［愛情純愛］由嗰一個Kiss開始，我地唔再係青梅竹馬: 134. 若有所思

「喺前梯落去再上番嚟？」梁玥嘉輕皺起眉頭，同時都諗緊可能人選

「我估佢係經前梯落咗一層，然後再喺下面嗰層嘅後梯上番嚟，佢淋完你水之後，佢就跑去後梯落番一層，再從前梯上番嚟，咁樣佢係去廁所同離開嘅時候都唔會有人睇到啦～」宋千辰一臉認真地推測道，佢知道梁玥嘉嘅性格，梁玥嘉唔會考慮到咁多嘢

「但邊個會特登咁做⋯？」梁玥嘉問道

此時，宋千辰卻靜咗落嚟，猶疑緊應唔應該同梁玥嘉講佢懷疑嘅人係邊個

「千辰？」梁玥嘉叫咗宋千辰一聲，「你諗緊咩？」



「冇⋯」宋千辰隱瞞咗佢想講嘅嘢，搖搖頭，「但呢件事，一定仲會有下文，嗰個人淋得你，之後一定仲會有其他事。」

「千辰係唔係已經知係邊個做⋯？」眼見宋千辰嘅反應，梁玥嘉不禁懷疑起嚟

⋯

「夠鐘，停筆！」監考老師企喺課室嘅鐘前，「將試卷從後面傳上嚟。」

同學們都將試卷掀番去第一頁，然後向前傳，傳上去比第一個同學



「呼⋯」梁玥嘉嘅心裏鬆咗一口氣

今日考嘅係中文，陣間小息之後就係考作文，大家都坐喺小食部放小息同時等下一場考試

「我同玥嘉去買嘢食呀，穎容你去唔去呀？」楊楠恩拎住銀包行到去仲搵緊銀包嘅梁玥嘉身旁，李穎容一啲反應都冇，「穎容？」

楊楠恩再叫多佢一聲，但穎容好似諗嘢諗到入咗神一樣，根本都冇聽到佢講嘢

「李穎容！」梁玥嘉望向李穎容，伸手輕力地推咗佢一下



「嗯？」李穎容回過神來，抬頭望向梁玥嘉同楊楠恩，「叫我？」

「呢度除咗你之外，仲有邊個叫李穎容？」梁玥嘉一臉無言地望住李穎容，「去唔去買嘢食呀？楠恩都叫咗你兩次啦！」

「哦⋯！好呀⋯」李穎容尷尬地笑一笑，然後企起身同梁玥嘉、楊楠恩一齊行出去

李穎容企起身嘅時候，張子萊抬眼望咗李穎容一眼，然後又再次耷低頭

「阿姨，要包雞串。」李穎容企喺收銀處前講道，打算比錢嘅時候發現，自己連銀包都冇拎到出嚟，李穎容回頭望向楊楠恩，「楠恩你幫我比住先得唔得？我陣間比番錢你⋯」

「哦，好呀⋯」楊楠恩見李穎容心不在焉的，心裏有啲愕然，平日李穎容都好少會咁樣不在狀態

楊楠恩同梁玥嘉對望咗一眼，李穎容企喺一旁等埋佢地先再一齊番去

「陣間考完試之反，不如一齊去食嘢呀～」梁玥嘉提議道



「好呀～但食咩好呀？」楊楠恩問道，眼見梁玥嘉好似冇咩idea咁，楊楠恩望向最多主意嘅李穎容，「穎容你話呢？」

李穎容一邊咬着雞串，一邊諗自己嘅事諗得入神，梁玥嘉反一下白眼，然後又拍佢

「李穎容！」梁玥嘉用力地拍咗李穎容一下，李穎容成個人都顫咗一顫

「吓？」李穎容回過神來，望向梁玥嘉

「放學之後食咩呀？」楊楠恩再問多一次，「你今日做咩成日都心不在焉咁？」

「冇嘢⋯」李穎容笑着搖頭，「放學食⋯不如去飲茶～」

「飲茶？」梁玥嘉同楊楠恩異口同聲地驚訝道



「我地都冇一齊飲過茶～」李穎容笑了笑講道

⋯

今日要考嘅嘢都考晒之後，佢地真係喺放學之後去咗茶樓飲茶，佢地跟喺帶位員身後行走到茶樓入面

茶樓入面有好多推住手推車嘅阿姨，推住餐車四處走

「喂！」張子萊一下子將李穎容拉到自己身旁

李穎容猛然抬頭，見到一架餐車喺佢面前經過，隨即低頭望向自己嘅手，張子萊捉住佢嘅手腕

「掛住睇手機，睇路先得㗎⋯！」張子萊鬆開李穎容嘅手之後講道，然後就繼續行，跟上霍思傑等人

李穎容都跟上大隊，佢伸手輕輕地捉住自己嘅手腕，悄然抬眼定睛望住張子萊嘅背，若有所思地耷低頭



帶位員將佢地帶到一張圓枱前，梁玥嘉同李穎容中間坐着楊楠恩，而李穎容嘅右邊坐着張子萊

「要咩茶？」帶位員將一個大玻璃碗放低

「普洱呀唔該～」霍思傑講道，帶位員便點一點頭轉身離開

「你地想食啲咩？」李穎容拎起點菜紙，「我想食奶皇包～剔咗先～你地食咩？」

「叉燒腸粉！」霍思傑第一個叫道

「我想食炸雲吞！」梁玥嘉邊洗嘢邊講道

李穎容將大家想食嘅嘢逐個逐個剔好，便將佢遞比經過嘅服務員






IG Link: https://www.instagram.com/nd_cotttoncandy/?hl=zh-tw