［愛情純愛］由嗰一個Kiss開始，我地唔再係青梅竹馬: 91. 遷就

車門打開，有好多人都喺銅鑼灣站落車，當然喺車門外都企咗好多人等緊上車

宋千辰望一望四周，然後又回頭望一望企喺自己身後嘅梁玥嘉，喺車停定嘅同時，宋千辰向後伸手，捉住咗梁玥嘉嘅手腕，梁玥嘉愕然地抬頭，望住宋千辰嘅背影，心中忽然有一股暖意湧出嚟，望住佢嘅背影，心中就有滿滿嘅安全感

宋千辰總會企喺自己嘅身前保護自己，令梁玥嘉覺得只要喺宋千辰嘅身邊就會感覺到安全，手腕傳嚟宋千辰手心嘅溫暖

「佢嘅背影係由幾時開始變得咁高大⋯」梁玥嘉望住企喺自己身前身高快要到180cm嘅男仔不禁喺心中好奇地問道，「明明以前都同我差唔多高⋯」

宋千辰拉住梁玥嘉踏出車廂，一直拉住梁玥嘉嘅手腕行，好多人喺地鐵站裏穿梭，梁玥嘉緊緊地跟喺宋千辰嘅身後



梁玥嘉悄悄地將手挪一下位置，悄悄地將手抽回少許，手心貼上宋千辰嘅手心，喺人群之中無聲無息地牽着手

宋千辰冇察覺到自己已經唔係捉住梁玥嘉嘅手腕，繼續向前行，行到上電梯嘅時候，宋千辰拉咗梁玥嘉一把，將佢拉到前面，自己打算企喺佢嘅身後

梁玥嘉行到宋千辰前面踏上電梯梯級，宋千辰呢一刻先見到原來佢拖住咗梁玥嘉

梁玥嘉側身企，佢完住冇鬆手嘅想法，只係望一望拖住咗對方嘅手然後抬頭望一望宋千辰，想睇宋千辰會有咩反應

「我唔係捉住佢手腕㗎咩⋯？」宋千辰一臉愕然地望住兩人拖實咗嘅手，然後又抬眼望一望梁玥嘉



宋千辰鬆咗手，梁玥嘉默默地收回手，宋千辰望住梁玥嘉收手嘅動作，心裏好想一下子就捉住佢隻手，但手卻提唔起勁一樣

「你想去邊度行？」宋千辰想打破沉默便先開口問道

「唔⋯冇所謂呀～」梁玥嘉諗咗一諗，笑道

「唔係你話想嚟銅鑼灣行㗎咩⋯」宋千辰無奈地道

「但我都冇諗要去邊度！」梁玥嘉笑了笑，然後望一望水牌，「我地周圍行下先啦～」



梁玥嘉同宋千辰隨便喺某一個出口出咗去，但梁玥嘉冇行大商場嘅打算，反而打算行下大街小巷

大街小巷係最容易被忽略嘅地方，同時係最多好嘢嘅地方，梁玥嘉同宋千辰肩並肩咁走，的確冇尷尬，但同時多咗一份心動

因為行路時人會微微左右搖擺，梁玥嘉嘅博頭撞上宋千辰嘅膊頭，梁玥嘉下意識望向宋千辰，宋千辰冇咩太大反應，只係默默地望咗梁玥嘉一眼

宋千辰眼尾嘅餘光望到前方有一個男人推住放滿貨品嘅手推車走向佢地，對方一手推住手推車，一手拎住手機認真地睇

宋千辰微微側身，右手伸向企喺左邊嘅梁玥嘉，捉住梁玥嘉嘅手肘向右邊拉咗一下，梁玥嘉比宋千辰突如其來嘅舉動嚇親，好似失重心一樣跌咗兩步行到右邊

「你做咩拉我呀突然⋯！」梁玥嘉望住宋千辰

「咁大架手推車喺你面前都睇唔到⋯」宋千辰微微抬下巴，望住喺梁玥嘉身旁經過嘅手推車，「四圍望都可以望唔到嘅？」

「咁、咁啱冇睇到咋嘛！」梁玥嘉望一望手推車，然後用委屈嘅聲線對宋千辰講道，「啱啱掛住望嗰邊嗰間嘢食嘛！」



「食咩㗎？」宋千辰朝梁玥嘉手指指住嘅方向望去

「我之前喺Facebook睇到㗎！好似食麻糬蛋糕燒之類。」梁玥嘉興高采烈地講道，步伐都變成小跳步

「麻糬蛋糕燒？」宋千辰一臉疑惑，聽到佢一頭霧水，本來仲想講一句「乜鬼嘢嚟⋯？」，但眼見梁玥嘉咁興奮就講唔出口

「嗯嗯！我地去試下！」梁玥嘉帶着小跳步行喺宋千辰身旁

宋千辰對梁玥嘉有着永遠嘅遷就，本來係純粹出於風度，覺得對女仔要遷就多啲，但宜家嘅遷就，唔只係出於風度，而係想佢開心，因為梁玥嘉開心，宋千辰都會覺得開心

兩人行到去鋪頭前，梁玥嘉抬頭望住餐牌，手拉一拉宋千辰嘅衫袖

「食邊樣好？」梁玥嘉整個人微微向宋千辰嘅方向傾



「你中意食咩就揀咩。」宋千辰對住梁玥嘉嘅時候，語氣都會喺不自覺間變得溫柔起嚟，「我冇咩所謂。」

「你成日都冇所謂嘅～你冇想試嘅嘢咩？」梁玥嘉笑了笑

「咁我想食嘅未必係你想食嘅嗰個，咁我跟你嘅話你咪可以食到你想食嗰個味。」宋千辰冇特別忌諱，因為係事實嚟

「你成日都就我唔會覺得我麻煩咩？」梁玥嘉好奇地問道，佢側着頭望住宋千辰




IG Link: https://www.instagram.com/nd_cotttocandy/?hl=zh-tw