［愛情純愛］由嗰一個Kiss開始，我地唔再係青梅竹馬: 124. 發燒（中）

宋千辰同李穎容對望咗一眼，見到對方眼中嘅無奈

喺放學之後，宋千辰同李穎容一同嚟到梁玥嘉屋企門口，宋千辰㩒門鐘，梁玥嘉拖住仍然疲倦嘅身軀行去開門

「你點呀？」宋千辰一行入屋，第一件事就係關心梁玥嘉嘅身體狀況，「有冇好啲呀？」

「嗯⋯今日媽媽同咗我去睇醫生，食咗一次藥⋯」梁玥嘉嘅眼皮一直垂着，行步路都唔太穩陣，「你件冷衫洗咗㗎啦⋯」

「得啦得啦⋯」宋千辰見梁玥嘉就嚟跌咁，即刻就扶住佢，將佢推番房



「玥嘉你再休息下啦！」李穎容邊講邊將書包除低放喺餐枱邊，然後行入梁玥嘉嘅睡房，坐低喺梁玥嘉嘅床邊，「今日Miss Tam有問過我地琴日嘅事，但我地都唔知可以點答佢⋯」

「我都唔知係邊個淋我⋯」梁玥嘉側身灘喺床上

「你最近有冇得罪邊個呀？」李穎容咁樣一問，好似講到有人尋仇一樣，諗咗一諗之後李穎容又道，「但你平時都好少得罪人㗎喎，班上都冇咩人唔中意你呀～」

「但嗰個人都幾故意下，睇中嘉嘉一個人，又知廁所冇人先落手。」宋千辰疑惑地道，「又會突然間有桶水喺度咁奇怪嘅？」

「你入到去嗰陣，桶水已經喺度？」李穎容問道



「嗯⋯」梁玥嘉微微點頭，佢嘅大腦唔想諗嘢，所以只可以係聽佢地講，佢地問就答

「咁嗰個人即係一早就知有桶水喺度？」李穎容嘅心中產生咗一個更大嘅問號，「又或者係佢一早裝定？」

「咁佢都幾得閒，出於某啲原因而咁做，仲要開定一大桶水⋯」宋千辰無奈地講道，「我諗佢似係咁啱諗到可以用嗰桶水，因為佢邊可以令一個唔想去廁所嘅人去廁所？」

「你咁講都啱⋯」李穎容點點頭，「但佢突然咁做真係好奇怪，佢有咩咁大仇要咁做？佢做得出咁樣，佢都好憎你⋯」

「唔知⋯」梁玥嘉微微搖頭，「有啲餓⋯」



「你想食咩？」宋千辰一聽到梁玥嘉話肚餓便頓時問道，「買比你食？煮比你食？」

「媽媽煲咗粥，喺廚房⋯」梁玥嘉坐起身打算去廚房盛碗粥食

「我去，你瞓番低啦⋯」坐喺電腦椅上嘅宋千辰企起身，然後㩒住梁玥嘉嘅膊頭

宋千辰出咗房之後，房間內就只剩下梁玥嘉同李穎容，李穎容望向梁玥嘉，露出意味深長嘅笑容

「唉～有人愛真好～」李穎容挪揄道，瞓喺床上嘅梁玥嘉無奈一笑

「你冇人愛咩宜家？」梁玥嘉講道，李穎容反一下白眼，「可能有你唔知啫⋯」

「我呀爸呀媽咪愛我囉～」李穎容講道，「講愛情嗰種愛就算啦，攰攰～」

「我有講係愛情嗰種愛咩⋯」梁玥嘉臉上掛上淡淡嘅笑容，「諗多咗啦你⋯」



「係啦係啦，我諗多咗啦！」李穎容將被子拉好，蓋到上去梁玥嘉嘅下巴，「你顧掂你自己先啦！講咁多嘢⋯」

梁玥嘉笑而不語，宋千辰手上拎住碗粥行入房

「起身食嘢先。」宋千辰將碗粥放低喺枱面，然後小心翼翼地將梁玥嘉扶起身坐好，「嗱！」

李穎容安靜地坐喺一旁望住兩人嘅互動，兩人嘅互動有種低調嘅甜蜜，李穎容從宋千辰嘅一舉一動中睇得出，佢真係好在乎梁玥嘉

望住兩人互動同時，李穎容諗起自己嘅曾經，係唔係都有咁樣嘅甜？定係只係有過一段平淡嘅愛情？愛情又算係啲咩⋯？

「Joshua⋯」李穎容喺心中不禁默念Joshua嘅名字，佢心裏放唔低嘅嗰個人，宜家又會點

「我想飲水⋯」梁玥嘉拎住匙羹，望向宋千辰



宋千辰行出去幫梁玥嘉酙咗杯水，順便放咗枝飲管放便梁玥嘉飲

「唔該⋯」梁玥嘉講道，宋千辰將水放低喺枱面後坐低喺電腦椅上

「你幾點要食藥呀？」宋千辰坐低兩秒都唔夠又問道，無時無刻都擔心住梁玥嘉

「食完嘢就食⋯」梁玥嘉講道，然後伸手拎起放喺枱上嘅藥袋，「想食多碗⋯」

梁玥嘉將碗遞比宋千辰，宋千辰接過碗之後起身又再一次行出房

「我番去先啦～」李穎容忽然間企起身講道

「咁快⋯？」梁玥嘉望住李穎容企起身

「我都係想探下你，睇下你點啫～」李穎容微微一笑，「你悶嘅就搵我啦～休息多啲啦你！快啲好番呀要！」



「嗯⋯」梁玥嘉點點頭，佢同李穎容對望一眼，所有事都在心中，「拜拜⋯」

李穎容行出廳拎書包，正好見到喺廚房拎住碗粥行出嚟嘅宋千辰，宋千辰見李穎容孭書包感到有啲訝異

「你走啦？唔留多一陣？」宋千辰走到李穎容面前

「唔啦，有你喺度嘛～我唔做電燈膽啦～」李穎容雙手插住喺校褸嘅衫袋中，然後行到去玄關位置著鞋，「玥嘉就交比你啦～」




IG Link: https://www.instagram.com/nd_cotttoncandy/?hl=zh-tw