［愛情純愛］由嗰一個Kiss開始，我地唔再係青梅竹馬: 89. 默契

「Miss上堂有講咩？」梁玥嘉嘅腦袋中係空白一片、完全冇關於Miss上堂講解呢題，或者類似題目嘅部分

「有呀⋯係唔係你又掛住發夢呀梁玥嘉？」宋千辰沒好氣地講道，「佢特登抽時間講咗⋯」

「冇聽到⋯」梁玥嘉扁起嘴，「你教我啦！我真係唔識做！」

「你唔明邊度？」宋千辰拎出Bio嘅分裝書放到枱上

梁玥嘉就好似問題兒童上身一樣，不斷拋出問題，宋千辰耐心地一題一題解釋，逐個問題回答



「明未呀？」宋千辰問道

「明⋯」梁玥嘉遲疑地回答，但遲遲都落唔到筆，只係呆呆地拎住筆望住題目

「咁我收線啦，你有唔明再問—」「喂唔好收線住！」

梁玥嘉喺宋千辰想收線嘅同時連忙制止佢

「咩呀？仲有嘢唔明？」宋千辰托住腮，無奈地望住Bio書，「你啱啱都話明㗎⋯」



「我宜家唔明⋯！」梁玥嘉帶上耳機，將手機放到功課前面，「哎呀⋯我望到題目就發現唔明啦！」

「就嚟考試啦，你仲夠膽上堂發夢恰眼瞓⋯」宋千辰輕皺起眉頭，不禁責備梁玥嘉，「明知自己會唔夠瞓就分寸啲早啲瞓啦！」

「我都唔想㗎嘛⋯」梁玥嘉心虛地講道，「你教咗我先啦⋯！」

「唉⋯」宋千辰輕輕嘆咗一口氣，然後又開始替梁玥嘉解答疑難

宋千辰將梁玥嘉唔明嘅地方慢慢地解釋，為咗令梁玥嘉容易明白同記住只好多花啲時間講解例子



其實宋千辰宜家講緊嘅嘢同Miss上堂講嘅例子冇咩分別，只係再加咗啲經過自己理解後嘅分析同解說

有時同齡人解釋嘅同老師上堂解釋嘅明明一樣，但出嚟嘅結果會好唔一樣，老師講解10次都唔明白嘅嘢，同學講一次就點醒咗自己，因為同齡人嘅思維比較接近，所以解釋起嚟都會用大家明白嘅方式解說，令本來困難嘅嘢都會變得簡單起嚟

「宜家明唔明？唔明嘅話仲有邊度唔明？」講解咗好多次嘅宋千辰再次問道

「明啦～」梁玥嘉拎起筆，終於落筆寫喺功課紙上，「識做啦宜家～」

「睇你下次仲敢唔敢唔聽書！」宋千辰沒好氣地講道

「嘻⋯唔敢啦！」梁玥嘉笑了一笑，「嚟緊考試一齊溫書好唔好？」

「好呀。」宋千辰將枱面上嘅書拎開咗，將電腦放番喺自己面前打開

「今日同穎容佢地講起—」梁玥嘉一直講一直講，完全冇收線嘅意欲



佢想同宋千辰分享所有事，同佢分享一切嘅有趣同見聞，內心總有種衝動想將一切都話比佢知同佢分享

「去露營？」宋千辰一手托住腮，一手放喺macbook嘅trackpad上面，「做咩突然有咁嘅想法？」

「想去下囉⋯」梁玥嘉回答道，「而且考完試唔係應該去挽下咩？」

「係⋯」宋千辰都冇得答唔係，就算佢想答唔係，梁玥嘉都會說服到佢答「係」為止，「你啱⋯」

「所以到時一齊去呀～一齊去挽下呀～」梁玥嘉已經好興奮，諗到去挽都已經覺得好開心

宋千辰拎起放喺枱頭嘅禮物盒，無奈一笑，然後將盒放低

「好呀⋯」宋千辰若有所思地回答，然後將禮物盒收到櫃桶裏，「做緊咩呀？」



宋千辰下意識就問咗出口，但佢明明知道梁玥嘉做緊功課⋯中意一個人藏不住，唔止係眼神上、態度上⋯就連從說話裏都藏唔住⋯

「咪做緊功課兼同你講緊電話囉～唔明顯咩？」梁玥嘉不禁一笑問道，「仲要問我嘅？」

宋千辰托着額角，自己都無奈一笑，明明都已經傾緊電話，但仲要好似故意一問咁樣問對方做緊咩

「順口一問啫⋯」宋千辰笑道，「你專心到咩？一邊傾電話一邊做功課。」

「Focus到呀～你當我梁玥嘉係邊個呀！」梁玥嘉自豪地講道，手繼續拎住筆寫，耳仔聽住宋千辰講嘢，「話說呢⋯原來穎容同Joshua分咗手⋯」

宋千辰冇太大嘅反應，佢早就估到李穎容會同Joshua分手，始終女仔可以忍受到自己男朋友周圍撩女仔，反之亦如是⋯

「佢兩個分手都係好事，李穎容睇起嚟都冇咩事呀。」宋千辰淡淡地講道

「都係嘅⋯大家喺唔同嘅世界，繼續一齊都唔會有幸福⋯」梁玥嘉嘅說話喺宋千辰嘅耳中聽起嚟，就好似好有感觸、感同身受一樣



「嗯⋯」宋千辰淡淡地嗯一聲作為佢嘅回答

明明心裏有好多嘢想講，明明想反駁，但最後講出口嘅，只係一個冇意思嘅單字⋯

「如果大家係喺同一個世界⋯咁就好啦⋯」梁玥嘉就好似無意識一樣開口講道，語句之中帶點無奈，苦笑道

喺梁玥嘉苦笑嘅同時，宋千辰都苦笑起嚟，明明有一萬種可以令兩人同時笑起嚟嘅方法，但兩人卻偏偏揀咗一齊「苦笑」，呢種默契，要開心定唔開心⋯？




IG Link: https://www.instagram.com/nd_cotttocandy/?hl=zh-tw