［愛情純愛］由嗰一個Kiss開始，我地唔再係青梅竹馬: 125. 發燒（下）

「咩電燈膽啫⋯」宋千辰無奈一笑，「我會睇住佢㗎啦。」

「嘻⋯好啦～我走啦！」李穎容著好鞋，行到門前，「拜拜啦～」

宋千辰拎住碗粥行番入梁玥嘉間房，又再一次坐低喺電腦椅上；梁玥嘉望咗宋千辰一眼，然後默默地低頭食粥

「食完食藥呀！」宋千辰講道，「過多陣我就番去㗎啦～」

「你番去啦⋯？」梁玥嘉頓時擺出一副悶悶不樂嘅模樣，「你唔留多陣呀？」



「你休息嘛～」宋千辰托住腮睇手機，「唔舒服呀你，瞓下啦陣間食完藥。」

「唔洗⋯我都唔係真係好攰⋯」梁玥嘉搖搖頭，但淨係聽佢嘅語氣都可以聽得出佢嗰種因為病而帶嚟嘅攰

宋千辰伸手，將手放到梁玥嘉嘅額頭上，梁玥嘉下意識稍微向後縮咗一下，抬眼望住一臉認真嘅宋千辰

「你唔舒服就休息下啦，唔好死撐⋯」宋千辰將手放番落嚟

「唔要⋯」梁玥嘉扁起嘴，佢開始直接地撒嬌



「唔得呀，你唔舒服呀，瞓多啲先會快啲好番嘛～」宋千辰拎起手機

「唔要，我都唔眼瞓⋯我瞓咗好耐啦⋯」梁玥嘉食咗一啖粥，微微搖頭

「乖啦～」宋千辰伸手摸摸梁玥嘉嘅頭，「唔舒服嘛你，你唔想快啲好番咩？下星期考試啦！」

「呀⋯唔要呀⋯」梁玥嘉堅持地搖搖頭，「我都唔係真係咁攰，我瞓咗一覺都精神咗啲啦⋯」

「咁⋯我喺度陪你？你攰我先番過去？」宋千辰見梁玥嘉咁堅持，心軟地講道，本來仲想堅持要番屋企，「最多我等你瞓咗先走。」



「唔⋯」梁玥嘉有啲猶疑，但都係點點頭，「飽啦⋯」

「食藥啦，我幫你拎番個碗去廚房。」宋千辰起身，拎起放喺枱面嘅碗同匙羹行出去

宋千辰將碗放到洗手盆，順手地將個碗洗番乾淨

「冇水⋯」梁玥嘉將啲藥拎咗出嚟，打算飲啖水先再食藥，但發現杯入面已經冇水

梁玥嘉掀開張被，雙腳踩到地上，拎住玻璃杯離開睡房走向廚房；行到廚房嘅門口見到宋千辰喺度洗緊嘢，梁玥嘉行入去企喺另一邊拎起水壺

宋千辰聽到玻璃碰撞嘅聲音，頓時回頭，見到梁玥嘉拎起水壺

「你酙水叫我呀嘛！」宋千辰頓時閂上水喉，然後行到梁玥嘉嘅身旁，一下子搶走喺梁玥嘉手上嘅水壺，「做咩行出嚟？啱啱同我講嘛⋯」

梁玥嘉抬頭望向宋千辰，嘴角不禁上揚，心中覺得甜甜的，有人寵着嘅感覺真好



「哈啾！」梁玥嘉打咗一個噴嚏

「係唔係凍呀？」宋千辰嘅眉頭頓時一皺，宋千辰頓時拎起杯水，推住梁玥嘉行番入房，「番去番去⋯！」

宋千辰推住梁玥嘉行到入房，掀開張被，梁玥嘉坐到床上，蓋番張被，拎起放喺枱面嘅藥

「嗱！」宋千辰將杯水遞比梁玥嘉，「行一行出嚟又凍親咁點算呀你話？」

「都冇事⋯」梁玥嘉食咗藥，飲咗啖水將藥吞落去，然後將杯水放低喺枱面，然後側身灘低喺床上，將被拉到上自己下巴，「唔洗咁擔心⋯」

「你知我擔心你就好啦⋯」宋千辰坐低喺電腦椅上，櫈都拍到去梁玥嘉嘅床邊，畢竟書枱就只係喺床嘅隔離，「你真係睇唔到邊個淋你呀？」

「嗯⋯睇唔到⋯」梁玥嘉微微點頭，「一打開門就已經見唔到個人⋯嚇死我，突然一桶水淋落嚟⋯」



「嘉嘉嘅性格都唔會點得罪人，佢又好少會講啲咩難聽嘅說話⋯應該唔會有人要挽到咁大⋯」宋千辰默默猜想，「邊個特登咁做⋯？」

「千辰⋯？」梁玥嘉見宋千辰靜咗落嚟沉思便叫咗佢一聲，「你諗緊咩呀⋯？」

「冇咩。」宋千辰搖搖頭，微微一笑，「你攰就瞓陣啦，我等到你瞓咗先走。」

「嗯⋯」梁玥嘉微微點頭，將被拉上，遮咗半塊臉

但宋千辰就坐喺佢面前，佢根本冇辦法瞓得著，應該話，佢唔想瞓著；宋千辰翹起二郎腿，坐喺度睇手機

「仲唔瞓？」宋千辰感覺到梁玥嘉仲望住佢，便抬眼望向梁玥嘉

「話瞓就瞓得著㗎咩⋯」梁玥嘉細細聲地嘟囔着，佢偷偷地望咗宋千辰一眼，將本來隨意搭喺枕頭上嘅手收番入被中，「有啲凍⋯」

「唉⋯」宋千辰放低手機，指尖仍然掂住螢幕，另一隻手放喺被上，握住梁玥嘉嘅手，「瞓啦⋯」



「嗯⋯」梁玥嘉點點頭，喺合上雙眼嘅同時，手伸到被外，握住宋千辰嘅手

宋千辰睇緊手機時，感覺到梁玥嘉嘅手，稍微抬眼望一望梁玥嘉，臉上掛上淡淡嘅笑容，伸手拉一拉張被，幫梁玥嘉蓋番好被，怕佢會凍親

待到7點幾，梁玥嘉終於瞓著咗，宋千辰細聲地叫咗梁玥嘉一聲，見梁玥嘉冇醒便偷偷地抽回手，將梁玥嘉嘅手放番入被中蓋好，然後輕手輕腳地行出梁玥嘉嘅睡房，順手將房門掩上後便拎埋書包走




IG Link: https://www.instagram.com/nd_cotttoncandy/?hl=zh-tw