［愛情純愛］由嗰一個Kiss開始，我地唔再係青梅竹馬: 108. 自責

聽到宋千辰嘅說話，梁玥嘉嘅心裏有種難以言喻嘅感覺，眼見自己令宋千辰唔開心，但宋千辰仍然為佢著想，心中有啲感動亦有啲內疚

「番去啦。」宋千辰望一望手中拎住嘅鎖匙，然後再一次望向梁玥嘉

「你真係冇嬲我⋯？」梁玥嘉問道

「冇嬲。」宋千辰無奈一笑，輕輕搖頭，「唔開心一定有，但冇嬲⋯嬲唔落⋯」

梁玥嘉伸手攬住宋千辰，感覺到宋千辰溫柔地回擁，喺佢嘅懷中，感覺到嘅除咗溫暖，仲有滿滿嘅安全感





「我知你點諗，但我更加想喺你準備好嗰陣，聽到你親口答我⋯」宋千辰心中講道，由梁玥嘉嘅反應中，佢已經知道梁玥嘉嘅答案，但佢想佢喺更好嘅狀態下先回答

梁玥嘉聞到宋千辰身上嘅香味，大概係因為洗衣液嘅味道仍然殘留喺校服上

「你點解對我咁好⋯我令你唔開心，你點解仲咁遷就我⋯」梁玥嘉稍微抬起頭斜望上去，望住宋千辰問道，「除咗係因為我地係青梅竹馬之外⋯」

「因為我淨係想遷就你一個。」宋千辰毫不猶疑地回答

梁玥嘉一時間唔知道要比咩回答，只好再次耷低頭





「你要攬到幾時？」宋千辰不禁笑問道，微微低頭望向將額頭靠喺佢膊頭上嘅梁玥嘉

「嗯⋯」梁玥嘉不自覺地就用咗撒嬌嘅語氣

宋千辰無奈一笑， 手放到梁玥嘉嘅後腦勺，梁玥嘉抬起頭望住宋千辰

「嘻⋯」梁玥嘉笑了笑，宋千辰因為佢嘅笑容而揚起嘴角

「仲笑⋯」宋千辰無奈地講道，然後鬆開咗攬住梁玥嘉嘅雙手，「放手啦，要番屋企啦。」





梁玥嘉緩緩鬆開雙手，抿一抿唇，轉身朝屋企門口行去

「拜拜⋯」梁玥嘉拎住鎖匙，企喺門口前回頭望向宋千辰

「做咩咁嘅表情？」宋千辰比梁玥嘉依依不捨嘅表情逗笑，「我地住隔離咋嘛！又唔係隔咗個維港！」

「嗯⋯」梁玥嘉微微點頭，「咁聽日見啦⋯」

「嗯。」宋千辰推門行入屋

宋千辰閂上大門，除咗鞋，行番入房，坐喺床邊，拉開桶櫃拎出嗰個禮物盒

「睇嚟有排都比唔到佢啦⋯」宋千辰望住手中嘅盒無奈地講道，「不過無論點都好，我唔會改變就得啦⋯」

梁玥嘉番到屋內閂上門，腦海中全都係啱啱同宋千辰一齊嘅畫面，喺佢眼中，宋千辰係為佢考慮而寧願自己一個人唔開心





「點解我要表現得咁猶疑⋯！明明佢中意我，我開心先係⋯明明我咁中意佢⋯」梁玥嘉不解地問自己，「梁玥嘉呀梁玥嘉，你睇下佢幾為你著想呀～你睇下你令佢幾唔開心、幾失望⋯」

梁玥嘉番到睡房，企喺衣櫃前將長袖冷衫除落嚟，望住戴喺手上嘅手繩默默地嘆咗一口氣

「梁玥嘉，你點解唔堅決啲咁同千辰講你都中意佢？」梁玥嘉望住手繩問道，「講一句中意，有幾難？佢就喺眼前啦⋯」

梁玥嘉有啲討厭自己嘅猶疑不決，見到宋千辰嘅苦笑同失望表情後就更加覺得咁樣嘅自己好討厭

「好討厭⋯」梁玥嘉喃喃自語道，「咁樣嘅自己⋯」

宋千辰將校呔左右各拉咗兩下同時向下扯，將呔扯鬆，向後灘到床上，腦袋空白一片，放喺褲袋嘅手機忽然一震

梁玥嘉：令你唔開心對唔住⋯





宋千辰望住梁玥嘉send過嚟嘅message無奈地笑咗一笑

宋千辰：唔緊要，我明白

梁玥嘉望住宋千辰嘅回覆，心揪咗一下

「咁你明唔明，我有幾中意你⋯」梁玥嘉望住手機螢幕問

梁玥嘉：嚟緊考試一唔一齊溫書？

宋千辰：好

梁玥嘉：咁我地會唔會同以前一樣？

宋千辰：會





「邊有可能會⋯」 宋千辰輕輕一笑，「如果會同以前一樣，咁我又點會中意你⋯」

宋千辰鎖上手機螢幕，望住天花板，然後緩緩地合上雙眼

腦海中浮現出嚟嘅，全部都係梁玥嘉嘅一顰一笑，梁玥嘉嘅笑容好有感染力，對佢嚟講更加係特別強，每次見到梁玥嘉嘅笑容，宋千辰都會不自覺地揚起嘴角

每次同梁玥嘉對上眼時，梁玥嘉都會笑一笑，嗰個羞澀嘅笑容更令宋千辰心癢難耐， 心動嘅感覺就係最神秘嘅表白方式




IG Link: https://www.instagram.com/nd_cotttoncandy/?hl=zh-tw