手鐲嘅灰銀色禮物盒拎咗出嚟，呢個盒喺呢兩個禮拜已經比佢拎咗出嚟好多次





「答覆⋯佢比我未⋯？」宋千辰一手托住下巴，一手拎住禮物盒，雙眼就嚟放空一樣望住禮物盒，「唉⋯」

宋千辰企起身，將禮物盒塞到佢打算後日孭嘅嗰一個袋入面，打算嗰日帶埋手鐲出去，因為佢都唔知梁玥嘉會幾時、點樣比答覆佢

「呀⋯煩死⋯」宋千辰嘅心中有千萬個無奈，「到時係唔係都比咗佢先！」

宋千辰將袋放到地上，拎起手機直接就往床上灘

「嘉嘉會守承諾㗎可⋯」宋千辰不禁喺心中問道，「佢講咗考完試講，佢就會考完試講⋯」




IG Link: https://www.instagram.com/nd_cotttoncandy/?hl=zh-tw