［愛情純愛］由嗰一個Kiss開始，我地唔再係青梅竹馬: 75. 心很暖

梁玥嘉喺再勸喻一番之後就收咗線，但仍然一臉擔心，佢擔心李穎容會自己收埋自己、一個人唔開心

「你宜家再擔心佢都冇用，因為最後決定嘅係佢。」宋千辰眼見梁玥嘉因為李穎容而悶悶不樂，於是便開口講道，「你已經勸咗佢，我都講咗佢想知嘅事實比佢知，最後係點，只有李穎容先可以決定。」

「希望佢做到一個好嘅決定⋯」梁玥嘉細聲地講道

「唔好諗咁多啦，你宜家代佢煩惱都冇意見思，你要做嘅嘢已經做咗。」宋千辰灘落床，將被子拉好為自己蓋好被

梁玥嘉郁都冇郁，坐喺原位默默地望住又拎起手機睇嘅宋千辰



「我地唔會一世都係青梅竹馬，你明嗎？」

喺梁玥嘉嘅腦海中閃出電話響起嚟之前宋千辰對佢講嘅嘢，似懂非懂的⋯梁玥嘉望住宋千辰，宋千辰亦感覺到來自梁玥嘉嘅視線，但宋千辰為咗避免尷尬而選擇繼續側身瞓喺度睇手機

「喂⋯」梁玥嘉喺宋千辰想繼續逃避時拍咗佢一下，宋千辰喺心中嘆咗一口氣，然後望向梁玥嘉，「我地唔會一直都係青梅竹馬，咁，會一直係朋友㗎可？」

梁玥嘉試探般嘅題問，明亮清澈嘅雙眸直盯着宋千辰，宋千辰始終避唔開梁玥嘉一雙清晰嘅眼眸，佢清澈就好似係宋千辰嘅專屬萬有引力一樣

「唔會。」宋千辰默默地講咗一句後便瞬間移開視線，梁玥嘉打從心底感到難以置信



「點解呀？」梁玥嘉瞬間坐起身，爬到宋千辰身旁坐低，雙手捉住宋千辰嘅博頭晃，不自覺便前傾探頭望宋千辰，「你要同我絕交呀？」

「唔、唔係⋯！」宋千辰忽然羞紅了臉頰、耳根紅透，講嘢都口窒起嚟，手都唔禁亂郁，全因佢感覺到有軟綿綿嘅嘢壓喺佢手臂上，「你、你起身先⋯」

「哦⋯」梁玥嘉一頭霧水地坐番起身，但雙手仍然捉住宋千辰，「你將來要同我絕交呀？唔係嘅話⋯咁點解⋯？」

宋千辰冇出聲，只係默默地回頭望咗梁玥嘉一眼後又再次望番手機，然後先開口講道：「你諗下。」

梁玥嘉拎起手機爬上床，側身背對住門口瞓咗喺床上面睇手機，但佢嘅心思根本就唔喺螢幕裏嘅動態，梁玥嘉一點一點嘅心思都落喺宋千辰嘅回答上



「千辰會唔會同我一樣，有啲中意我⋯？」梁玥嘉喺心裏喃喃自語起嚟，喺寧靜嘅睡房中猜度着宋千辰嘅心意

梁玥嘉忽然坐起嚟打開窗簾望向窗外，外面嘅天空高掛着圓圓嘅月亮，梁玥嘉將月亮嘅美影低，配上一句隨意又無關嘅caption：「外面好凍但心好暖」

梁玥嘉回頭並向下望，望向瞓喺地下、完全冇察覺到佢開咗窗簾嘅宋千辰，微微莞爾，然後悄悄地閂上窗簾，再次灘番喺床上

梁玥嘉將手機嘅螢幕鎖上，用尿袋叉電，將電話同尿袋一同放喺書枱上，然後便攬住被子打算瞓

「到底千辰係咩意思⋯」梁玥嘉背對住門口瞓，心中又因為同一個問題而喃喃自語起嚟，「好想知⋯」

宋千辰聽到床上翻來翻去嘅聲音，於是便撐起身子往床上望去，見到梁玥嘉郁嚟郁去，但宋千辰選擇咗當冇事發生，悄悄地瞓番落去，將手機放到一邊叉電，側身灘着

「今晚有啲衝動⋯」宋千辰感覺到今晚嘅腦袋同自己特別衝動，喺完全冇準備嘅情況下就將暗示變得明顯嘅說話講咗出嚟，「但我都只係講緊事實啫⋯至少對我嚟講，嘉嘉已經唔係我嘅朋友⋯」

梁玥嘉同宋千辰不約而同地諗緊同一樣嘢，梁玥嘉一直輾轉反側難以入睡，腦海中浮現出嚟嘅都全都係同宋千辰一齊嘅畫面



唔知灘咗幾耐之後，梁玥嘉悄悄地爬到床邊，從床邊探頭向下望，宋千辰已經瞓著咗

梁玥嘉伏喺床邊，偷偷地伸手輕輕撥着宋千辰嘅頭髮

「你瞓咗啦⋯？」梁玥嘉輕聲地問道，柔柔嘅聲線就好似一份鬆軟、輕飄飄嘅蛋糕一樣，「咁快就瞓著咗嘅⋯」

梁玥嘉嘅指尖輕碰着宋千辰嘅髮絲，宋千辰嘅頭髮有陣陣洗頭水嘅香味，清新又爽朗，同宋千辰嘅個性好夾

「你係唔係同我都諗緊同一樣嘢⋯？」梁玥嘉柔聲地問道，然後深呼吸，用近乎氣音講道：「千辰，我中意你⋯你中唔中意我⋯？」

梁玥嘉望住熟睡中嘅宋千辰，不禁一笑，覺得自己連要表白嘅勇氣都冇，即使係喺咁樣嘅情況下講，心跳都係忍唔住跳得好快

宋千辰動咗一動，梁玥嘉瞬間縮起手，生怕會整醒宋千辰一樣，宋千辰一個翻身變咗平瞓，梁玥嘉見宋千辰只係翻咗個身之後，又不禁甜甜一笑，托住腮低頭望住宋千辰



微弱嘅光線從窗簾嘅縫中滲進房間，只係咁樣靜靜地望住宋千辰都覺得甜甜的

「我中意你，唔想淨係做死一世嘅青梅竹馬⋯但⋯」梁玥嘉輕聲講道，默默地嘆咗一口氣，「但我地之間好似有一條難以跨越嘅線⋯」




IG Link: https://www.instagram.com/nd_cotttocandy/?hl=zh-tw