［愛情純愛］由嗰一個Kiss開始，我地唔再係青梅竹馬: 135. 喜歡又如何

李穎容收回手嘅時候，一下子打落張子萊度，張子萊窒咗一窒，李穎容望咗張子萊一眼，輕輕地哼咗一聲

「你打到我呀！」張子萊講道

「抵你死！」李穎容瞪咗張子萊一眼，仲要偷偷地喺枱底用力地踩咗張子萊一腳

張子萊無言地望住李穎容，心裏默默地嘆咗一口氣，佢都唔知李穎容嬲啲咩

由星期五晚到琴晚，佢地已經連續三晚一齊打機，其實中間都冇咩特別事發生，但李穎容就莫名其妙地嬲咗張子萊



兩個人成餐飯都冇講嘢，直到走嘅時候，大家各自番屋企嗰陣，佢地都冇講嘢；最後喺番屋企嘅路上又得番佢地兩個人

「你嬲咩⋯？」張子萊見李穎容一直都唔出聲，便拎出機send咗個message比李穎容

本來睇緊手機嘅李穎容見到張子萊send過嚟嘅message，直接無視咗張子萊，繼續睇IG

眼見李穎容嘅直接無視，張子萊又send多咗個message比李穎容：你嬲我琴晚話你粗魯冇人中意？

李穎容見到喺上面彈出嚟嘅message，一言不發，直接就用力地踩咗張子萊一腳



「嘶⋯」張子萊頓時忍着痛，細細聲地表達佢嘅痛楚，但睇嚟李穎容踩佢嘅力度都唔細

張子萊：今晚仲一唔一齊打機

張子萊借機轉移話題，而李穎容睇到之後終於㩒入WhatsApp回覆佢

李穎容：你伸手出嚟先

張子萊睇到之後，無奈地將手伸出嚟，李穎容望一望張子萊，又望一望佢隻手，然後用力地摵咗張子萊一下



「呀嘶⋯！」張子萊忍唔住叫咗出聲，「好痛呀！」

張子萊抬頭望向李穎容，見到李穎容擺出一副理所當然嘅模樣

「好痛呀李穎容！」張子萊望住自己可憐嘅手，「紅晒啦！瘀咗啦！」

「邊個叫你話我粗魯冇人中意呀！」李穎容反駁道，然後仲摵多咗張子萊一下

「呀！仲摵！」張子萊一下子撥開李穎容嘅手，「瘀咗啦！」

「好啦～我嬲完啦～今晚一齊打機啦～」李穎容對張子萊笑道

「你幾時咁小氣㗎？講笑咋嘛！」張子萊無奈地望向李穎容，「咁就嬲嘅⋯」

「係喎⋯點解我會嬲⋯」張子萊一問，李穎容嘅心都開始疑惑起嚟，「我做咩會嬲⋯？」



李穎容嘅心都開始懷疑，點解自己會咁在意，只不過係一句說話，一個玩笑，但佢偏偏就嬲咗張子萊

「邊個叫你話我冇人中意⋯！」李穎容隨便搵咗個理由，「我又點會冇人中意！一定有人會睇到我嘅好！」

「唔通我中意你又話比你聽咩⋯」張子萊喺心中默默講道，但卻笑笑口，點一點頭開口道：「嗯。」

「今晚溫完書一齊打機呀～」李穎容又回復本來嘅開朗

張子萊無奈地笑一笑，點點頭

⋯

「聽日考LS～」梁玥嘉望住貼喺枱頭嘅考試時間表輕鬆地講道，「唔溫lu～」



梁玥嘉一下子就跳到床上蓋着被，拎起放喺枱上嘅手機

睇咗一陣之後，梁玥嘉放低手機，平灘喺床上望住天花板放空着

「好悶呀⋯」梁玥嘉細聲地抱怨道，「最近同千辰好似都冇咩新進展咁嘅⋯」

梁玥嘉提起手，望住戴喺手上嘅手繩，一切嘅美好都同宋千辰有關

「快啲考完就好⋯」梁玥嘉細聲道，「有太多嘢想做啦⋯」

放喺旁邊嘅手機震動咗兩下，梁玥嘉拎起手機一睇，原來係佢地六個嘅group，李穎容喺group問大家完咗考試之後去邊度挽

梁玥嘉：去邊度挽都得啦～去唔去BBQ？我地都冇一齊去過BBQ

霍思傑：BBQ好呀！可以挽一日



李穎容：搵啲近沙灘嘅地方就最好啦～

「都未考完試，個個就已經諗緊去邊度挽⋯」梁玥嘉無奈地笑了笑，坐起身望向同喺枱上嘅月曆，「考完試之後再過多半個月就study leave啦⋯」

梁玥嘉忽然間覺得心裏有啲彷徨，一切好似嚟得太快，佢都冇時間適應

梁玥嘉嘅心裏有啲掛住宋千辰，佢拎起手機，打開WhatsApp，隨即send咗個message過去比宋千辰

梁玥嘉：做緊咩呀？

睇緊YouTube嘅宋千辰聽到電話震動嘅聲音，下意識就伸手拎電話，宋千辰見到梁玥嘉嘅message，笑一笑

宋千辰：做咩？你掛住我？






IG Link: https://www.instagram.com/nd_cotttoncandy/?hl=zh-tw