［愛情純愛］由嗰一個Kiss開始，我地唔再係青梅竹馬: 132. 故意給你看

梁玥嘉嘅右手㩒住喺櫈背上，左手比宋千辰拉住

睡房內只開住枱燈，柔和嘅燈光令氣氛變得有啲曖昧，心跳得更快

柔和嘅燈光就好似感情嘅催化劑一樣，令人悄悄地靠得更近⋯當靠得愈近，呼吸嘅聲音更大聲，心臟「噗咚」跳動嘅感覺就更強烈，就好似提起鼓棍，用力地打喺鼓面上一樣，嗰種震動傳至全身

理智愈想壓抑住關於吻嘅衝動，感情卻試圖衝出籠子，想要掙脫壓抑着嘅感覺

「唔得唔得⋯！」梁玥嘉喺心中同自己反覆講道，試圖要將感情用力壓落去，「一定唔可以錫落去⋯！」



宋千辰冇打算再進一步，但佢嘅視線卻難以移開，完完全全地鎖定喺梁玥嘉身上

「叮咚～」

此時門鐘一響，pizza送到，梁玥嘉頓時企番好，心跳仍然好快，似乎呢個門鐘救咗佢

「我去開門⋯」宋千辰移開視線，然後起身行出睡房

梁玥嘉喺宋千辰出咗房之後蹲低喺地上，鬆咗一口氣似的，手放喺胸口前，感覺到內裏正強烈地跳動着



「再遲一秒㩒鐘就弊啦⋯」梁玥嘉細細聲地講道，「嚇到心都跳埋出嚟⋯」

「嘉嘉！食嘢⋯」宋千辰行到睡房，一下子就將房門推開，見到梁玥嘉正蹲喺地上，「洗手食嘢啦⋯」

宋千辰忽然間覺得有啲尷尬，然後撇開臉，梁玥嘉喺宋千辰叫佢嘅時候，微微一顫

「我⋯我出去先⋯你轉頭出嚟啦⋯」宋千辰轉身就朝飯廳行去

梁玥嘉喺宋千辰出咗去之後先緩緩地企起身，然後去廁所洗手，洗完手行到出去之後見到宋千辰已經坐咗喺枱前邊食邊等佢



「Yeah～食嘢～」梁玥嘉笑了笑，但第一時間係拎起手機po個IG story

梁玥嘉故意@咗宋千辰，亦故意po喺public story，所有嘅故意都係為咗一樣嘢——宣示主權

宋千辰眼尾瞄向亮起嘅手機螢幕，嘴角稍微上揚，心裏默默講道：「睇嚟楊楠恩對佢好大打擊～」

「快啲食嘢。」宋千辰望一望梁玥嘉講道

梁玥嘉同宋千辰對上視線，梁玥嘉笑咗一笑，將手機放低喺手邊，然後從盒中拎咗一件pizza，小心翼翼地捧到自己嘅面前，用力地咬咗一啖

⋯

「難怪佢唔同我一齊食飯⋯」楊楠恩正睇緊梁玥嘉啱啱po出嚟嘅story，不禁握緊手機，「原來要番去同梁玥嘉食飯⋯」

楊楠恩打從心底知道宋千辰嘅心意，佢知道宋千辰嘅心入面已經有梁玥嘉，佢亦知道佢地兩人嘅感情並唔係外人話離間就可以離間，但楊楠恩嘅心裏不忿⋯！



楊楠恩坐喺書枱前托着腮，望住貼喺枱頭嘅班相，原來唔經唔覺已經暗戀咗宋千辰兩年幾，真心中意一個人時，的確會想佢幸福、想佢開心，但楊楠恩做唔到，縱使佢明白呢個道理，做唔到，只因為喺宋千辰心入面嘅嗰個人係梁玥嘉⋯

「如果冇梁玥嘉，我係唔係會有機會⋯？」楊楠恩望住手機變間嘅螢幕喃喃自語問道

楊楠恩嘅腦海中閃過嗰一日喺廁所嘅畫面，佢心中的確有半點內疚，但係當刻嘅佢只係想要發洩一下

晏就已經知道有一桶水喺度，去到放學嘅時候咁啱梁玥嘉話要去廁所，佢嘅心裏閃出兩個字：「天意」，楊楠恩搵咗個借口離開課室，故意行前梯先落一層後再跑往後梯上番去，推開廁所門見只有一格閂咗門，佢知道，廁所入面只有梁玥嘉⋯

楊楠恩心中嘅妒忌心令佢毫不猶疑地走向水喉，拎起放喺水喉旁邊嘅水桶，水桶因為裝滿水所以變得好重，楊楠恩花盡九牛二虎之力將水桶拎起，行到去梁玥嘉所在嘅廁格前，故意唔貼住廁格嘅門企，避免梁玥嘉會因為認得佢對皮鞋而知道係佢做

當刻嘅佢，毫不留情地將成桶水朝廁格內潑，隨即聽到梁玥嘉尖叫嘅聲音，楊楠恩頓時將水桶掉低跑出廁所，逃離現場，落一層後再繞番去前梯，過咗一陣之後再上番去

「對唔住⋯」楊楠恩喺心裏默默地向梁玥嘉道歉，「邊個叫宋千辰中意嘅人係你⋯」



喺楊楠恩嘅心中，始終對梁玥嘉抱有一種「敵意」，由妒忌而生嘅敵意⋯楊楠恩故意喺同宋千辰一齊嘅時候，影咗張相po喺IG close friend story，故意唔影樣，佢冇諗到梁玥嘉睇完之後會直接出一個影樣仲要@咗宋千辰嘅story回敬佢

「宋千辰中意邊個都好都冇所謂，但梁玥嘉，你點解可以得到宋千辰嘅心⋯？你已經成日同佢一齊⋯」楊楠恩始終諗唔通

佢有幾中意宋千辰，心裏就有幾討厭梁玥嘉，當佢親耳聽到宋千辰表示佢中意梁玥嘉時，楊楠恩嘅心難受，同時心中嘅恨意又慢慢滲出嚟⋯




IG Link: https://www.instagram.com/nd_cotttoncandy/?hl=zh-tw