［愛情純愛］由嗰一個Kiss開始，我地唔再係青梅竹馬: 104. 失望而回

「唔避我啦？」宋千辰臉上掛上淺淺嘅笑容

「你都捉住咗我咯⋯」梁玥嘉帶着泛起淡淡紅霞嘅臉頰，細聲地回答宋千辰嘅問題，「仲點避啫⋯」

宋千辰不禁揚起嘴角，由梁玥嘉嘅表情已經可以睇得出佢好誠實，就算嘴上冇講出口，但行為同表情都令佢嘅心情同想法表露無遺

「你笑咩⋯」梁玥嘉面露不悅地鼓起兩泡腮問宋千辰

「笑你可愛。」宋千辰直話直說，估唔到梁玥嘉嘅臉頰更紅，「你都避咗我一日啦，仲要避幾耐？」





兩個人就好似嗌完交嘅情侶一樣，女朋友唔見個男朋友，男朋友只好主動氹留女朋友似的

「避到我知點面對你囉⋯」梁玥嘉撇開臉，細細聲咁講道

「咁你幾時先知？」宋千辰就好似唔比機會梁玥嘉思考一樣，頓時問道

「我點知⋯！」梁玥嘉抬頭望咗宋千辰一眼後瞬間又耷低頭，撇開臉，「到嗰陣咪知⋯」

「嗰陣即係幾時？」宋千辰又再追問梁玥嘉





宋千辰又再湊近少許，梁玥嘉瞄咗宋千辰一眼，然後又移開視線

「唔知⋯」梁玥嘉臉頰早就紅彤彤的

宋千辰心中嘅甜已經冇辦法再忍住，心底嘅甜透過溢出嘅笑容表達出嚟，佢伸手輕輕地將梁玥嘉攬到懷中，梁玥嘉雖然有啲驚訝，但都冇推開宋千辰

「你呀～做咩咁唔坦誠？」宋千辰笑着問道

「唔明你講咩⋯」梁玥嘉假裝唔明白宋千辰講緊啲咩，「咩唔坦誠，邊有唔坦誠⋯」





「你唔坦誠！」宋千辰笑道，「你明明就中意我，點解唔講？」

「咁、咁你都冇講你中意我啦！」梁玥嘉頓時反駁到，豈料一抬頭就見到宋千辰早就低頭望住佢，好似成功套佢講出心聲一樣嘅表情

「哦～你承認你中意我啦？」宋千辰揚起嘴角

「我邊有！我只係話你冇講你中意我咋嘛！」梁玥嘉傲嬌地講講道，偏唔承認自己嘅心意，口不對心

「咁你琴晚做咩錫我？」宋千辰講嘅所有嘢都只係為呢一個問題作鋪墊

「我⋯！」梁玥嘉頓時講唔出任何說話反駁

宋千辰微微側着頭，望住梁玥嘉，臉上掛着淡淡嘅笑容，梁玥嘉覺得覺自己又比套了話一樣，不服氣地鼓起兩泡腮

「嘉嘉，你中意我？」宋千辰望住梁玥嘉問道，明明心裏已經有答案，但佢更想聽梁玥嘉親口講，「你唔中意我嘅話，做咩錫我⋯？」





梁玥嘉偏偏答唔出，所有字都卡喺喉嚨，根本就冇辦法講出口，佢嘅雙手捉緊宋千辰嘅衣角

眼見梁玥嘉欲言又止，宋千辰心裏有啲失落，明明行動都表達咗出嚟，但梁玥嘉卻唔承認⋯宋千辰感覺等咗一整日、比人無視咗一整日之後但最後都係失望而回

「我仲以為⋯嘉嘉會講心底話⋯」宋千辰嘅內心都失望地講道，「我都察覺到佢中意我啦⋯點解嘉嘉唔肯承認⋯？」

「我等緊啲咩呀到底喺度⋯」梁玥嘉捉住宋千辰嘅衣角冇放手，喺心裏默默地反問自己，「千辰都問到出口啦！我琴晚都聽得出千辰係中意我啦！我做咩唔講嘢！」

兩個人一直僵持着，梁玥嘉唔出聲，宋千辰亦冇講嘢，幸好佢地住嘅呢度一層四戶，只係A、B室同C、D室之間隔咗一個防煙門，即係其實C、D室要喺另一邊搭升降機先上到去，所以冇人會見到佢兩個宜家嘅尷尬畫面

宋千辰一直冇出聲，彷彿等待着梁玥嘉嘅回答一樣，但啱啱梁玥嘉冇回答、宜家又揀咗沉默，已經令宋千辰嘅心裏默默地失望咗兩次，佢都唔知自己仲喺度等緊啲咩⋯

宋千辰微微低頭望咗梁玥嘉一眼，見梁玥嘉冇回答意欲一樣嘅模樣，宋千辰鬆開雙手，臉上掛上微笑，但微笑冇辦法掩蓋佢內心嘅失望





梁玥嘉感覺到宋千辰鬆開手時，抬頭望向宋千辰嘅表情裏夾雜咗難以言喻嘅心情，見到宋千辰嘅苦笑時，梁玥嘉嘅心不禁刺痛咗一下

「好啦，都晏啦⋯」宋千辰開口講道，臉上嘅笑容完全係強擠出嚟，強顏歡笑嘅狀態，「聽日仲有test，要番去溫書啦～」

梁玥嘉聽到宋千辰嘅說話，心裏更難受，佢知道宋千辰唔想逼佢，亦唔想佢覺得尷尬所以先咁講，好讓佢地兩人都唔洗再停留喺尷尬之中

宋千辰輕輕地推開梁玥嘉捉住佢衫角嘅雙手，梁玥嘉抬眼，一臉抱歉地望住宋千辰，但宋千辰深呼吸，好似努力地壓抑住啲咩一樣，然後微微一笑

「番去啦⋯！」宋千辰微微一笑後轉身走向家門口，宋千辰頭也不回地開門，然後閂上門

梁玥嘉望住A室緊閉着嘅大門，雙眼泛起淚光，佢後悔，啱啱自己咩都冇講








IG Link: https://www.instagram.com/nd_cotttoncandy/?hl=zh-tw