［愛情純愛］由嗰一個Kiss開始，我地唔再係青梅竹馬: 101. 措手不及

「你攰唔攰呀？孭咗我咁耐⋯」梁玥嘉微微側頭望住宋千辰，「你攰嘅話可以放我落嚟先㗎～」

「你隻腳傷咗痛嘛，我Okay。」宋千辰微微轉頭望向梁玥嘉，臉上嘅笑容都特別溫柔

梁玥嘉嘅心覺得好溫暖，被愛護嘅感覺好好，總有佢喺身前面前為自己遮風擋雨一樣 ，凡事都會考慮到自己嘅想法同感受、以自己為優先

「所以我話，你唔可以咁縱容我啦～」梁玥嘉笑咗一笑，心跳嘅速度變得更強烈，「我會任性㗎～」

「你好任性咩宜家？」宋千辰輕輕一笑



「嗯！」梁玥嘉點點頭，「我好任性，因為你縱壞晒！你話如果我之後拍拖，嗰個男仔唔似你咁縱我點算？」

「咁我幫你教訓佢囉～」宋千辰笑道

宋千辰行到便利店門口時，梁玥嘉從宋千辰嘅背上跳咗落嚟，獨自興高采烈地行入7仔，宋千辰跟喺佢嘅身後

「今次你揀啦～」梁玥嘉企喺雪櫃前望向宋千辰

見到梁玥嘉活潑可愛嘅笑容，宋千辰不禁心動起嚟，笑了笑行到梁玥嘉身旁，自然地伸手摸摸梁玥嘉嘅頭



「唔⋯食呢個啦～」宋千辰望住雪櫃中嘅雪糕雪條一陣之後，伸手推開雪櫃門，拎咗一支紅豆雪條

「咁我都要食呢個！」梁玥嘉拎多咗一條紅豆雪條，伸手拎走喺宋千要手上嘅紅豆雪條

「你做咩要同我食一樣啫？」宋千辰不禁笑問道

「諗唔到食咩嘛～」梁玥嘉嘅臉頰忽然泛起淡淡嘅紅霞，移開了視線，「你仲有冇咩想食呀？」

「冇啦，你睇你有冇嘢想食。」宋千辰講道



「生日當然要有蛋糕！」梁玥嘉拉住宋千辰移到去放海綿蛋糕嘅位置，「你要食咩味？」

「朱古力。」宋千辰拎起朱古力味嘅海綿蛋糕遞比梁玥嘉

比完錢之後兩人又番到去屋企樓下，坐低喺長櫈上

「快啲坐低～」梁玥嘉捉住宋千辰嘅手腕，拍一拍身旁嘅位置

宋千辰坐低嘅同時，梁玥嘉撕開咗海綿蛋糕嘅包裝，小心翼翼地將蛋糕拎出嚟

「快啲許個願先！」梁玥嘉雙手捧住海綿蛋糕，遞到宋千辰嘅面前

「吓？唔、唔洗啦～」宋千辰一臉尷尬咁講道

「唔得～」梁玥嘉擺出認真臉，「生日一年一次，要有啲儀式感！快啲！合埋眼許願！」



宋千辰無奈地笑咗一笑，順住梁玥嘉嘅意合埋眼許願

「許完啦！」宋千辰再次睜開眼，只見梁玥嘉雙手捧住蛋糕朝佢甜笑，佢因為梁玥嘉嘅一個笑容而心動着

「你快啲食蛋糕啦！」梁玥嘉將蛋糕遞比宋千辰

「一人一半。」宋千辰將蛋糕分咗一半比梁玥嘉，梁玥嘉將其中一條雪條遞比宋千辰

「嘻嘻⋯」梁玥嘉露出天真嘅笑容，咬咗一啖蛋糕，「今年嘅生日特別呢～」

「最特別係今年啦！食雪條食海綿蛋糕。」宋千辰背脊靠啖櫈背上，已經食完海綿蛋糕嘅佢直接拆開雪條嘅包裝

「特別啲唔好咩？咁樣先會一直記得！」梁玥嘉咬咗雪條一啖



梁玥嘉微微耷低頭，望住自己前後踢着嘅雙腿，呆咗一陣之後突然好似醒起咩咁拎出手機

直接打開IG相機，影咗一張宋千辰嘅相，然後再打上caption：「Have a great and special birthday～」

梁玥嘉望住相中人，感覺就好似自己喺度宣示主權一樣，梁玥嘉嘅嘴角微微上揚，然後㩒綠色嘅close friend標誌

梁玥嘉只顧自己高興，完全冇留意到自己嘅一顰一笑都被盡收眼底，宋千辰望住梁玥嘉嘅笑容時都不禁揚起嘴角

宋千辰不自覺地提起手，摸落梁玥嘉嘅秀髮上，梁玥嘉回頭望向宋千辰，宋千辰只係露出淡淡嘅笑容便將手收回，梁玥嘉微微側着頭望住宋千辰

「嗯？」宋千辰眼尾嘅餘光留意到梁玥嘉直勾勾地望住佢，目光再次落到梁玥嘉嘅身上

「冇嘢呀～」梁玥嘉搖搖頭，整個人向後坐入咗，背脊貼住櫈背，「嘻嘻⋯」

「笑咩？」宋千辰問梁玥嘉笑咩嘅同時，自己都不自覺地笑咗出嚟



梁玥嘉甜笑着搖搖頭，諗起宋千辰啱啱同佢講嘅說話時心裏就覺得好踏實，一切疑幻似真

「奇奇怪怪⋯」宋千辰笑着講道

宋千辰將雪條棍拎喺手中，微微耷低頭，當梁玥嘉再次望向宋千辰時，發現宋千辰已經合起雙眼

梁玥嘉望住眼前嘅男生，不禁望得入神，悄悄地伸出手輕輕地碰咗佢嘅臉頰一下，喺梁玥嘉將手放低之後，梁玥嘉湊近宋千辰，情不自禁地喺宋千辰嘅臉上落下一個吻

宋千辰睜開雙眼，一臉愕然地望住梁玥嘉，但愕然嘅唔止宋千辰，梁玥嘉自己都錯愕地掩着嘴，指尖輕輕地落喺唇上

兩人以錯愕嘅表情對望着，臉頰亦随即滾燙起嚟






IG Link: https://www.instagram.com/nd_cotttocandy/?hl=zh-tw