［愛情純愛］由嗰一個Kiss開始，我地唔再係青梅竹馬: 95. 手繩

「我以前都一直以為，我地以後都會係呢個狀態⋯」梁玥嘉喺心中默默吐露心聲，「我以為我地⋯我以為我唔會有中意你嘅一日⋯如果我冇應承你做你嘅擋戰牌，幫你拒絕邱凱棠嘅話，我係唔係就唔會好似宜家咁煩惱⋯？」

梁玥嘉苦惱地將頭埋到雙臂之間，佢都唔知道佢宜家可以點做，明明想要一鼓作氣講出嚟，但字詞永遠都卡喺喉嚨，勇氣亦隨之消逝⋯

「煩呀⋯」梁玥嘉有啲嬲自己總係冇勇氣講出心聲，「一句咋嘛！我仲等咩呀！」

⋯

「唉⋯佢真係seen咗我就算呀⋯」楊楠恩拎住手機，盯着喺IG佢同宋千辰嘅對話框，喺最後一個message下嘅一個「seen」





楊楠恩望住宋千辰一隻字都冇覆，心中悶悶不樂的，畢竟自己中意嘅人冇覆自己message，仲要留低一個已讀，會悶悶不樂都在所難免

「唉⋯中意一個人好難呀⋯！」楊楠恩不杯抱怨道，「我點鬥得過梁玥嘉呀⋯」

楊楠恩總覺得梁玥嘉係佢接近宋千辰嘅阻礙，因為佢地兩人實在太熟啦⋯！每次見到宋千辰對梁玥嘉嘅態度時，佢都只可以默默地喺一旁妒忌着，妒忌宋千辰對梁玥嘉嘅唔一樣，對佢嘅關心同細心總比其他人多好多

「我靚過佢，條件又好過佢，點會鬥唔過佢⋯！」楊楠恩自言自語講道，「我都冇嘢差過佢！」

楊楠恩打從心底覺得自己冇嘢比梁玥嘉唔好，什至自己比佢更好





「我會比你見到我嘅好，等你中意我！」楊楠恩滿意地笑了笑

⋯

「唉⋯」頹廢地灘喺床上嘅梁玥嘉嘆咗一口氣

啱啱講到咁厲害，唔知仲以為佢打算即刻就同宋千辰表白，點知原來真係講就天下無敵，轉頭就已經頹廢咁灘咗喺床上面

「哎呀唔知呀！」梁玥嘉忽然發脾氣似的，將手機拎去叉電，然後瞓喺被窩中





當梁玥嘉玥醒過嚟嘅時候，已經係天光、鬧鐘喺度響嘅時候

梁玥嘉坐起身，伸咗個懶腰拉一拉筋，呢個朝早同平日好唔同，因為今日特別精神，可能因為琴晚一早就瞓咗嘅關係，所以今日叉夠電，精神奕奕的

「我出門口啦～」梁玥嘉嘅聲線都係精力充沛的，同平日嘅「我出門口啦⋯」完全唔一樣

梁玥嘉打開屋企大門，居然見唔到宋千辰早早企喺度等佢

「居然未出嚟？」梁玥嘉疑惑地閂上屋企大門，然後行到去宋千辰屋企大門旁邊企，「send個message比佢先～佢唔會未起身呀嘛⋯！」

梁玥嘉嘅message打到一半，啡紅色嘅大門咔嚓一聲打開

「咁早嘅你？少見喎～」宋千辰望到梁玥嘉，有啲驚訝地講道

「咩呀，你遲咋嘛⋯」梁玥嘉望住宋千辰手上拎住嘅長袖冷衫，「你唔著冷衫呀？」





「著呀。」宋千辰將書包除咗落嚟遞比梁玥嘉，「幫我拎住先。」

梁玥嘉接過宋千辰嘅書包，發現佢嘅書包輕飄飄的，入面好似咩都冇裝，得空氣一樣，於是輕鬆地就將佢嘅書包抱喺懷中

「今日又戴住手繩嘅？」梁玥嘉瞄到宋千辰嘅手上戴住手繩，因為冇冷衫遮住手繩，手腕上戴住嘅手繩表露無遺

「一直都有戴住。」著好冷衫嘅宋千辰拉好衫腳同衫袖

「噔啦～」梁玥嘉忽然拉高自己嘅冷衫衫袖，手上戴住手繩，「我今日都有～但今日有PE堂，要除手繩。」

「今日好似考9分鐘同體能測試。」宋千辰淡淡然地講道

「吓！」梁玥嘉頓時驚呼一聲，「今日考！？」





「係呀，上次上堂解散前咪講咗囉，你冇聽到咩？」宋千辰行入升降機

「冇⋯」梁玥嘉搖搖頭，一諗到要做佢最唔中意做嘅嘢佢就已經覺得好攰

⋯

PE堂係最後兩堂，做完熱身就直接進入9分鐘跑嘅考試

平日嘅PE堂都係分開男女上堂，只有考試先會一齊考，而體能考試都會係兩個人一組，其中一人會負責幫先考嘅人數圈或次數

「穎容，你跑先啦～」梁玥嘉同幫佢數圈數嘅拍檔講道，而佢嘅拍檔當然係李穎容

「我先呀？」李穎容望向男仔嗰邊，見到宋千辰行出去男仔嗰邊嘅起點後，回頭對梁玥嘉細聲地講：「但宋千辰跑先喎～」








IG Link: https://www.instagram.com/nd_cotttocandy/?hl=zh-tw