［愛情純愛］由嗰一個Kiss開始，我地唔再係青梅竹馬: 74. 心碎

「入面全部都係啲曖昧嘅message，嗰啲咩「Babe你瞓未？」之類，我唔知我可以點做呀⋯！」李穎容快要崩潰一樣，無助嘅感覺喺佢心底湧出嚟，「點算呀玥嘉？我、我唔知我可以做啲咩呀⋯我真係覺得好難受，我冇同Joshua講我已經知道，因為我自己都唔知可以點樣解決！」

「點會咁㗎⋯」梁玥嘉心疼李穎容，雖然想講啲咩安慰佢，但佢又唔知道可以講啲咩去安慰，「嗰日你最後係照同Joshua行街？」

聽到梁玥嘉提起Joshua嘅名，宋千辰估到喺電話裏頭嘅人就係李穎容

「嗯⋯如果唔係我可以點呀？」李穎容帶着哭腔講道

李穎容嘅情緒已經接近崩潰，佢已經忍咗兩日、喊咗好耐，但最後都係諗唔通、過唔到自己嗰關，所以決定要打比梁玥嘉訴苦





一直以嚟，李穎容都以為Joshua係因為愛佢而唔會限制佢太多，直到前兩日，李穎容開始懷疑Joshua係因為愛佢面唔限制定因為唔愛佢而唔限制

李穎容坐喺窗邊，偷偷地喺睡房裏啜泣着、用手背抹着眼淚，因為唔想父母聽到佢嘅喊聲而擔心，所以只好努力地壓抑着自己嘅情緒，但正喺呢一個夜裏，佢嘅情緒直接崩潰落嚟

「玥嘉，我唔知我可以點做呀⋯！我唔知呀真係！我要同Joshua坦白定、定係點呀？」李穎容抽泣着嘅聲音令梁玥嘉心疼，「Joshua會唔會係由一開始已經唔愛我？我要點做呀玥嘉？要大鬧佢一餐定係要分手？我唔想分手⋯！」

「穎容呀⋯一次不忠，百次不容⋯佢今次比你斷正，你係親眼睇到㗎⋯唔通你要受住呢一道氣咩？」梁玥嘉輕皺起眉頭講道，「佢根本就係有心要瞞住你嘅！」

「但我真係唔想分手⋯」李穎容講道





「唔係你想唔想分手嘅問題呀宜家，係佢咁樣已經叫背叛咗你，你要忍到幾時？忍到佢真係拖住第二個？」梁玥嘉反問李穎容，「你地之間嘅事我一直都唔會多理，但係佢咁樣已經算出軌啦，佢對唔對得住你？你覺得佢個心真係仲有你咩？你確定佢唔會再犯？」

「我⋯」李穎容比梁玥嘉嘅「三連問」問到口啞啞

「一次不忠，百次不容，佢當你係咩？你係佢女朋友，佢咁樣都做得出，佢有冇尊重過你？」梁玥嘉心裏好嬲，因為李穎容係佢嘅好朋友，佢睇唔過眼Joshua對李穎容嘅背叛，「你唔同佢講你知，佢就會繼續咁做，但我都幾肯定，佢一定會再犯。」

梁玥嘉唔想再拎住電話，所以戴上耳機，坐喺墊褥上叉着腰，本來唔熱嘅佢宜家都嬲到熱

「我唔敢同Joshua講我知⋯」李穎容抽抽鼻子，用紙巾抹眼淚，「我怕Joshua會同我講分手⋯」





「你⋯李穎容，宜家係佢對你唔住。」梁玥嘉皺起眉頭講道

「宋千辰係唔係喺你隔離？」李穎容問道，「佢會唔會知Joshua嘅事？」

梁玥嘉將左邊嘅耳機遞向宋千辰，頹廢地灘着嘅宋千辰爬起身一臉疑惑咁望一望梁玥嘉然後將耳機戴上

「做咩？」宋千辰開口問道

「Joshua出軌。」梁玥嘉見李穎容唔出聲便代替李穎容講，「佢想問你知唔知Joshua嘅嘢。」

「你sure你想聽？」宋千辰緩緩開口問李穎容

「嗯⋯！」李穎容猶疑咗一下然後好似鼓起勇氣一樣回答，「我聽⋯」

「其實Joshua呢，一早就出咗名花心，你同佢一齊之前，其他人都有勸過你唔好同Joshua一齊。」宋千辰淡然地講道，「其實只係你唔知佢同咗你一齊之後仲成日都周圍filrt女，我同其他friend都有勸過佢，畢竟你同佢拍緊拖，佢話佢會停，但一時間好難改，但佢話佢會改，咁我地冇再出聲。」





李穎容本來喺聽之前已經做好心理準備，但佢冇諗過原來Joshua仲有好多事係佢唔知道，鼻子一酸又開始崩潰起嚟，心好難受，難受得窒息一樣⋯

「咁，你自己諗下，你同咗佢講你知佢filrt女之後，佢係唔係真係會改？我地喺佢同你一齊咗冇耐之後就勸過佢好多次，咁你覺得佢係唔係會真係為你而改，如果你話佢係會為你而改嘅話，咁宜家你又會唔會見到佢同其他女仔嘅message？」宋千辰嘅說話一語中的，似利箭一樣直接刺向李穎容嘅心臟，但一切都係事實

「你點睇⋯」李穎容發出微弱嘅聲音，喊到都冇力講嘢一樣

「嘉嘉講得啱，係佢背叛你，你應該為自己諗下。」宋千辰明顯地冇幫Joshua講說話

李穎容冇諗到宋千辰講出嘅事實會係咁重咁狠，比佢預期中嘅重擊重更多；宋千辰同梁玥嘉都冇出聲，佢地知道，李穎容要時間⋯要時間沉澱同冷靜⋯




IG Link: https://www.instagram.com/nd_cotttocandy/?hl=zh-tw