［愛情純愛］由嗰一個Kiss開始，我地唔再係青梅竹馬: 123. 發燒（上）

「快啲番去啦！陣間凍親⋯」李穎容緊張地講道，「呢個時候你唔病得，下個星期就考試啦！」

李穎容拉住梁玥嘉番課室拎書包，李穎容幫梁玥嘉拎住個書包，行到要分別嘅地方時，便將書包交比宋千辰

「快啲入屋沖個熱水涼！」宋千辰擔心地講道，順道將梁玥嘉嘅書包放到去客廳，「我番去啦，有咩搵我呀！」

「嗯⋯」梁玥嘉點點頭

「快啲去沖涼！快啲去，凍親呀陣間！」宋千辰喺走之前仲要囉嗦兩句，「我閂門得啦！你去沖涼啦！」





梁玥嘉沖完個熱水涼之後，番到房坐喺床上，有一種由心而發嘅攰喺心底湧出，梁玥嘉直接灘咗喺床上面，當佢再次開妥嘅時候，就已經係夜晚聽到媽媽嚟敲佢嘅房門

「嘉嘉，媽媽入嚟啦～」梁媽媽推門行入梁玥嘉嘅睡房

梁玥嘉嘅睡房罕有地完全冇開燈，漆黑一片，梁玥嘉感覺到房門打開，走廊燈照滲入漆黑嘅睡房，佢用力地睜開雙眼

「媽⋯」梁玥嘉無力地開口講道

「今晚冇煮飯呀，你想食咩呀？」梁媽媽坐低喺床邊，手放喺梁玥嘉嘅膊頭上，手一放低，梁媽媽頓時就皺起眉頭，「咁滾嘅你個人？唔舒服呀？」





「好攰⋯」梁玥嘉無力地開口講道，連眼都睜唔開，成個人完全無力，坐唔到起身

「爸爸！」梁媽媽望向門口叫道，「拎個探熱針比我呀！」

梁玥嘉將探熱針含喺脷底一陣之後拎番出嚟

「嘉嘉你發燒呀，燒到38度呀！」梁媽媽一臉擔心地講道，「媽媽聽日請半就假陪你睇醫生啦！」

「嗯⋯」梁玥嘉幾乎已經係喉嚨發音





「再瞓陣，我煲定粥，等你晏啲肚餓食啦！」梁媽媽幫梁玥嘉蓋好被，然後行出房，閂上門

梁玥嘉聽到手機放喺枱面震動嘅聲音，梁玥嘉用盡力氣伸手將手機拎落嚟，見到係宋千辰嘅message

宋千辰：你點呀？瞓咗？

「啱啱瞓醒⋯我聽日應該番唔到學啦⋯發燒⋯」梁玥嘉直接錄音比宋千辰，但佢嘅攰同唔舒服，已經係連聽聲都聽得出嚟，「幫我拎功課⋯」

宋千辰聽到梁玥嘉話唔舒服，瞬間就又擔心起嚟

⋯

「玥嘉病咗呀？」李穎容企喺宋千辰嘅座位隔離，輕皺起眉頭，「邊個咁衰淋人凍水呀⋯！」

「佢發燒。」宋千辰講道，「我都想知邊個咁衰。」





「今日你放咗學之後會唔會去睇玥嘉呀？」李穎容好奇地問道，「如果你去嘅話，我可唔可以同你一齊去？我都想去睇下佢呀⋯」

「嘉嘉都應該Okay。」宋千辰點點頭

「李穎容！」忽然間有人叫咗李穎容一聲，李穎容望向課室門口，見到班主任Miss Tam企喺門口，「你地幾個出一出嚟。」

Miss Tam指住李穎容同宋千辰佢地幾個，李穎容，同楊楠恩行向課室門口，宋千辰、張子萊同霍思傑都企起身行出去

李穎容、楊楠恩、宋千辰、張子萊同霍思傑，再加上班主住Miss Tam，喺課室門口旁邊圍咗一個細圈

「有同學話，琴日梁玥嘉喺廁所比人淋水，你地知唔知發生咩事？」平日溫柔嘅Miss Tam擺出嚴肅嘅模樣問道

「琴日放咗學，我地打算一齊走，玥嘉話佢要去廁所，咁我地就喺課室等佢。」李穎容先開口描述番琴日嘅事





「突然間就聽到有人尖叫，李穎容提起話梁玥嘉喺廁所，然後我地就出咗去睇咩事。」霍思傑接住李穎容嘅說話講道

「一行到廁所，李穎容一開門，就已經見到梁玥嘉成身濕晒⋯」張子萊又接住霍思傑嘅說話講道，「我地連邊個做嘅都唔知，我地都想知係邊個做⋯」

「我地知嘅就係咁多啦⋯」李穎容無奈地講道

「佢有冇話見到係邊個做？」Miss Tam點頭示意明白，然後追問道

大家不約而同地望向宋千辰，宋千辰亦感覺到嚟自大家嘅視線，默默地開口

「佢話佢睇唔到，佢聽到有人入廁所，然後見到有一個影經過，但佢比人淋完水之後，就喺幾秒間聽到嗰個人走咗。」宋千辰將琴日喺番屋企路上時，梁玥嘉同佢講嘅嘢講番一次比Miss Tam知，「所以佢見唔到嗰個人。」

大家將視線落番喺Miss Tam身上，Miss Tam都只可以點點頭，然後表示佢會喺梁玥嘉番學嗰陣再問佢








IG Link: https://www.instagram.com/nd_cotttoncandy/?hl=zh-tw