［愛情純愛］由嗰一個Kiss開始，我地唔再係青梅竹馬: 105. 冷淡

宋千辰企喺大門後，無力地背靠着大門企，提手蓋喺雙眼前，剛才努力壓抑着嘅失落感同難受一下子從心底湧出嚟

呢種反差嘅感覺，心臟都要受不了⋯

⋯

夜幕降臨，外面再燈火通明嘅街道都似乎同梁玥嘉無關

梁玥嘉坐喺緊貼床邊嘅窗台上，望着窗外嘅街道發呆



「千辰好似，好唔開心⋯」梁玥嘉喺內心世界裏講道，一字一句都係後悔、內疚的，「都係因為我⋯如果我有講出口，係唔係就唔會變成咁⋯？」

宋千辰苦笑嘅表情喺梁玥嘉嘅腦海中揮之不去

梁玥嘉好清楚咁打從心底知道，自己的而且確中意宋千辰，同時亦打從心底知道，係佢令宋千辰唔開心⋯

「千辰都開口問我啦，點解我唔答佢⋯？」梁玥嘉反覆地問自己呢個問題，「我點解，會咩都冇講⋯？」

梁玥嘉不解地問自己，佢都唔知點解自己會咩都冇答到⋯佢望向放喺一旁震咗好耐嘅手機，但佢完全冇心情去睇message



「佢係唔係對我好失望⋯？」梁玥嘉獨個自胡思亂想，但正正就係因為佢在乎宋千辰，所以先會亂諗嘢，「宜家點算好⋯？」

梁玥嘉拎起手機send咗個message比宋千辰，望住訊息旁邊嘅雙灰剔，梁玥嘉嘅內心就更加忐忑

「佢會唔會真係嬲咗我⋯」梁玥嘉望住手機螢幕問道，默默地抱着雙腿，側着頭望住仍然係雙灰剔嘅message

梁玥嘉望向窗外，但街道上嘅明亮照唔入佢嘅心，佢嘅心裏記掛住隔離屋嘅人

宋千辰鬆手嘅一刻，梁玥嘉抬頭望佢，映入眼簾嘅係宋千辰強擠出嚟嘅笑容⋯笑容嘅背後，係唔係藏咗一份失望⋯？



梁玥嘉嘅心係後悔，後悔冇講到心底話，縱使千言萬語在心頭，但就喺想回答嘅一刻一隻字都講唔出，佢揀咗沉默

呢個夜晚好寧靜，悔意、寂寞、孤單⋯喺寧靜中無聲無息地滲出，中意一個人明明咁簡單，但點解又會咁難⋯？

梁玥嘉獨個兒坐喺窗邊沉思着，思考着每一個問題，但宜家就算搵到答案，都難以忘記剛才嘅每一幕

⋯

梁玥嘉都唔記得自己係點樣瞓着，只知道當佢再睜開眼時，就已經係鬧鐘響嘅時候

「佢仲未睇呀⋯」梁玥嘉拎起手機，一大堆嘅通知訊息中卻冇一個係宋千辰send過嚟，梁玥嘉嘅心裏不禁有啲失望

梁玥嘉換好校服、梳洗好之後就拎堆書包出門口，打開打門時見到斜對面嘅單位門前企咗一個人

宋千辰背貼着牆企，梁玥嘉有啲意外宋千辰今日會等埋佢番學，佢以為宋千辰今日會好似佢咁選擇逃避⋯



「早晨⋯」梁玥嘉行到宋千辰嘅面前，宋千辰眼尾嘅餘光中見到梁玥嘉走向佢，便企好起嚟

「早晨。」宋千辰就好似平日一樣微微一笑，然後轉身就行去升降機門前等着

梁玥嘉跟喺宋千辰嘅身後，今日嘅佢企喺宋千辰嘅身旁，有種唔自在嘅感覺

宋千辰一直都冇講嘢，只係耷低頭望住手機

梁玥嘉盯着宋千辰嘅手腕，想睇下佢今日有冇帶手繩

「做咩？」宋千辰留意到梁玥嘉一直望住佢

「冇⋯」梁玥嘉抬頭望住宋千辰，尷尬一笑後搖搖頭



宋千辰又再次耷低頭繼續睇手機，梁玥嘉亦耷低頭鼓起兩泡腮

梁玥嘉行喺路上時，唔小心比路面上凸咗出嚟嘅地磚絆咗一下，梁玥嘉向前傾，下意識就伸手捉住宋千辰嘅前臂

宋千辰眼明手快地側身並伸出另一隻手擋喺梁玥嘉嘅腰前將佢欄腰扶住

梁玥嘉抬眼望住宋千辰同時企番好，宋千辰卻移開了視線，然後將手機解鎖，繼續睇手機

宋千辰發現梁玥嘉唔喺自己身旁，便回頭望

「行啦。」宋千辰微微一笑

梁玥嘉邁步朝宋千辰走，見到宋千辰嘅笑容，梁玥嘉嘅心裏完全提唔起勁開心，或者因為佢覺得宋千辰係強顏歡笑

作為罪魁禍首，邊有可能笑得出⋯？



梁玥嘉一直偷瞄宋千辰，但宋千辰都係若無其事咁睇手機

「佢只係唔想理我咋⋯」梁玥嘉見宋千辰一直喺度睇手機，心裏都大概明白，「千辰！」




IG Link: https://www.instagram.com/nd_cotttoncandy/?hl=zh-tw