［愛情純愛］由嗰一個Kiss開始，我地唔再係青梅竹馬: 109. 反差萌

一個撒嬌、一個笑容，都係可以令宋千辰遷就同心軟嘅原因，梁玥嘉偶爾嘅撒嬌係宋千辰獨有嘅福利

中意一個人，就係會想佔有⋯會霸道、會自私、會呷醋，但全部都係最明顯嘅心意

「都係屋企衫舒服～」梁玥嘉換番屋企衫，手上仍然戴住手繩

梁玥嘉盤着腿坐喺電腦椅上面，打開Macbook，一手托住下巴，一手拎住滑鼠

「點算⋯已經有啲想見佢⋯」梁玥嘉望住電腦Mon，苦惱地講道，「好唔好搵佢？」



先啱啱分開咗半個鐘都未有，梁玥嘉就已經又想見宋千辰

梁玥嘉自己都不禁嘴角上揚，甜甜嘅笑容都代表咗佢中意宋千辰嘅心

「但我咁快就又搵佢會唔會唔太好？」梁玥嘉換咗另一隻手托下巴，手又不自覺地拎起手機想搵宋千辰，「唉⋯宜家咁嘅狀況我點好似平時咁同千辰相處呀⋯！」

梁玥嘉將手機放低，伏低喺枱面，側着頭望住自己嘅手

「我中意你，你又中意我，明明係一件好事嚟，但點解我同你會變得咁尷尬⋯？」梁玥嘉自言自語講道，「因為我欲言又止，講咗半日都講唔到想講嘅嘢？定因為啲咩原因⋯」



梁玥嘉企起身行出睡房，行到去客廳嘅露台前將趟門打開行到去露台吹吹風

「我中意你呀⋯」梁玥嘉細細聲地講道，「識到你真係好⋯」

梁玥嘉一人喺露台沉思，一個人整理一下思緒

「中意一個人好難呀～」梁玥嘉雙手搭喺扶手上，一隻手托住腮

梁玥嘉眺望遠處嘅維港，船隻嘅經過、呢個城市嘅繁華都冇辦法令梁玥嘉嘅心平靜落，畢竟，解鈴還需繫鈴人



「呼～」梁玥嘉伸一個懶腰，「醒晒⋯！」

今日嘅風有啲大，有啲凍，梁玥嘉企咗一陣之後番咗入屋內，比風吹過之後個人好似清醒咗啲

梁玥嘉將趟門閂上，然後行番入房，喺書包中拎出功課放喺書枱上，原子筆嘅筆尖落喺紙上

「係時候認真做嘢啦⋯！」梁玥嘉喺心中鼓勵自己道

⋯

梁玥嘉企喺衣櫃前繫上校呔、著上校裙，打開衣櫃企到全身鏡嘅前面，綁好利落馬尾、戴上手繩，將手繩收埋喺冷衫入面，以最好嘅狀態迎接新嘅一日

「今日天氣好好～」梁玥嘉打開窗簾，望到窗外嘅藍天，心情都自然變得好起嚟

眼見時間差唔多，便孭起書包出門口



「我出門口啦～」梁玥嘉打開家門，踏出門口準備番學

「我出門口啦。」宋千辰喺打開家門前習慣性地講咗一句，然後先再開門

梁玥嘉閂上門同時宋千辰打開門行出嚟，今日依舊同宋千辰喺同一時間出門口，依舊地可以一齊番學，今日依舊係美好嘅一日嘅開始

「早晨～」梁玥嘉微微一笑，小跳步行到宋千辰嘅面前

「早晨。」宋千辰見到梁玥嘉心情好好咁，比佢臉上嘅笑容感染，心情都變得好起嚟

每朝早可以令宋千辰心情好嘅原因，大概離不開梁玥嘉嘅笑容

「嚟緊考試，你幾時開始溫書呀？」梁玥嘉側着頭望住宋千辰



「呢幾日開始㗎啦～如果唔係會溫唔切，你想幾時？」宋千辰回答梁玥嘉

「擇日不如撞日！」梁玥嘉頓時講道，只從佢臉上嘅笑容都可以睇得出佢好開心，「不如就今日放咗學之後一齊溫書呀！」

「好呀！」宋千辰第一時間就同意咗梁玥嘉嘅提議，「反正都要溫書㗎啦～早啲遲啲都一樣。」

梁玥嘉嘅眼尾忽然間瞄到宋千辰嘅衣領冇整理好，後面嘅位置反咗上嚟，梁玥嘉直接就行到去宋千辰嘅身後，伸手幫佢整理好衣領，將校呔收番入去衣領下

「做咩呀？」宋千辰對梁玥嘉嘅舉動感到有啲疑惑，便望向再次行番去佢身邊嘅梁玥嘉

「你個衫領啱啱反起咗，幫你整番咋嘛～」梁玥嘉微笑道

「係咩？」宋千辰伸手摸摸自己嘅衣領

「哈～」梁玥嘉見到宋千辰嘅嘅舉動時笑咗出嚟，「你仲摸啲咩呀？我幫你整好咗啦！冇反起啦已經！」



「哦⋯」宋千辰尷尬地笑咗一笑

「咦？」梁玥嘉今次望到宋千辰嘅書包前隔嘅拉鍊打開咗，又不禁笑起嚟，「你個書包拉鍊未閂好。」

梁玥嘉自然地又伸手幫宋千辰將書包拉鍊拉番埋，宋千辰又尷尬地笑了笑

「你今日做咩呀？大頭蝦嗰個變咗係你啦！」梁玥嘉笑道，「你唔夠瞓呀？琴晚好夜瞓咩？」

「唔係，只係今日遲咗起身⋯」宋千辰無奈地望住梁玥嘉，臉上仍然掛住尷尬嘅微笑

「平時都係你照顧我，今日你咁樣好可愛～」梁玥嘉毫不掩飾地自己嘅想法講道，宋千辰頓時紅了耳根

「邊有人會話男仔可愛㗎？我又唔係小朋友⋯」宋千辰面對住梁玥嘉嘅「讚賞」，臉頰都不禁泛起淡淡嘅紅霞，「只係因為趕住出門口⋯」






IG Link: https://www.instagram.com/nd_cotttoncandy/?hl=zh-tw