［愛情純愛］由嗰一個Kiss開始，我地唔再係青梅竹馬: 130. 吃醋了？

「咩意思⋯？」楊楠恩心裏一顫，有啲心虛地抬頭望向宋千辰，微笑着講道，「我同玥嘉係朋友，我又點會害佢？」

「我只係話唔好亂嚟，有話你害佢咩？」宋千辰嘅眉頭輕皺，楊楠恩聽見宋千辰咁講，心裏更緊張，「嘉嘉對所有人都好，不過總有人會因為嘉嘉嘅善良而做啲傷害到佢嘅事。」

「玥嘉好好人，我更加唔會傷害佢！」楊楠恩講道，「我當佢係朋友，我唔會傷害佢。」

「既然你咁講，咁睇嚟，你應該唔係淋佢水嗰個。」宋千辰直盯着楊楠恩

楊楠恩聽到「淋水」兩個字，心中又一顫



「點會係我？」楊楠恩擠出微笑，「我嗰日都係上到嚟先知咩事，又點會係我。」

「我講啫～」宋千辰微微一笑，但楊楠恩嘅心裏難免會有啲擔心

宋千辰喺番去屋企嘅路上打咗個電話比梁玥嘉，但都比梁玥嘉直接cut咗線，梁玥嘉連聽都唔聽佢嘅電話

此時嘅梁玥嘉正一個人生悶氣，見到宋千辰嘅連環call都毫不留情咗掛斷

「做咩cut我線⋯？」宋千辰一頭霧水地望住彈回電話主頁嘅螢幕



「哼⋯出街咁開心仲打比我！」梁玥嘉氣沖沖地喃喃自語道，手機嘅螢幕又跳出來電顯示，梁玥嘉再一次cut咗宋千辰嘅電話

「唔通嬲咗我⋯？」宋千辰滿頭問號，佢連自己做錯咗啲咩都唔知，突然間就比梁玥嘉嬲咗，佢除咗無奈之外都唔知可以講咩

梁玥嘉睇咗一陣電腦之後，手機又響起嚟，梁玥嘉瞄咗放喺手旁嘅手機一眼，見到又係宋千辰打嚟，唔忍心又cut佢線嘅梁玥嘉接咗電話

「喂？」梁玥嘉冷淡地喂咗一聲，雖然心軟但係都仍然氣在心頭

「我買咗好嘢比你食～你出嚟拎呀～」宋千辰望住手上拎住嘅蛋糕盒，打算用食物引誘



「嗯⋯」對美食冇抵抗力嘅梁玥嘉嗯咗一聲，敗比美食嘅誘惑

梁玥嘉打開屋企門口，見到宋千辰就企喺門前，手上拎住蛋糕盒，梁玥嘉不急不忙地換上外出嘅拖鞋，拎埋鎖匙，順道關上門

「你搵我有事？」梁玥嘉撇開臉，但眼尾仍然都係瞄住蛋糕盒

「你溫緊書呀？」宋千辰小心翼翼地問道

「唔係。」梁玥嘉語氣冷淡，撇開臉望都唔望宋千辰

「我買咗蛋糕比你食呀～」宋千辰將蛋糕盒捧喺手中，小心翼翼地打開盒子，遞比梁玥嘉望一望入面嘅蛋糕

梁玥嘉朝蛋糕盒中瞄咗一眼，見到每一件都係佢中意食嘅蛋糕，整齊地放喺盒中

「你今日⋯」梁玥嘉朝宋千辰望咗一眼，「同楠恩一齊⋯」



「今日係咁啱撞到佢，唔係約咗佢。」宋千辰壓抑不住心中嘅焦急，頓時果斷澄清，「你、諗、多、咗、啦！」

梁玥嘉輕皺着眉頭，望咗宋千辰一眼，但宜家嘅宋千辰就真係一頭霧水

「你點知我同楊楠恩一齊？」宋千辰不解地問道，梁玥嘉氣沖沖地拎出手機，打開IG搵番楊楠恩po咗喺close friend嘅story

「嗱！睇下！楠恩喺close friend po咗story！」梁玥嘉皺着眉頭，將手機遞到宋千辰嘅面前，「一睇就知係你！條手繩，我織㗎！你戴住㗎！」

梁玥嘉指住戴喺宋千辰手腕上嘅手繩，不滿地鼓起兩泡腮，但企喺佢面前嘅宋千辰，一邊將蛋糕盒閂上一邊笑

「笑咩呀！」梁玥嘉瞪咗宋千辰一眼

「你嬲係因為我同楊楠恩啱啱一齊？」宋千辰嘅笑意藏不住，打從心底覺得開心，「我可唔可以理解為你呷醋？」



梁玥嘉嘅眉頭深鎖，悄悄地望咗宋千辰一眼；宋千辰伸手，溫柔地摸摸梁玥嘉嘅頭，梁玥嘉本來深鎖嘅嘅眉頭先稍為緩和

「仲嬲我呀？」宋千辰見到梁玥嘉仍然悶悶不樂，都只好上前氹佢，「我真的係咁啱撞到佢，我同佢又唔熟，又點會約佢？唔好嬲啦～我買咗蛋糕比你食，笑番先啦～」

「嗯⋯好啦⋯睇在蛋糕嘅份上就原諒你啦⋯」梁玥嘉嘅嘴角漸漸上揚，手朝着蛋糕盒伸去，「你一唔一齊食⋯？」

「宜家？」宋千辰疑惑地問道，「你唔洗食飯呀？」

「我應該晏啲煮麵食⋯我爸媽仲喺公司未走得⋯」梁玥嘉聳聳肩，「你要番去食飯啦？」

「我呀⋯應該都係叫外賣⋯」宋千辰無奈一笑，「一齊叫外賣好唔好？」

「好呀～去你嗰邊食呀～」梁玥嘉笑了笑，然後拎住蛋糕盒，朝宋千辰屋企門口行去






IG Link: https://www.instagram.com/nd_cotttoncandy/?hl=zh-tw