［愛情純愛］由嗰一個Kiss開始，我地唔再係青梅竹馬: 92. 曖昧的甜

「點解會覺得麻煩？」宋千辰笑問道，「我不嬲都就你㗎啦～你宜家先察覺到咩？」

「喂喂喂，你唔好借啲意讚自己喎⋯」梁玥嘉stop咗宋千辰，轉眼又笑起嚟，「不過呀，你成日都就住我，會縱壞我！」

「你好壞咩宜家？」聽到梁玥嘉嘅說話，宋千辰忍唔住笑咗出嚟，「好任性咩你宜家？」

「你再成日縱容我咩都就晒我，我就會好任性，就會冇人要，係唔係你負責？」梁玥嘉開玩笑問道

「挽到咁大呀？」宋千辰擺出一副震驚嘅模樣，「咁我由宜家開始唔再縱容你啦！」





「喂！唔得呀！」梁玥嘉即刻捉住宋千辰Hoodies上嘅兩條索繩，「因為你縱容我所以我先會變得任性！你唔可以咁唔負責任！」

「咁我可以點負責任？以身相許呀？」宋千辰無奈地講道，啱啱講完就覺得有啲似曾相識嘅感覺

「有人要我嘅話我又冇所謂呀～睇在我地識咗咁耐，你又幾好嘅份上⋯」梁玥嘉借意講道，同時偷偷地觀察着宋千辰嘅表情

「講到好似我一定會要你咁喎⋯」宋千辰強忍着笑意搖搖頭

「你夠膽唔要！？」梁玥嘉側身微微一跳，腳尖稍微離地，借意輕輕攬住宋千辰，「我咁好你都唔要？以後可能遇唔到㗎啦！」





「法官大人，我冇嘢想講⋯」宋千辰嘅手輕輕放喺梁玥嘉嘅手臂上，另一隻手指一指餐牌，「決定好食咩未呀？」

企喺收銀機前面嘅職員見到兩人嘅互動都不禁耷低頭，偷偷地笑咗一笑

「要嗰個奶酪奶蓋。」梁玥嘉講道，宋千辰便行到去職員面前落單，而梁玥嘉則負責企喺一旁等食

梁玥嘉望住企喺收銀處前嘅宋千辰，不禁露出甜甜嘅笑容，喺宋千辰嘅面前好似永遠都係被遷就被包容嘅嗰一個，其他人唔會將佢縱容到呢一個地步

「千辰對住我有冇唔肯讓步嘅時候呢⋯」梁玥嘉喺心中自言自語起嚟，認真地回想起嚟，然後不禁笑起嚟，「對住李子迪嘅時候⋯」





「笑咩呀你？」宋千辰買完嘢食拎住收據走向梁玥嘉

「冇呀～」梁玥嘉口頭上回答咩事都冇，但卻忍唔住喺心中猜測起嚟：「千辰會唔會都有啲中意⋯我⋯」

宋千辰喺梁玥嘉身旁拎出手機睇，梁玥嘉好奇地探頭望向宋千辰嘅手機螢幕，宋千辰眼尾餘光見到梁玥嘉悄悄地靠近自己偷住手機嘅螢幕，但宋千辰冇阻止，繼續睇手機

就喺呢一刻，梁玥嘉靜靜地望住宋千辰嘅側面，心底裏嗰種「想要跨過嗰條線」嘅衝動忽然出現，心動嘅感覺就好似電流一樣通過全身，每一次望住宋千辰都有一種觸電一樣嘅感覺⋯

愈想伸手去捉住，就愈係冇勇氣伸出手⋯想捉住呢份感覺、想捉住眼前呢個人、想要捉住⋯一切同佢有關嘅事⋯中意一個人，大概就係咁樣嘅感覺

兩人一齊企喺欄杆前等着小食嘅時間，係美好嘅；但人喺眼前但卻唔敢踏出一步嘅感覺，係令人難受嘅⋯

宋千辰忽然一頓，一股重力落喺佢嘅右肩上，呢份感覺係一個瞬間嘅事，但卻無比心動，難以抗拒，心動嘅感覺就係如此簡單；宋千辰小心翼翼地轉頭望向右邊，微風吹過嘅時候，頭髮嘅淡淡香味傳到鼻中，牽動住佢每一條神經線一樣，感覺甜蜜又溫馨

「今日嘅風，好溫柔⋯」梁玥嘉合上雙眼，感受着微風嘅溫柔，伸手將髮絲繞到耳背後，「如果係以前，我嘅心會唔會都同宜家一樣，跳得咁快⋯？」





「有啦⋯」宋千辰望住放喺收銀處嘅蛋糕燒，默默地講道

梁玥嘉抬起頭，宋千辰行到去櫃枱前拎啱啱整好嘅蛋糕燒，梁玥嘉微微耷低頭、輕輕抿唇，用纖幼嘅手指將髮絲向後梳；宋千辰拎起蛋糕燒轉身打算走向梁玥嘉時，見到梁玥嘉嘅一舉一動，忍唔住心動起嚟

今日佢見到嘅梁玥嘉，唔係平日嘅梁玥嘉，好似係全新嘅一面一樣⋯

「嗱，食嘢。」宋千辰將蛋糕燒遞到梁玥嘉嘅面前，梁玥嘉拎咗一支竹籤，拮咗一粒咬咗一啖

「呵⋯呵⋯」因為係啱啱整起，新鮮出爐，所以仲係好熱，梁玥嘉大意咗，一放入口頓時想要吐番出嚟，但基於儀態只可以帶着小跳步，張開口呵氣

「啱啱整起好熱！」宋千辰望住梁玥嘉天然呆一樣嘅模樣，無奈地笑道

「好食好食⋯！」梁玥嘉好快地咬咗兩口，點點頭，「你都快啲食⋯！」





見到梁玥嘉開心，宋千辰都會跟住開心起嚟

梁玥嘉拉住宋千辰周圍去，行下呢度又行下嗰度，食下街邊小食，一齊探索新事物，行下行下就天黑

「我地番到去買雪條食不如⋯」梁玥嘉提議道

「好呀。」宋千辰點一點頭，沒好氣地笑了笑

「嘻嘻⋯」梁玥嘉滿意地笑了笑

兩人一番到去屋企附近就去咗7仔買雪條食，本來宋千辰以為梁玥嘉會想照舊喺7仔食完先番屋企，但今日梁玥嘉拉住佢行到去屋企樓下外面嘅長櫈坐低食








IG Link: https://www.instagram.com/nd_cotttocandy/?hl=zh-tw