［愛情純愛］由嗰一個Kiss開始，我地唔再係青梅竹馬: 131. 我投降

梁玥嘉等宋千辰換完衫之後便自然地敲兩下門，就推門入去，見宋千辰坐喺電腦前面

「食唔食pizza？」宋千辰聽到門打開嘅聲音便開口問道

「好呀好呀～」梁玥嘉一蹦一跳的走到床邊，坐喺宋千辰嘅床上，「好耐都冇食pizza啦～」

梁玥嘉坐喺一旁睇電話，佢嘅工作就係等食，佢坐喺床上睇手機，完全唔洗擔心叫外賣嘅問題；梁玥嘉偶然抬眼，剛好望到宋千辰手上戴住嘅手繩，伸出手指將手繩勾住

宋千辰嘅手一動，感覺到手腕被手繩扯咗一下，自然地伸手去整鬆條手繩，一摸就摸到梁玥嘉嘅手





「咦⋯？」宋千辰望向自己嘅手，見到自己嘅手搭住喺梁玥嘉嘅手上時頓時一頓然後縮，「你做咩勾住我條手繩？整爛呀陣間⋯」

「你平時都唔除㗎？條手繩。」梁玥嘉擺出一副好奇想知嘅模樣問道

「吓？沖涼嗰陣咪除。」宋千辰嘅視線又再一次落喺電腦嘅螢幕上，回答嘅聲線表達出佢心中嘅理所當然，「唔通戴住沖涼呀？咁條手繩咪濕晒。」

「咁除咗沖涼呢？都戴住？」梁玥嘉追問道

「嗯。」宋千辰嗯咗一聲回答，梁玥嘉聽到宋千辰嘅答覆，心裏有啲開心，「真係得沖涼先會除，平時都戴住，瞓覺都戴住。」





「痴線㗎？瞓覺都戴住？」梁玥嘉笑得更甜，甜到入心，「想晚晚發夢都見到我呀？」

「洗咩發夢先見你？」宋千辰揚起嘴角一笑，望向梁玥嘉，「宜家都見住你啦～」

「咁識講嘢嘅你？」梁玥嘉不禁一笑，眼尾嘅餘光留意到宋千辰已經落咗外賣單，「跟邊個學㗎？」

「我講事實咋嘛～」宋千辰望咗梁玥嘉一眼，笑咗一笑，「等嘢食～」

宋千辰自顧自的睇電腦，盤着腿坐喺床上嘅梁玥嘉默默地望住宋千辰，盯着佢手上嘅手繩，下意識地摸一下自己嘅手腕





「係喎⋯」宋千辰突然醒起啲咩一樣，停低㩒滑鼠嘅動作，望向梁玥嘉，「咁你條手繩呢？」

「呃⋯」梁玥嘉下意識將手放到大腿下壓着

「哦！」宋千辰捉住梁玥嘉嘅手，將佢壓住嘅手一下子抽出嚟，衫袖剛好提起咗，「你都冇戴喺手！」

宋千辰一下子甩開梁玥嘉嘅手，然後撇開臉，再次望向電腦螢幕

「喂呀！你嬲呀？」梁玥嘉即刻向住枕頭嘅方向移咗兩步，盯着宋千辰望，呢個角度可以見到宋千辰一言不發地盯着螢幕

宋千辰當咩都聽唔到，然後拎起放喺枱邊嘅耳機直接戴上，唔聽梁玥嘉講嘢，梁玥嘉頓時伸手將宋千辰嘅右耳機除咗落嚟；宋千辰見狀打算伸手拎起右耳機戴番，梁玥嘉頓時捉住宋千辰嘅手

「我冇戴係因為啱啱沖完涼冇戴番咋！」梁玥嘉解釋道，但宋千辰一聲不響直接就將耳機戴番，梁玥嘉不禁一笑，「喂！宋千辰！」

宋千辰望住電腦嘅螢幕，開住YouTube播歌，其實戴咗耳機之後，仍然都係可以聽到梁玥嘉叫佢，但宋千辰偏偏就要當聽唔到梁玥嘉講嘢，偏偏就要發脾氣





「千辰呀！」梁玥嘉捉住宋千辰嘅衫袖晃，「千辰！千辰！宋千辰！喂！」

宋千辰聽到梁玥嘉叫着佢着名，但宋千辰死都唔望過去，努力地當聽唔到梁玥嘉講嘢，專心睇YouTube

「喂！宋千辰！」梁玥嘉探頭望住宋千辰，但宋千辰嘅雙眼仍然停留喺螢幕上，「喂呀～我真係咁啱冇戴咋！宋千辰呀！」

宋千辰將左手放到枱上，然後托住下巴睇片，完全冇理會梁玥嘉嘅打算

「哼！」梁玥嘉輕輕地哼一聲，然後落地行到宋千辰嘅背後，雙手掩住宋千辰嘅雙眼

宋千辰因為梁玥嘉突如其來嘅「襲擊」而令心裏有啲慌，宋千辰不禁稍微坐好起嚟，手有啲不知所措咁懸喺半空

「除耳機！」梁玥嘉命令道





宋千辰似乎已經進入半投降嘅狀態，雙手放到耳邊將兩邊耳機都除咗落嚟，面對住梁玥嘉，宋千辰似乎永遠都會心軟，根本就唔捨得嬲佢

「我本來都有戴住，但因為去咗沖涼所以除咗。」梁玥嘉解釋道，「所以唔係特登唔戴，明嗎？」

宋千辰仍然一聲不吭地坐着，手上拎住啱啱除落嚟嘅耳機，梁玥嘉從左邊探頭望，鬆開掩住宋千辰雙眼嘅手

宋千辰望向梁玥嘉，梁玥嘉心裏一顫，因為佢正喺一個好近嘅距離同宋千辰對望着，宋千辰定睛望住梁玥嘉，令梁玥嘉嘅心不禁跳得更快

梁玥嘉想抽回手，右腳往後踏咗一小步，當成個人嘅重心都開始微微向後傾、落到右腳時，宋千辰察覺到梁玥嘉打算逃跑，一手捉住梁玥嘉正打算抽回、剛經過自己面前嘅手，將梁玥嘉拉番嚟

「呀⋯！」梁玥嘉下意識細聲地叫咗一聲

宋千辰將梁玥嘉拉番嚟，兩人之間嘅距離比啱啱更近，近到可以聽到彼此嘅呼吸聲⋯








IG Link: https://www.instagram.com/nd_cotttoncandy/?hl=zh-tw