［愛情純愛］由嗰一個Kiss開始，我地唔再係青梅竹馬: 99. 遇到了嗎⋯？

梁玥嘉行到玄關嘅鞋櫃前，著上波鞋、將鎖匙同手機袋入褲袋、孭上細斜孭袋出門口

「著短褲唔凍？」宋千辰見到梁玥嘉時第一句便問道

「少少，不過膝頭傷咗，著長褲會痛。」梁玥嘉閂上並鎖上大門，「食咩？」

「你想食咩？我冇咩所謂，你有冇咩想食？」宋千辰聳肩講道

「咁行住先啦⋯」梁玥嘉講道



兩人喺踏出住宅大廈之後真係沿路行，打算見到想食嘅嘢時先入去食，最後兩人都係入咗一間餃子店

「我想食呢個⋯」梁玥嘉一坐低，一打開餐牌望咗兩眼之後就指住一個炸雞小食講道

「好呀，陣間叫。」宋千辰點一點頭後望向手上嘅餐牌，「你睇下你想飲咩食咩。」

「我想飲提子梳打，要食呢個辣餃子。」梁玥嘉講完之後就將餐牌放番喺旁邊，等宋千辰落單

一嚟到宋千辰嘅面前，梁玥嘉好自然地就會變得好依賴宋千辰，或者因為佢好信任宋千辰，知道佢足夠可靠，所以好自然地會依賴咗佢



梁玥嘉罕有地冇睇手機，微微耷低頭，雙眼放喺大腿上；宋千辰見梁玥嘉冇睇手機，佢都冇睇手機，默默地問咗一句：「今日做咩咁唔小心跌親？」

「鞋帶鬆咗因為⋯」梁玥嘉講道，今日嘅佢對住宋千辰好似特別尷尬一樣，連望都冇望宋千辰

「搞咩呀⋯係唔係我做錯咗啲咩⋯？」望住今日有啲不尋常嘅梁玥嘉，宋千辰不禁喺心中疑惑地問道，「嘉嘉今日咁奇怪嘅⋯？」

一整頓飯梁玥嘉都好少出聲，什至好少望宋千辰，佢滿腦子都係今日同李穎容嘅談話內容，佢知道自己係時候主動啲，但佢發現自己始終都係有啲擔心

「嘉嘉，你今日做咩呀？」宋千辰眼見梁玥嘉一直耷低頭，忍唔住開口問道



「吓⋯？」梁玥嘉抬起頭望宋千辰，「咩做咩？」

「你今日怪怪地咁，係唔係邊度唔舒服？」宋千辰擔心地問道

「冇呀⋯」梁玥嘉微微一笑，搖搖頭

「真係冇嘢？」宋千辰再次追問道

「嗯嗯！」梁玥嘉點點頭，笑了笑，「我真係冇嘢～」

梁玥嘉特別中意呢種感覺，宋千辰擔心佢嘅感覺⋯

食完飯之後兩人打算行番屋企，出到店舖門口行咗兩步後，梁玥嘉忽然停咗落嚟，微微彎下腰

「做咩呀？」宋千辰回頭望梁玥嘉



「冇咩⋯只係行嗰陣傷口有啲痛⋯」梁玥嘉擠出笑容講道，「慢慢行應該Okay⋯」

梁玥嘉邁步行，行咗兩步，梁玥嘉面有難色咁停咗落嚟

「你唔好架硬嚟啦！」宋千辰睇唔過眼，回頭走到梁玥嘉面前捉住佢嘅手肘輕輕扶住佢，「你個傷口咁痛你仲架硬嚟？」

「行慢啲應該Okay。」梁玥嘉笑了一笑講道

「呢度離屋企都有一段距離喎！」宋千辰望一望向前方，然後又望回梁玥嘉，「你慢慢行得番去都天光啦！我孭你番去啦⋯」

「但係⋯」梁玥嘉望住宋千辰有啲猶疑地講道

「我唔會陪你行成個鐘，你趁我仲打算孭你嘅時候好決定啦。」宋千辰轉身背對住梁玥嘉半蹲落嚟



梁玥嘉望住宋千辰嘅背影偷偷地笑一笑，然後靠喺佢嘅背上，雙手嘅前臂交搭宋千辰嘅頸前，宋千辰勾住梁玥嘉嘅大腿，穩陣之後就邁步踏上回家嘅話

「我重唔重？」梁玥嘉偷偷一笑後問道，其實佢嘅膝頭根本就唔痛，啱啱嘅都係扮出嚟

「還好。」宋千辰笑了笑回答道，「同細個嗰陣一樣。」

「哈哈！」梁玥嘉比宋千辰逗笑，「邊有可能呀！宜家我一定重過以前好多～」

「放心，我仲孭得起你。」宋千辰一句認真嘅說話，令梁玥嘉再一次動了心

「嗯⋯」梁玥嘉細聲地嗯一聲

宋千辰孭住梁玥嘉一步一步走，梁玥嘉感覺安心又安全

「果然⋯只有千辰先可以令我有咁嘅感覺⋯」梁玥嘉喺心中默默地講道，然後緩緩開口，「千辰⋯」



「嗯。」宋千辰嗯咗一聲，梁玥嘉嘅心跳得更快

「你遇到你中意嘅人未⋯？」梁玥嘉放手一博問宋千辰，一旦問出呢句，就已經代表住佢嘅心聲

面對突如其來嘅題問，宋千辰冇緊張，因為佢早就做好心理準備，只係差一個時機

「嗯⋯」宋千辰嘴角悄悄地揚起，「遇到啦。」

「嗯⋯」聽到宋千辰嘅回答，梁玥嘉嘅心就好似比刀割一樣痛，「你遇到啦⋯」

「嗯，遇到啦。」宋千辰語氣堅定地回答






IG Link: https://www.instagram.com/nd_cotttocandy/?hl=zh-tw