［愛情純愛］由嗰一個Kiss開始，我地唔再係青梅竹馬: 97. 進展

「你又會咁唔小心嘅？痛唔痛呀？」李穎容望住喺醫療室嘅校務處職員幫梁玥嘉處理緊傷口，因為怕梁玥嘉會怕痛所以同佢講嘢想令佢分心

「可能因為鞋帶鬆咗，唔小心踩到鞋帶⋯」梁玥嘉嘅手緊緊地捉住短褲，表面上仍然笑笑口嘅佢，其實覺得好痛，畢竟擦破咗表皮，「嘶—」

梁玥嘉微微一縮，李穎容企喺一旁，望住梁玥嘉嘅膝蓋上嘅傷，諗起剛才，唔知點解總係覺得楊楠恩份人邊度怪怪地咁，但實際上又講唔出口有咩問題，就係直覺話比佢知呢個人有啲問題

「唔該。」梁玥嘉對幫佢處理處口嘅校務處職員講道，然後小心翼翼地企起身行到李穎容面前，「穎容，我得啦～」

「嗯。」李穎容心不在焉似的，點一點頭，笑咗一笑然後就扶住梁玥嘉行出去，「同佢最近點呀？」



李穎容嘅提問剎梁到嘉一個措手不及，梁玥嘉腼腆一笑，臉頰泛起淡淡嘅紅霞

「都冇點⋯」梁玥嘉下意識回答道

「冇進展咩？」李穎容好奇寶寶上身一樣追問道，「你地成日都見住，點可能冇進展呀？」

「我都唔知算唔算進展⋯但同佢一齊嘅時總會覺得好安心。」梁玥嘉諗起佢喺宋千辰身邊時嘅感覺

「你睇你笑得幾甜呀～」李穎容笑了笑道，「開心就好啦～」



⋯

落堂嘅鐘聲響起，老師準時解散放學

梁玥嘉、李穎容同楊楠恩喺更衣室行出嚟，宋千辰一踏出更衣室，就見到梁玥嘉佢地三人，但佢冇追上去

就喺啱啱宋千辰孭緊書包嘅時候收到梁玥嘉嘅WhatsApp message話比佢知今日唔一齊走

李穎容跟咗梁玥嘉番屋企，兩個人打算久違地講講心事，deep talk一下



「攰死啦⋯」李穎容行入梁玥嘉嘅睡房，梁玥嘉換衫嘅同時，李穎容將運動服嘅短褲除咗落嚟，換咗梁玥嘉遞比佢嘅短褲

兩個人都已經好熟絡，唔介意著對方嘅衫褲，梁玥嘉喺衣櫃拎咗條居家服短褲遞比李穎容，李穎容都唔太在意照樣換上

「呼～」李穎容因為換咗一條舒服啲嘅褲而感覺輕鬆咗，佢坐到床上盤着腿，「繼續啱啱喺學校未完嘅話題，你同佢到底點啫？」

「冇點呀，就係好似以就前咁相處，但又唔係完全一樣⋯」梁玥嘉好努力地解釋，李穎容好專心咁聆聽，「或者因為我中意咗佢，所以我對佢嘅感覺會更加唔一樣，根本好難再好似以前咁對佢⋯」

「你同佢有冇啲咩好似越咗界嘅行為？」李穎容緊張地問道

「唔⋯」梁玥嘉開始回想自己同宋千辰之間嘅行為同舉動，「都有嘅⋯有時就係⋯我都唔知點講⋯！我中意咗佢，咁所以唔多唔少一定會有私心，行為上一定會有⋯」

「咁佢有咩反應？」李穎容問道

「反應呀⋯」梁玥嘉又開始回想，然後笑了笑，「其實有時我都唔知佢嘅反應代表咩，有時佢嘅反應比我嘅感覺就係佢都好似對我有意思咁，但有時又好似平時咁好平常。」



「咁你地宜家一定唔多唔少都有啲變化㗎嘛！佢啲咩表現令你覺得佢好似對你都有朋友以上嘅感覺先？」李穎容追問道，好似愛情專家上身一樣，擺出一副專業嘅模樣

「我成日都覺得佢特別唔中意李子迪！」梁玥嘉如實相告，「之前去溜冰又係，佢覺得我想李子迪教我多啲然後鬧我⋯！係第一次比佢鬧，佢之前都唔會鬧我㗎！」

「好明顯佢唔中意你同李子迪咁close啦！」李穎容無奈地反咗一下白眼講道，「你知你同李子迪幾熟㗎啦！」

「千辰一直都好包容我咩都就晒我，琴晚我同佢出去嘅時候問佢有咩係唔會讓步⋯」梁玥嘉記起琴晚問宋千辰嘅事，李穎容頓時擺出好奇嘅表情，瞪大眼專心地聆聽，「千辰淨係答咗一個字：「你」」

「啪！」李穎容一聽到，頓時拍咗一下手，然後指住梁玥嘉，「佢都咁講啦！一定係有啲嘢！」

「但如果佢只係純粹覺得我係一個好重要好重要嘅人，所以先咁講嘅話，咪會顯得我自作多情囉⋯！」梁玥嘉扁起嘴，微微鼓起兩泡腮，「我有幾次都差啲忍唔住同佢講我中意佢！但最後都係冇講到⋯」

腦海中全都係宋千辰嘅身影，佢嘅身影好似就喺不知不覺間就烙喺梁玥嘉嘅腦海中，當梁玥嘉發現嘅時候，已經太遲⋯



「有時佢講嘅嘢令我覺得我有越線嘅機會，有時又覺得好似平時咁冇咩特別⋯」梁玥嘉苦惱地托着腮，「穎容，你話係唔係就算以前再了解對方都好，一旦中意咗對方，都會開始變得唔了解⋯？」

「唔知，我都冇青梅竹馬⋯愛情呢回事，其實我都唔係做得好好⋯」李穎容諗起自己同Joshua，覺得自己好失敗，「去到最後同佢分手嗰一刻，我都冇諗過佢真係啲咁嘅人⋯」

「但你揀咗同佢講分手代表你理智，趁早分都好呀，唔好浪費青春喺佢度。」梁玥嘉安慰李穎容，「宜家你又有機會可以搵一個好過佢嘅人㗎嘛～」




IG Link: https://www.instagram.com/nd_cotttocandy/?hl=zh-tw