［愛情純愛］由嗰一個Kiss開始，我地唔再係青梅竹馬: 102. 逃避

梁玥嘉頓時企起身，後退咗兩小步然後頓時向屋企大堂嘅方向跑去；宋千辰仍然一臉愕然地坐喺長櫈上，腦袋頓時思考能力都慢咗半拍似的

「比你剎我一個措手不及添⋯」宋千辰嘅手蓋喺臉上，身子前傾耷低頭，臉頰嘅熱已經係手都可以感覺得到嘅程度

早就臉紅耳赤嘅梁玥嘉飛快地入咗升降機，企喺角落位，雙手掩住臉

「呀⋯！我做緊啲咩呀！」梁玥嘉問自己，佢嘅害羞同不知所措都可以從佢嘅聲線中聽得出嚟

腦海中浮現出剛才嘅畫面，梁玥嘉搖搖頭，想將呢個尷尬又丟臉嘅畫面從腦海中掉走，但可惜佢個腦唔係電腦，唔係將個file拉去垃圾桶掉咗佢或者㩒個delete就可以解決得到嘅事，愈想忘記愈忘不了



「我點解會主動錫佢㗎⋯！」梁玥嘉自己都唔清楚啱啱自己點解會有咁嘅舉動，「梁玥嘉你係唔係痴咗線呀！」

當時間已經去到12點時，梁玥嘉瞓喺床上輾轉反側，久久不能入眠，今晚嘅腦袋格外清醒，但清醒嘅腦袋偏偏咩都唔諗，就係要強逼梁玥嘉諗起佢錫宋千辰嘅事

「哎呀！」梁玥嘉坐起身，撥咗兩下頭髮

雙眼曲起嚟踩着床褥，雙臂交搭着放喺膝頭上，梁玥嘉默默地將頭埋到雙臂之中

「完全瞓唔著呀⋯」梁玥嘉細聲地喃喃自語道，剛才嘅害羞感覺仲未散去



梁玥嘉拎起放喺枱上叉緊電嘅手機，螢幕一亮，下意識就打開IG，想搵宋千辰

「呀⋯我做咩㩒咗入嚟呢度⋯」梁玥嘉望住兩人嘅對話講道，然後直接將手機螢幕鎖上，放回枱上，「宜家咁樣點搵佢⋯」

翌日一大清早，梁玥嘉早早就出咗門口，當宋千辰出門口前睇手機嘅時候，只收到梁玥嘉一個「唔洗等我番學」嘅message

宋千辰獨自一人番到學校，踏入課室嘅瞬間見到梁玥嘉同李穎容傾緊計

「哦～佢番嚟啦～」李穎容細細聲咁同梁玥嘉講



梁玥嘉回頭望，一望向宋千辰，兩人嘅視線瞬間對上，腦海中閃過琴晚嘅情景，梁玥嘉頓時移開視線

差唔多夠鐘落去集隊時，平日佢地六個都會一齊落去，但梁玥嘉見宋千辰同張子萊朝自己嘅方向走嚟時，梁玥嘉頓時拉起李穎容

「穎容，我想落去買支水，你、你陪我呀！」梁玥嘉有啲慌張地朝李穎容講道

李穎容都未趕得切回答，梁玥嘉已經拉住李穎容行出課室

宋千辰眼尾餘光都留意到梁玥嘉落荒而逃一樣嘅反應，心中大概都估到原因

「嘉嘉咁樣係⋯避我⋯？」宋千辰喺心中道

雖然實際上今日喺出門口之前，宋千辰都有諗過今日要點樣面對梁玥嘉先好，心裏或多或少都會有啲尷尬，佢本來以為梁玥嘉最多會好似之前咁，但冇諗過梁玥嘉會直接避開佢，什至連學都唔同佢一齊番

梁玥嘉一直心不在焉地直行，李穎容望向比佢地略過咗嘅小食部，伸手拉住梁玥嘉，梁玥嘉停低回頭望向李穎容



「你唔係要去小食部買水咩？你行去邊呀？」李穎容疑惑地望住梁玥嘉

「哦，係喎～」梁玥嘉笑笑帶過，然後回頭行番去小食部

梁玥嘉行到去收銀處前，朝坐喺度睇手機嘅小食部阿姨講道：「要支水呀唔該。」

阿姨随即轉身從雪櫃中拎咗一支細支裝嘅樽裝水比梁玥嘉，梁玥嘉伸手入裙袋，先發現裙袋裏除咗手機之外咩都冇

「穎容⋯」梁玥嘉轉頭望向喺一旁等佢嘅李穎容，「你有冇$4呀⋯？我唔記得帶錢原來⋯」

李穎容帶着疑惑嘅心行到收銀處前幫梁玥嘉比咗錢，梁玥嘉臉上嘅笑容又漸漸消失，喺李穎容眼中，今日嘅梁玥嘉好似心事重重一樣，心不在焉的

但梁玥嘉轉眼又好似平日一樣同佢有講有笑，梁玥嘉努力地裝作冇事，但佢嘅行為舉動卻出賣咗佢



去到lunch time嘅時候，梁玥嘉依舊坐喺宋千辰身旁，因為李穎容留咗身旁嘅位置比佢坐，但梁玥嘉一眼都冇望過宋千辰，每一次抬頭嘅時候，梁玥嘉都係望其他人，望李穎容、望楊楠恩、望張子萊、望霍思傑，但偏偏就唔望宋千辰

「嘉嘉⋯？」宋千辰試探性地叫咗梁玥嘉一聲，輕輕地用手肘撞一撞梁玥嘉

「做咩？」梁玥嘉有回答宋千辰，只不過係一直耷低頭食嘢，用眼尾餘光望宋千辰咁解

宋千辰心中更感無奈，但更多嘅係難受，佢唔想梁玥嘉避着自己，咁樣躲避要避到幾時？

「嘉嘉？」宋千辰再一次呼喚梁玥嘉嘅名字，梁玥嘉今次終於抬起頭望宋千辰

一抬頭就見到宋千辰直勾勾地望住自己，梁玥嘉頓時移開視線，撇開臉

其他人都滿頭問號，都唔個兩個人之間發生咩事，坐喺李穎容身旁嘅楊楠恩更加難受，總係要望住兩人嘅親密舉動






IG Link: https://www.instagram.com/nd_cotttocandy/?hl=zh-tw