［愛情純愛］由嗰一個Kiss開始，我地唔再係青梅竹馬: 103. 攔截

楊楠恩耷低頭繼續食嘢，想拎起水杯嘅同時，唔小心撞跌水杯，杯中嘅水倒出，沿住枱邊流

「呀！」楊楠恩下意識叫咗一聲，然後企起身

宋千辰同梁玥嘉都頓時回過神，望向楊楠恩，李穎容迅速地將水杯立起，但佢嘅校裙都係濕咗少少

「有冇整到你呀？」楊楠恩第一時間關心李穎容道

「冇事冇事～」李穎容擺擺手，伸手撥一撥裙濕咗嘅位置



「哼⋯嘉嘉你唔理我呀，好⋯！」宋千辰望一望梁玥嘉，喺心中不滿地講完之後朝楊楠恩開口講道：「我有紙巾。」

宋千辰正打算從褲袋中拎出紙巾，梁玥嘉聽到之後比飛更快一樣拎出紙巾，仲要抽咗一張出嚟遞比楊楠恩，打斷宋千辰嘅動作

「楠恩，tissue。」梁玥嘉將紙巾遞比楊楠恩，楊楠恩以為係宋千辰嗰包，高興地接咗梁玥喜遞比佢嘅紙巾

宋千辰耷低頭偷偷一笑，梁玥嘉心裏鬆咗一口氣

食完飯之後，佢地一齊番學校，梁玥嘉刻意唔望向宋千辰，因為一望宋千辰就會諗起琴晚自己主動錫咗佢一啖嘅事



番到學校之後就好似平時一樣，因為未夠鐘上堂所以大家圍埋一齊吹下水咁

梁玥嘉同宋千辰喺其他人睇起嚟好似冇咩事一樣，但實際上佢同宋千辰之間嘅尷尬就只有佢地兩個人知道

宋千辰坐喺梁玥嘉嘅枱邊，梁玥嘉側着身子坐，剛好就完美迴避咗宋千辰，梁玥嘉嘅反應宋千辰都睇喺眼內，佢嘅心當然唔會好受，但佢又冇辦法有機會單獨同梁玥嘉講嘢，因為梁玥嘉一見到佢就會自然地避開

「明明比人錫嗰個係我呀⋯」宋千辰喺心裏無奈地笑了笑

面對梁玥嘉嘅完美迴避，佢都唔知可以講咩，只可以一笑置之



梁玥嘉一整日都迴避着宋千辰，見到宋千辰朝自己行過嚟，心臟已經狂跳；唔同佢講嘢、唔望佢，什至放學都唔同佢一齊走，宋千辰雖然深感無奈，但佢都只好一個人番屋企

梁玥嘉同李穎容一齊走，一個人番到屋企大堂行入升降機後，心裏有種難以言喻嘅感覺

「我就咁樣就避咗千辰一日⋯」梁玥嘉喺番屋企嘅路上時，心中道，「千辰會唔會唔開心？我會唔會好刻意⋯但我又真係唔知點樣面對佢！」

每當只有佢一人嘅時候，佢都會諗起宋千辰，正確嚟講係自己對宋千辰做咗嗰個衝動嘅行為

「呀⋯唔好再諗啦！」梁玥嘉大叫道，幸好升降機入面只有佢一人，佢先可以咁樣將壓抑咗一日嘅嘢大叫出嚟，「點解我琴晚會錫佢㗎⋯！」

心跳嘅速度又默默加快，每一次心跳加速，都好似認證咗呢份感情一樣

有時梁玥嘉自己都好矛盾，唔想踏出一步，但又唔想睇住宋千辰中意其他人；有時自己都幾慶幸，宋千辰嘅青梅竹馬係佢，佢已經賺咗好多同宋千辰一齊嘅時間

「唉⋯我可以避到幾時⋯？」梁玥嘉喺升降機停喺16 樓嘅同時諗道，「咁樣一直避好咩⋯？」



「叮！」升降機嘅門打開，梁玥嘉喺心裏嘆咗一口氣後行出升降機

一行出升降機之後，梁玥嘉嚇咗一跳，因為宋千辰就企咗喺升降機門嘅旁邊

本來宋千辰以為梁玥嘉會開口問佢企喺度做咩之類，但冇諗到梁玥嘉打微微耷低頭，然後打算直行直過，繼續迴避

宋千辰見梁玥嘉打算從佢面前直接經過，頓時企好起嚟行到梁玥嘉嘅面前

兩人面對面企，梁玥嘉想從左邊走，宋千辰行向右邊擋住；梁玥嘉行去右邊，宋千辰又行向左邊擋住梁玥嘉嘅去路

「你打算避我避到幾時？」宋千辰微微彎下腰問梁玥嘉

「我冇⋯」梁玥嘉心虛地回答，然後移開視線



「你連望都唔望我一眼，仲話冇避我？」宋千辰一臉認真咁望住梁玥嘉，梁玥嘉下意識微微耷低頭躲避宋千辰嘅目光

「你唔好擋喺度啦⋯」梁玥嘉轉移話題同時，往左邊走，試圖迴避宋千辰直接番屋企

宋千辰當然蠢唔晒，就喺梁玥嘉行到宋千辰嘅身旁、快要同佢擦肩而過時，宋千辰一下子捉住梁玥嘉嘅手腕，一手將佢拉番嚟，拉到自己面前

「你、你做咩呀！」梁玥嘉嘅眉頭輕輕一皺，心跳嘅速度瞬間上升，梁玥嘉亦轉動着手腕想甩開宋千辰嘅手

「邊個叫你咁樣避我？」宋千辰輕輕一笑，另一隻手放喺梁玥嘉嘅下巴，順道將佢嘅下巴向上托

梁玥嘉随即同宋千辰四目交投，手腕轉動嘅動作亦漸漸地停咗落嚟，心，開始瘋狂地跳動，感覺就好似快辰失控一樣

「我宜家咪望住你囉⋯」梁玥嘉微微的鼓起兩泡腮，移開視線

宋千辰少有地散發着霸道嘅氣場，平日嘅佢都係随和、平易近人的，但今日嘅佢對梁玥嘉展露出另一面，或者因為，比人無視咗一日⋯？






IG Link: https://www.instagram.com/nd_cotttoncandy/?hl=zh-tw