［愛情純愛］由嗰一個Kiss開始，我地唔再係青梅竹馬: 133. 推測

張子萊同李穎容食完飯，喺行番屋企嘅路上，李穎容到咗過馬路嘅地方，張子萊則繼續直行

「拜拜～下個星期見～」李穎容對張子萊講道

「拜～」張子萊點一點頭，然後繼續直行

李穎容忽然回頭，望向正耷低頭睇緊手機、同佢已經拉開咗五步距離嘅張子萊，大聲地叫住佢：「喂！張子萊！」

張子萊聽到李穎容叫佢，便停落嚟回頭望向李穎容



「咁大聲做咩呀？成條街啲人都知我叫張子萊啦⋯」張子萊沒好氣地笑起嚟

「晏啲一齊打機呀！」李穎容比張子萊講嘅嘢逗笑

「知啦⋯！」張子萊無奈地講道，但又不禁失笑，「你因為咁小嘅事搞到成條街啲人都知我叫咩名啦⋯！」

「對唔住囉！」李穎容笑道，朝張子萊揮揮手，「我地下星期見啦張子萊！」

「夠啦！」張子萊聽到李穎容又大叫佢個名，覺得有啲尷尬，「唔好再大叫我個名啦！個個都知道啦！」



綠燈亮起，李穎容笑了笑，然後又揮揮手，便轉身過馬路

行到去對邊嘅時候，李穎容回頭望回對岸，見到張子萊邊睇手機邊行，嘴角不自覺地上揚

「今日好似特別開心⋯」李穎容喺心中講道同時，手放到胸口上，感受着心臟嘅跳動

就喺李穎容回頭，繼續踏上回家嘅路同時，張子萊望向喺對面嘅李穎容，若有所思地笑一笑，然後又再次耷低頭睇手機繼續行

⋯



「我飽啦，個意粉你食埋？」梁玥嘉拎起紙巾抹嘴，順手地就將插住叉意粉盒遞比宋千辰

「你食剩咁多嘅？」宋千辰望住梁玥嘉放低喺自己眼前嘅意粉盒，順手地就拎起放喺盒入面嘅叉，捲咗一捲意粉食

梁玥嘉雙手托住下巴，定睛望住宋千辰，本來專心睇緊手機嘅宋千辰察覺到整個環境突然靜咗落嚟，視線從手機上移開

「做咩⋯」宋千辰頓一頓，見到梁玥嘉嘅嘴角微微上揚着，面帶着微笑望住佢

「嘻⋯冇咩～」梁玥嘉搖搖頭

「嗯？」宋千辰有啲疑惑咁挑眉，低頭望一望放喺自己面前嘅意粉，「你落咗毒呀？」

「痴線啦！梗係唔係！」梁玥嘉反一個白眼講道，「我自己都食咗，咁我咪毒死埋自己？」

宋千辰靜咗落嚟，若有所思地望住梁玥嘉，梁玥嘉不解地側着頭



「做咩？」梁玥嘉開口道，但卻見宋千辰欲言又止，梁玥嘉心裏有啲好奇宋千辰想同佢講啲咩

宋千辰腦內忽然間諗起上次楊楠恩嘅一句：「我同玥嘉係朋友，我又點會害佢？」

「你對個個都咁好，唔怕人地⋯會害你？」宋千辰忽然認真地講道，完全唔似講緊笑

「應該唔會有人會害我掛⋯」梁玥嘉聽到宋千辰嘅說話後頓了一頓，然後笑笑口講道，「而且如果佢會害我，我都唔會同佢熟啦～當我蠢㗎咩！」

「咁你覺得邊個會咁大整蠱，特登淋你水？」宋千辰提起梁玥嘉嗰日喺廁所比人淋水嘅事，梁玥嘉頓時有啲疑惑

「呢個⋯我又真係諗爆頭都諗唔明⋯」梁玥嘉收起咗臉上嘅笑容，「但講真呀，我都有諗過會係邊個，但係又冇咩頭緒，Miss Tam話未搵到嗰個人係邊個，我地學校咁啱喺我地嗰層就冇CCTV喺後梯⋯」

宋千辰心中有啲猶疑，因為佢心中已經有一個人選⋯



「你出去嘅時候，走廊有冇人？」宋千辰問道

「冇呀～成條走廊得我一個咋嘛～」梁玥嘉回想起當日嘅事，「嗰日我地班咪遲咗成15分鐘先落堂嘅～我經過隔離班房嘅時候，入面都係零零星星咁得三、四個人咋嘛～」

「你同隔離班啲人熟唔熟？」宋千辰又問道

「一般啦，唔太熟。」梁玥嘉搖搖頭，「我經過嘅時候，見到佢都都孭晒書包準備走。」

「嗰日係中六清locker嘅日子，大家嘅書包應該都唔會輕得去邊，孭住咁大個書包，可以跑得咁快？」宋千辰講出佢心中嘅疑惑，為嘅係要一步步咁證實嗰個人就係佢心中嘅人選，「快到佢可以即刻一淋完水，消失喺我地呢層？佢係閃電俠定係識瞬間轉移？」

梁玥嘉靜咗落嚟，心中都覺得宋千辰講得有道理，嗰日大家都因為要清locker，所以大家嘅書包都唔會輕，但梁玥嘉記得佢一打開廁格門時，廁所嘅大門係剛好閂上，廁所入面真係得番佢一個人

「嗰個人，應該係知道嗰陣廁所只有你一個，隔離班嘅人都孭晒書包準備走嘅狀態，會突然間除番個書包？」宋千辰又道，講出佢心中嘅疑惑同埋論據，「而且嗰陣，冇人經過我地班房，咁即係嗰個人，一係就係我地後面嘅課室，一係佢就係經前梯落去然後再從後梯上番嚟。」






IG Link: https://www.instagram.com/nd_cotttoncandy/?hl=zh-tw