［愛情純愛］由嗰一個Kiss開始，我地唔再係青梅竹馬: 100. 他的生日

梁玥嘉心中忽然希望時間過得慢啲，呢一刻嘅佢好難受⋯悄悄地收緊嘅雙臂間嘅範圍，將宋千辰攬得更緊

「穎容講得啱⋯如果我早啲同佢講，係唔係就唔會變成咁樣嘅結果⋯」梁玥嘉心中後悔地講道，「明明我早就知道，我地總會有分開嘅一日，但我真係覺得好難受⋯！」

梁玥嘉將宋千辰攬得更緊，心裏更珍惜兩人獨處嘅時間，原來有啲事比佢想像中更在乎

「佢係個點嘅人⋯？好唔好㗎？」梁玥嘉壓抑着內心嘅痛，笑笑口問宋千辰

「佢係個⋯有時好大頭蝦，有時好似天然呆一樣嘅人，喺我眼中佢粗心大意得嚟好可愛，佢好中意笑，笑起嚟好好睇，笑容特別甜。」宋千辰如實相告，「對我嚟講佢係最好，係個好可愛嘅女仔嚟。」



「咁佢知唔知你中意佢？」梁玥嘉追問道

「知掛唔知掛，我都唔知佢知唔知，因為佢有啲遲鈍。」宋千辰不禁笑起嚟講道，心中笑得更厲害，「你睇你都唔知咁，我做咗咁多嘢你都唔明，你話你係唔係遲鈍？」

梁玥嘉感覺到宋千辰笑得好開心，感覺到佢好中意「嗰個女仔」，心中再難受都好都希望宋千辰會開心會幸福

「咁你唔同佢講你中意佢？」梁玥嘉再追問道，「你唔怕佢中意第二個咩？」

「我怕呀，但我都唔知佢係唔係都對我有好感。」宋千辰講道



「咁你唔同佢講佢點知你中意佢⋯？」梁玥嘉講道，佢唔希望宋千辰會錯過嗰個人，「你既然中意佢，唔同佢講嘅話錯過咗咪好可惜囉⋯」

梁玥嘉嘅內心當然一千萬個唔願意將宋千辰讓比人，但宋千辰已經有中意嘅人，佢都唔可以咁自私⋯

「我錯過咗你，但因為我真心中意你⋯所以我唔希望你都錯過一個你咁中意嘅人⋯」梁玥嘉喺心中講道

「錯過一個好中意嘅人的確好可惜⋯」宋千辰微微一笑，故意問梁玥嘉道：「你話係唔係？」

「梗係可惜啦⋯」梁玥嘉努力擠出微笑回答，佢唔想宋千辰察覺到佢嘅異常，一直喺心中同自己講：「佢搵到佢中意嘅人，你要為佢開心⋯」



「咁你話幾時表白好？不如宜家就去搵佢同佢講！」宋千辰靈機一動講道

「吓！宜、宜家？」梁玥嘉一臉震驚，「你講笑咋？」

「唔係呀，行啦！」宋千辰孭住梁玥嘉直接就跑起嚟

「喂！」梁玥嘉不禁將宋千辰攬得更緊，「千辰！」

梁玥嘉簡直覺得不可置信，宋千辰竟然話宜家就去表白，仲要帶埋佢一齊，梁玥嘉都唔知要傷心定要嬲先係

「到底千辰中意嘅人會係邊個⋯？」 梁玥嘉喺心中不禁諗道，「唔知佢會係咩樣呢，佢又會係邊個？可以令千辰咁中意佢⋯」

愈諗得多，梁玥嘉嘅心就愈難受，冇諗到宋千辰已經搵到中意嘅人，仲要係從言語中都聽得出佢有幾中意嗰個女仔嘅程度

宋千辰停咗落嚟慢慢行，梁玥嘉望一望周圍，心裏有啲疑惑



「做咩番嚟呢度呀？」梁玥嘉問宋千辰，因為宋千辰行到番嚟屋企樓下附近嘅地方，「你唔係要去表白咩？」

「哈哈⋯！」仍然喘着氣嘅宋千辰忍唔住笑咗出嚟，梁玥嘉一臉疑惑地望住宋千辰，「你點解可以咁遲鈍㗎？」

「你唔去表白仲話我遲鈍？」梁玥嘉仍然一臉疑惑咁望住宋千辰，腦袋一時間反應唔嚟

「嘉嘉，我做咗咁多嘢，你都唔明咩？」宋千辰反問一句，然後只好無奈地笑着搖搖頭

梁玥嘉靜咗落嚟，佢重新諗一次宋千辰啱啱講過嘅嘢，忽然梁玥嘉好似明白咗啲咩一樣，嘴角悄悄地揚起，笑意中亦帶咗一點甜

「今日係幾號？」梁玥嘉突然間問起日期

「今日？1月6。」宋千辰諗咗一諗之後回答道



「1月6？」梁玥嘉嘅眉頭輕輕一皺，「今日係1月6⋯」

梁玥嘉一直喃喃自語地重複着1月6，總覺得好似唔記得咗啲咩重要事一樣

「呀！」梁玥嘉終於記起今日係咩日子，興奮地拍咗宋千辰嘅膊頭兩下，「今日係你生日呀！」

「今日係我生日咩？」宋千辰自己都一臉猶疑，諗咗一陣之後佢無奈地笑咗一笑，「好似真係。」

「趁我地未番到屋企，可以慶祝埋！」梁玥嘉望住宋千辰，然拎出手機望一望時，「宜家先9半，未過你生日呀！」

其實宋千辰都冇慶祝生日嘅習慣，以前都會有慶祝下，但慢慢大個啦都，覺得慶唔慶祝生日都冇咩所謂，什至對自己幾時生日都冇特別記住，亦都好少同人提起自己嘅生日

「你想去邊呀？」梁玥嘉興致勃勃地問道，「定你想食蛋糕？雪糕都可以㗎！可以去買！」

宋千辰見梁玥嘉咁開心，都唔想破壞氣氛，明明係自己生日，但梁玥嘉比佢呢個壽星仲興奮



「食雪糕啦去！」宋千辰孭住梁玥嘉轉身往反方向行，行番出去




IG Link: https://www.instagram.com/nd_cotttocandy/?hl=zh-tw