［愛情純愛］由嗰一個Kiss開始，我地唔再係青梅竹馬: 90. 心跳加速！

梁玥嘉寫完最後一個字後放低筆，伸咗一個懶腰

「做完啦～」梁玥嘉忽然覺得成個人輕鬆咗

「做完咪好囉。」宋千辰頹廢地靠着椅背坐，一抹淡淡嘅笑容掛喺臉上

「好悶呀⋯」梁玥嘉忽然抱怨起嚟，將放喺枱面上嘅文具都收番入去筆袋，功課放番入功課file入面

「我做緊咩？」宋千辰反問道，「我宜家唔係同你傾緊電話咩⋯？」





「嘻嘻⋯係呀～」梁玥嘉笑了笑講道，忽然間靈機一動，「想出去行下⋯」

「出囉。」宋千辰嘅回答極簡單，但心中卻諗緊點樣同梁玥嘉講一齊出去行

「你同唔同我一齊出去⋯？」梁玥嘉試探般問道，然後又因為覺得自己講得好似太出面，所以即刻又兜番講道：「我隨口問下㗎咋！你唔出嘅話咁我自己去行下都可以。」

梁玥嘉聽到電話裏頭靜咗冇出聲，緊張地伏到床上將頭埋到被中，實際上宋千辰係因為強忍着笑意所以唔出聲，佢嘅嘴角就喺梁玥嘉問佢一唔一齊出去嘅時候就上揚起嚟

「喂⋯？」梁玥嘉再一次試探般開口喂咗一聲





「嗯。」宋千辰忍着笑意嗯咗一聲，「陣間門口見。」

「嗯！」梁玥嘉頓時坐起身，甜甜嘅笑意溢出嚟，「咁，陣間見⋯！」

梁玥嘉一收咗線之後，頓時將被用力地攬喺懷中，成個人仲要扭咗兩下，甜甜嘅笑意想忍都忍唔住，心跳得好快，呢一刻嘅佢將開心表露無遺

「要快啲換衫⋯！」梁玥嘉稍微冷靜落嚟，然後起身行到去衣櫃前揀衫換衫

梁玥嘉企喺門口著鞋，然後行到去喺鞋櫃旁邊嘅全身鏡前，照兩照睇下自己呢個look好唔好睇，上身著住一件白色嘅稍微鬆身嘅長袖衫，下身著咗一條黑色嘅半截裙，腳上著咗一對白波鞋





「咔⋯」梁玥嘉聽到門外有隔離屋嘅門開聲，頓時孭埋斜孭袋，用「五指梳」梳一梳頭，然後打開大門，見到宋千辰踏出家門，並且閂上大門

宋千辰眼尾餘光見到梁玥嘉行出嚟，下意識朝梁玥嘉嘅方向望去，見到梁玥嘉嘅打扮，宋千辰愣住了⋯

梁玥嘉企喺家門前望到宋千辰愣住了，於是望一望自己嘅打扮

「佢做咩冇反應嘅⋯？唔通唔好睇？」梁玥嘉喺心中擔心地道

梁玥嘉抬眼望向宋千辰，然後努力地扮自信，行到宋千辰面前；宋千辰回過神，同梁玥嘉對上視線

「好、好唔好睇呀？」梁玥嘉心中覺得擔心，但仍然主動開口問宋千辰，「你咁嘅反應，係唔係咁著唔襯我呀⋯？」

「唔係，你著得好好睇。」宋千辰紅了耳根，「只係好少見你咁著⋯」

宋千辰直接行去升降機口，梁玥嘉跟喺宋千辰身後行，等緊嘅時候梁玥嘉嘅雙手輕輕地扣着，微微耷低頭嘅佢偷偷地盯着宋千辰垂着嘅手，雙手突然好似無處安放一樣





「想去邊度行？」宋千辰問道，佢明明企喺梁玥嘉旁邊，但偏偏唔望梁玥嘉

「去⋯去銅鑼灣行下不如！」梁玥嘉嘅身子微微向前傾，側着頭望住宋千辰

「嗯，好呀⋯」宋千辰偷偷地瞄咗梁玥嘉一眼，發現梁玥嘉仍然注視住自己，迅速移開視線，「搭地鐵落去啦，快啲。」

「好呀。」梁玥嘉點一點頭，望住宋千辰突然改變嘅態度心裏有啲疑惑

梁玥嘉不禁望向喺升降機牆身上嘅鏡，將鏡中嘅自己由上而下打量一番，宋千辰亦留意到梁玥嘉嘅舉動

「唔洗照啦，再照嘅話塊鏡都要爆啦！」宋千辰見到梁玥嘉貪靚嘅一面，不禁笑道

「咩呀⋯」梁玥嘉回頭望向宋千辰，然後目光又再一次落喺鏡中嘅自己，「我只係睇下好唔好睇咋嘛，平時好少咁著⋯唔係幾慣⋯」





「都幾好睇。」宋千辰將梁玥嘉重新打量一番後講道，「只係平時你好少咁著所以睇唔慣啫～」

梁玥嘉想聽到嘅，都只不過係宋千辰嘅讚賞，宜家聽到宋千辰話佢著得好睇，都算係達到目的

每次同中意嘅人出去，就算只係落街行下，都會想比對方睇到自己最好嘅一面，悉心打扮一番，希望對方見到自己會有眼前一亮嘅感覺

兩人去到地鐵站，落到月台嘅時候剛好有車，兩人企喺車門邊嘅位置，因為好快就落車

宋千辰企喺梁玥嘉嘅面前，身後嘅人一直逼入車廂，宋千辰踏前咗一小步，微微低頭望向梁玥嘉，梁玥嘉默默地移開視線唔望宋千辰

地鐵開出，車一晃，身後嘅人因為企唔穩而直接撞落宋千辰嘅背上，宋千辰再向次踏多咗一步，幾乎貼上梁玥嘉，梁玥嘉下意識將手搭喺宋千辰嘅腰上，捉緊佢嘅衫角

兩人嘅視線隨即對上，然後又尷尬地迴避

「太近啦⋯！」宋千辰想後退一步，同梁玥嘉保持番合適嘅距離，但身後全都係人，根本冇退路可言





梁玥嘉鬆開手，撇開臉，輕輕抿唇；宋千辰捉住扶手，稍稍瞄向梁玥嘉，氣氛曖昧又親暱，明明靠得好近但卻想悄悄地將心裏嘅愛意封閉起嚟⋯




IG Link: https://www.instagram.com/nd_cotttocandy/?hl=zh-tw