［愛情純愛］由嗰一個Kiss開始，我地唔再係青梅竹馬: 98. 難以越過的線

「未有再拍拖嘅打算⋯」李穎容擠出笑容搖搖頭，「冇心力去拍拖。」

「最近你好似同張子萊都冇火花咁，平日你兩個成日互窒㗎嘛～」梁玥嘉托住下巴講道，「見你兩個最近關係好似好好咁。」

「吓？」李穎容笑咗出嚟，「我唔否認我發現咗佢係一個幾好嘅人嚟，不過我真係冇再拍拖嘅打算住。」

「仲唔行企喺度做咩？未比人踩夠？」

李穎容諗起嗰一日嘅張子萊回頭望佢，嗰一刻嘅張子萊係喺李穎容眼中最型嘅一刻，平日都冇見過張子萊認真嬲起嚟嘅模樣，平日嘅佢總係笑嘻嘻咁，要搵佢認真嘅時間都少之又少



「你幾時開始發現咗佢幾好㗎吓～」梁玥嘉開始咗食花生嘅模式，「吓～」

「上次佢幫我反擊咗一下嘛，嗰次囉。」李穎容側身灘落床，「覺得，原來佢都好似都幾好⋯不過只係單純地覺得佢好啫，唔係心動之類。」

「宜家同將來好難講嘅～可能將來又唔一樣呢～」梁玥嘉微微一笑，「人會變，月會圓，宜家嘅睇法同將來又未必一樣嘅～」

「你講緊你自己呀？」李穎容揶揄道，「你呢句嘢講比自己聽啦！我暫時都冇拍拖嘅心啦，好攰⋯」

「人要向前望～你同佢都分咗手，唔好留戀佢，更何況佢係一個唔值得你留戀嘅人。」梁玥嘉雙手捉住李穎容嘅雙手，鼓勵李穎容



「嗯！冇留戀啦！」李穎容苦笑道

望住李穎容嘅苦笑，梁玥嘉就知道李穎容其實未完住放低，愛得愈深傷得愈痛，一切都係成正比⋯

一段本來以為好地地嘅關係忽然間迎嚟一個巨大嘅轉變，整個心態就喺一瞬間崩潰，就好似雪崩一樣毫無先兆

梁玥嘉伸手搭喺李穎容嘅膊頭上，咩都冇講，李穎容望向梁玥嘉，露出淡淡嘅微笑，然後輕拍梁玥嘉嘅手背，點點頭

李穎容打從心底知道，就算冇咗愛情，佢有著比愛情更珍貴嘅嘢：友情



「你打算幾時真係同佢表白呀？」李穎容轉移話題問道

「有勇氣面對一切嗰一日。」梁玥嘉無奈一笑，「上次聽到佢話我係佢絕不讓步嘅嘢，我真係好心動，心入面真係有股衝動想即刻同佢講我中意佢⋯！」

梁玥嘉托着腮無奈地笑了笑，但佢臉上嘅微笑漸漸地變成苦笑

「好無奈，我好想衝破嗰條青梅竹馬嘅界線，但係我冇勇氣踏出一步跨過呢條線，我其實⋯好怕係我一個人一廂情願，怕一話比佢知我中意佢，我地嘅友誼真係到盡頭⋯」梁玥嘉講出佢心中嘅無奈同卻步原因，「明明我好了解佢先係，可能因為我中意佢啦⋯」

「中意一個人就係要冒住失去一段友誼嘅準備。」李穎容講出一個殘忍嘅事實，「但你既然中意，唔試過又點知唔得？或者佢都中意你呢～唔通你要等到佢有女朋友嘅時候先後悔自己冇試冇同佢講？」

「唔知呀⋯」梁玥嘉直接伏低喺枱面，選擇放棄思考

到咗夜晚嘅時候，李穎容就番咗屋企冇留低食飯，梁玥嘉沖完涼出嚟之後第一時間就係睇手機，先啱啱拎起手機，媽媽就打電話過嚟比佢

「喂，媽？」梁玥嘉接咗電話，將電話放到耳邊



「嘉嘉，你今晚要自己買飯，我仲OT緊呀！」電話裏頭傳嚟梁媽媽疲倦嘅聲音，「爸爸都未放工呀，所以你要自己買飯食啦～」

「嗯，好呀。」梁玥嘉望一望自己嘅雙膝，但都係回答一句好

梁玥嘉喺心裏默默嘆咗一口氣，然後換衫打算出門口時諗起李穎容嘅一句「唔通你要等到佢有女朋友嘅時候先後悔自己冇試冇同佢講？」，然後默默地拎起電話打比宋千辰

「喂？」梁玥嘉先尷尬地打咗一個招呼

「喂？」宋千辰都跟住梁玥嘉一樣打咗個招呼，呢個鐘數打過嚟嘅？唔洗食飯咩？」

「冇飯食⋯」梁玥嘉講完之後又小心翼翼地開口問道：「我打算出去買飯，你呢？未食飯咩？」

「真係咁啱呀～我都冇飯食。」宋千辰無奈地笑咗一笑



「咁，要唔要一齊出去食飯⋯」梁玥嘉罕有地主動邀約宋千辰一齊食飯

「你約我食飯？」宋千辰強壓着內心嘅興奮，盡量地用平靜嘅聲線講道

「咁你食唔食呀⋯！」梁玥嘉嘅臉頰都熱起嚟，心跳嘅速度加快

「好呀，不過你要等我一陣，我換件衫先～」宋千辰講道

梁玥嘉坐到梳化上等待，啱啱主動邀約算係佢鼓起勇氣嘅做法，李穎容嘅一句點醒咗佢一樣，雖然佢一直都知道自己應該主動多啲，但李穎容一句令佢突然間下定決心要鼓起勇氣一樣

「踏出一步都唔係好難啫⋯」梁玥嘉彷彿鼓勵自己一樣自言自語道

拎喺手上嘅手機一震，梁玥嘉随即拎起嚟睇，係宋千辰嘅message

宋千辰：喺門口啦，你出嚟未呀？






IG Link: https://www.instagram.com/nd_cotttocandy/?hl=zh-tw