［愛情純愛］由嗰一個Kiss開始，我地唔再係青梅竹馬: 93. 您

梁玥嘉一邊拆開包裝袋，一邊坐低，宋千辰坐低喺梁玥嘉隔離，梁玥嘉將包裝袋塞到宋千辰嘅手中

「哈啾⋯！」梁玥嘉打咗個噴嚏，然後笑了笑

宋千辰見梁玥嘉打噴嚏，頓時就將自己嘅外套除咗落嚟，蓋喺梁玥嘉嘅大腿上

「著裙唔凍就假啦⋯」宋千辰無奈嘅一句卻令梁玥嘉心中覺得暖暖的

「Okay啦Okay啦～」梁玥嘉笑了笑，喺雪條上咬咗一啖，喺朱古力脆皮內嘅係雲尼拿雪糕，「女仔都係貪靚㗎啦～」



宋千辰只係笑了笑，然後抬頭望向已經換上新年裝飾嘅橫梁默默地食雪條

夜晚呢度嘅人流量一般，因為呢度係通向前後街嘅必經之路，而且呢度有地鐵站出入口，所以人流唔會太少

梁玥嘉嘅目光總係會喺不覺自覺間落喺宋千辰嘅身上，當佢回神過嚟時，自己就已經定睛望住宋千辰

「你咁易就人，有冇啲咩你係唔會讓步，唔會就人？」梁玥嘉嘅問題成功令宋千辰將注意力落喺佢身上

宋千辰冇即刻回答，反而輕輕一笑，露出意味深長嘅笑容，梁玥嘉一臉不解地望住宋千辰



「有，不過⋯」宋千辰反問一句，令梁玥嘉怔了怔，「你確定你想知？」

宋千辰帶着意味深長嘅微笑望住梁玥嘉，梁玥嘉一時之間唔知道可以比咩反應，只可以定睛望住宋千辰

「咩意思⋯？」梁玥嘉下意識問道

「字面上嘅意思。」宋千辰見到梁玥嘉愕然嘅表情，覺得好有趣，笑了笑又咬咗一啖雪條

梁玥嘉沉默咗兩秒，然後回答道：「我想知。」



宋千辰心裏對梁玥嘉嘅答覆覺得意外，但只係輕輕一笑，微微點頭

「你。」宋千辰講出一個字，卻係好似致命一擊一樣，令梁玥嘉嘅心跳瞬間快速起嚟，什至整個人嘅神經線都突突地跳動着

宋千辰嘅回答隱晦得嚟又有啲明顯，只差在梁玥嘉明唔明宋千辰嘅回答中深一層嘅含意

看似平靜嘅宋千辰，內心早已緊張萬分，心跳啲速度更加係不在話下，但佢正努力地壓抑自己

梁玥嘉想再追問，想再問一句「你係唔係中意我」，但說話到咗喉嚨卻卡住咗，卻言又止⋯

梁玥嘉手拎住雪條棍，手㩒住喺櫈上，湊近宋千辰，兩人距離好近，可以感覺到因為食完凍嘢而變得涼涼嘅鼻息

兩人靜靜地對望着，宋千辰比梁玥嘉更快移開視線，梁玥嘉甜甜一笑，背脊再次靠喺櫈背上，雙腳放鬆地交叉搭着，悄悄地將頭靠到宋千辰嘅膊頭上

「你都係我唔想讓比人嘅嘢⋯」梁玥嘉喺心中默默地講咗一句，臉上掛上淡淡嘅笑容



宋千辰冇推開梁玥嘉，默默地坐着，手上拎住雪條棍

「我咁樣算唔算係表明心意⋯？」宋千辰喺心裏問道，無奈一笑，「算啦⋯都係唔好再講落去解釋啦⋯今日我已經踏出咗一大步啦～」

梁玥嘉微微低着頭，望住手上拎住嘅雪條棍

「我仲未有勇氣去踏出呢一步⋯」梁玥嘉喺心裏苦笑道，「我都想好似你咁，勇敢咁樣踏出咗一步⋯」

梁玥嘉望住宋千辰嘅手，想抬起手，但卻冇動力去提起⋯明明就咁近啦⋯明明差小小咋⋯點解唔行多一步？

「唉⋯」梁玥嘉不自覺地地嘆咗一口氣，宋千辰頓時轉頭望向梁玥嘉

「做咩嘆氣？」宋千辰問道



「冇咩，就係忽然間想嘆氣囉～」梁玥嘉坐好起嚟，撥一撥頭髮，一臉輕鬆咁笑道

宋千辰笑了笑，冇講嘢

呢一刻，兩人嘅距離係幾咁近⋯？明明對方嘅手都已經喺旁邊，但兩人都冇揀喺今日表明清楚

宋千辰嘅手機一震，自然就拎出嚟睇，梁玥嘉悄悄地盯着宋千辰嘅手機螢幕，手機亮起嘅一刻，梁玥嘉見到係IG dm嘅message

「楠恩send嘢比你嘅？」梁玥嘉一眼就睇得出send message過嚟嘅嗰個account係楊楠恩

「佢琴日reply咗我story。」宋千辰㩒入去對話框，見到楊楠恩覆咗一個心心眼嘅emoji然後再打咗句「勁可愛囉隻兔仔！」

「就睇你覆咩⋯」梁玥嘉悄悄地瞄咗宋千辰一眼

下一個瞬間，宋千辰直接已讀咗楊楠恩嘅message，梁玥嘉愕一愕然，但好快就收起咗愕然嘅表情



「你好衰囉直接seen咗楠恩！」梁玥嘉笑道

「唔想覆，同佢都唔熟。」宋千辰若無其事地講道，然後將手機收起，放番入褲袋中

梁玥嘉耷低頭，偷偷抿着唇嚟強忍着甜到入心嘅笑意

「番去啦～」梁玥嘉喺努力平伏後先再抬起頭對宋千辰講道

梁玥嘉拎起外套，邊將外套對摺邊企起身

「好涼呀！」梁玥嘉企起長櫈前跳咗兩下，一拎起件外套頓時就感覺到涼風到咗夜晚嘅威力






IG Link: https://www.instagram.com/nd_cotttocandy/?hl=zh-tw