［愛情純愛］由嗰一個Kiss開始，我地唔再係青梅竹馬: 106.壞心眼

梁玥嘉忽然叫咗宋千辰一聲，宋千辰嘅視線離開手機嘅螢幕，終於望向梁玥嘉

「嗯？」宋千辰望住梁玥嘉，梁玥嘉同佢對視着

「其實—」「早晨！」

正當梁玥嘉想講出佢想講嘅嘢時，有人一下子從後飛撲向梁玥嘉

梁玥嘉回頭望，見到李穎容同張子萊，張子萊行到宋千辰嘅身旁，李穎容朝梁玥嘉笑了笑



「早晨～」梁玥嘉微笑道

梁玥嘉望咗宋千辰一眼，將本來想講嘅嘢一次過吞番落去

喺李穎容同張子萊面前，就好似咩都冇發生一樣照樣有講有笑

「講唔到比佢知添⋯」梁玥嘉喺心裏講道，佢下意識望咗宋千辰一眼，見到宋千辰同張子萊唔知講緊啲咩，笑得好開心

完咗早會之後，梁玥嘉去locker拎上堂用嘅嘢，見到宋千辰伏咗喺枱上



「今日放學先再同佢講啦唯有⋯」梁玥嘉閂上locker門，轉身朝自己嘅座位行去

梁玥嘉打開schedule book，再過一個星期就係畢業考試，其實呢個考試對梁玥嘉嚟講冇咩意思，就係單純地好似測驗一樣嘅存在，只不過係佔分重啲，直接影響最後一張成績表好唔好睇

「宋千辰，醒啦！」坐喺宋千辰後面嘅霍思傑捉住宋千辰嘅膊頭搖咗兩下，「阿sir嚟到啦！」

「嗯⋯」宋千辰緩緩坐起身，從櫃桶中拎出課本同堂課簿，冇錯，第一堂係數學堂

宋千辰朝梁玥嘉望去，諗起嘅，係梁玥嘉琴日嘅沉默，心裏覺得唔好受



「番嚟嗰陣佢好似有嘢想同我講⋯」宋千辰呢一刻先記起今朝早一齊番學時，梁玥嘉本來有嘢想同佢講，但因為李穎容同張子萊而打斷咗

其實宋千辰唔係特登對梁玥嘉不理不睬，只係宜家到佢唔知可以點對梁玥嘉，畢竟琴日梁玥嘉嘅沉默對佢嚟講係一種無形嘅打擊

今日番學嘅路上，宋千辰感覺到梁玥嘉嘅欲言又止，好似有嘢想同佢講但最後又冇同到佢講一樣，但宋千辰又唔想主動開口問佢，如果唔係梁玥嘉主動想講嘅話就冇意思

「算啦⋯」宋千辰喺心裏道，「佢想講嗰陣就自然會同我講⋯」

宋千辰都唔知道佢咁樣諗係安慰緊自己定係講緊事實

梁玥嘉托住腮聽書，雖然對佢嚟講數學唔係佢擅長嘅科目，但都要努力

「唉⋯DSE唔洗考數學就好啦⋯如果佢係選修科嘅話我一定唔會讀⋯」梁玥嘉望住阿sir喺黑板上寫住嘅公式同解題方法，「雖然成績唔係好差，都係中游位置，但數學太麻煩啦⋯」

聽咗呢題嘅講解後，阿sir又跳咗落下一題，話比時間大家做，梁玥嘉拎起筆，喺堂課簿上寫題



完咗連續兩堂數學堂之後就到咗小息，一放小息，梁玥嘉就拎住數學書同堂課行去locker

行到去locker前時見到宋千辰又伏咗喺枱面

「千辰係唔係唔舒服？」梁玥嘉將啲嘢放入locker時不禁望咗宋千辰一眼

喺放好嘢之後便行到去宋千辰嘅座位前

「你唔舒服呀？」梁玥嘉輕輕拍咗宋千辰嘅膊頭兩下

「少少頭痛⋯」宋千辰坐起身，背脊靠住櫈背整個人斜着坐

「唔夠瞓？」梁玥嘉一臉擔心地問，「洗唔洗飲水？」



「唔洗⋯」宋千辰微微搖頭

「今日放學⋯一齊番屋企⋯？」梁玥嘉試探般問道，心裏緊張又擔心

「嗯⋯」宋千辰點點頭

梁玥嘉耷低頭微微一笑嘅同時，心裏鬆咗一口氣

楊楠恩繞過最後嘅枱櫈，打算去搵梁玥嘉

「呀⋯」楊楠恩比宋千辰隔離位打鬧緊嘅人唔小心一撞，整個人撞咗落宋千辰度

宋千辰輕輕皺起眉頭，梁玥嘉亦望住楊楠恩，呆咗

「Sorry⋯！」楊楠恩見到宋千辰板起臉，心裏一震，頓時向宋千辰道歉



宋千辰咩都冇講，默默地企咗起身，離開座位行出課室

「呃⋯我係唔係激嬲咗佢？」楊楠恩一臉擔心咁望住宋千辰離開課室嘅背影

「佢應該冇嬲嘅⋯」梁玥嘉同楊楠恩一樣，望住宋千辰嘅背影，「可能只係因為佢唔舒服啫⋯」

梁玥嘉望一望楊楠恩，啱啱楊楠恩撞落宋千辰度嘅時候嚇到心都離一離，但主要原因並唔係因為擔心楊楠恩跌親或者整親⋯

「嚇死我⋯好彩佢係撞到千辰，幾驚佢下意識攬住千辰⋯」梁玥嘉喺心裏鬆一口氣講道，「不過睇嚟千辰比佢咁樣一撞，即刻就心情唔好啦～」




IG Link: https://www.instagram.com/nd_cotttoncandy/?hl=zh-tw