［愛情純愛］由嗰一個Kiss開始，我地唔再係青梅竹馬: 94. 心悅君兮君不知

宋千辰企起身，然後朝梁玥嘉伸手，指一指件外套

「嗱！」梁玥嘉將外套同雪條棍同時遞比宋千辰

宋千辰無奈接過兩樣咗，拎住雪條棍去垃圾桶掉，梁玥嘉小跑到宋千辰嘅身後，企到佢嘅身旁

⋯

「宜家先番嚟嘅？」梁媽媽問道，「一番到嚟就咁啱有飯食啦。」





「啱啱出咗去嘛，我去換衫先！」梁玥嘉邊向睡房去邊講道，聲量漸大，「我食餸得啦！唔要飯！」

梁玥嘉坐到餐枱前面，第一時間係send咗個message比宋千辰

宋千辰沖完涼，頸上搭住毛巾，拎起其中一邊嚟抹仍然濕漉漉嘅頭髮，喺出廳食飯之前，宋千辰先入房拎番手機

「食到飽晒⋯」梁玥嘉send咗一個message比宋千辰，宋千辰like咗梁玥嘉嘅message，行到餐枱前坐低

「呃⋯」宋千辰放低手機望到放喺面前嘅飯量，頓時窒咗一窒，然後拎起飯碗對喺廚房行出嚟嘅楊亦晟講道：「我唔洗咁多飯，喺出面食咗啲嘢先番嚟。」





「你夾落我嗰碗度。」楊亦晟將自己碗飯遞比宋千辰，「你食咩食到飽晒呀？」

「冇，食咗好多小食⋯」宋千辰將飯夾落楊亦晟嘅碗中，自己今晚淨係食半碗就夠

「小食？你會特登出去食小食？」楊亦晟挑眉一笑，以佢對宋千辰嘅了解，宋千辰係唔會特登番咗屋企之後再出去買嘢食

「嗯。」宋千辰有啲心虛咁嗯咗一聲

「哦？少見喎～」楊亦晟嘅笑容意味深長，「同邊個去呀？嘉嘉呀？」





「嗯。」宋千辰望咗楊亦晟一眼，楊亦晟點點頭

「你係咪中意人呀？係就唔好忍住啦～」心水清嘅楊亦晟笑了笑

「你咪理⋯！」宋千辰嘅心事，楊亦晟一眼就睇穿，耳根慢慢地紅起嚟，將飯碗遞番比楊亦晟時都唔望佢一眼，「你唔好同呀媽講，陣間佢唔小心講咗比阿姨聽⋯」

宋千辰口中講緊嘅「阿姨」當然係指梁玥嘉嘅媽媽

「得啦得啦，你老豆我不嬲都好口密。」楊亦晟點點頭，回頭望咗廚房一眼，然後朝宋千辰細聲地講道：「唔快啲出手就冇㗎啦！」

「我都知，咁唔通突然拉住佢同佢講咩⋯？」宋千辰無奈地講道，「而且我未準備好⋯！」

「講緊咩呀？」宋媽媽喺呢個時候行出嚟，「講咩秘密呀？我又要聽！」

「冇嘢。」「冇。」





宋千辰同楊亦晟默契滿分地同時講道

另一邊廂，梁玥嘉食完飯就番房，正坐喺電腦椅上睇手機

「你。」

梁玥嘉諗起宋千辰講出回答時嘅語氣好堅定，一啲猶疑都冇就講出嚟

「到底你諗緊咩？」梁玥嘉托着腮自言自語道，臉上掛着甜甜嘅笑容，「如果你都係中意我，咁就太好⋯！」

梁玥嘉有想確認嘅心，但係冇勇氣去確認，只好一人悄悄地猜測宋千辰嘅心

梁玥嘉拎起手機，然後send咗一個message比宋千辰，宋千辰嘅手機頓時就震咗一震





宋千辰望咗手機一眼，然後拎起手機睇，嘴角不自覺上揚

「下次再一齊去掃街呀！仲有好多好嘢想食！」

「好呀，等你帶路」宋千辰回覆道

望住宋千辰嘅回覆，梁玥嘉心中嘅甜溢出嚟

梁玥嘉忽然伸手打開書枱嘅桶櫃，拎咗一張memo紙同一枝淡粉色嘅軟頭筆，拔開筆蓋，喺紙上寫道：「山有木兮木有枝，心悅君兮君不知」，然後將紙摺成心形

「山有木兮木有枝，心悅君兮⋯君不知⋯」梁玥嘉拎住摺成了心形嘅memo紙，托着腮柔聲讀出剛才寫嘅字，「中意你，真係咁難講出口咩⋯？」

呢個問題，梁玥嘉自己都諗咗好多次，問咗自己無數次⋯「我中意你」，真係有咁難開口講咩⋯？問咗自己無數次嘅問題，每次想要一鼓作氣講出嚟嘅時候，呢四個字都會卡喺喉嚨，講唔出口

「我真係⋯」梁玥嘉拎住memo，伏低喺枱上，側着頭望住手上拎住嘅心形，「唔想再做你嘅青梅竹馬啦⋯唔想再做朋友⋯」





梁玥嘉回想起兩人相識嘅日子、相處嘅回憶⋯一切都好似係命中注定一樣，注定要佢會成為佢嘅鄰居，注定會同佢相處咁多，注定會中意佢⋯

相處起嚟嘅時候，感覺自然又舒適，聽到旁人嘅閒話都唔會覺得尷尬⋯嗰種熟悉嘅感覺一直以嚟都好好，但嚟到宜家呢一刻，「熟悉」成為優勢同時成為最大嘅阻攔⋯




IG Link: https://www.instagram.com/nd_cotttocandy/?hl=zh-tw