［愛情純愛］由嗰一個Kiss開始，我地唔再係青梅竹馬: 76. 只要在一起

梁玥嘉啱啱刷完牙一邊打呵欠一邊行出廳，宋媽媽見到梁玥嘉出嚟便即刻拉住梁玥嘉

「嘉嘉呀，電力已經恢復番整番好啦。 」宋媽媽講道，「今晚食完飯先番過去啦～嘉嘉想食咩呀？煎蝦餅？瑞士雞翼？定係想食蕃茄炒蛋？」

「嘉嘉先啱啱起身，你就唔好一輪嘴咁問佢嘢住啦⋯」坐喺梳化睇緊新聞嘅楊亦晟都忍唔住開口制止，「人地啱啱先起身咋！」

「嘻⋯」梁玥嘉笑了一笑，「其實食咩都冇所謂，唔洗食外賣已經好好啦！」

「美寶叫咗我好好照顧你㗎嘛～我點會要你食外賣？」宋媽媽笑一笑，然後行到梳化坐低喺楊亦晟隔離



梁玥嘉行到去廚房，拎起一隻玻璃杯酙咗杯水，然後連人帶杯行番入宋千辰間房，坐番喺宋千辰張床上面，坐咗兩秒都唔夠就灘低咗

「你唔好頹廢到咁好唔好？」坐喺書枱前嘅宋千辰無奈地望向梁玥嘉，「真係好頹廢。」

「彼此彼此～」梁玥嘉抬眼望一望宋千辰，一臉輕鬆地講道，但好快地臉色便一沉，「唔知穎容點呢⋯」

「唔知，佢同Joshua嘅事，我地都管唔到咁多。」宋千辰嘅視線停留喺電腦螢幕上，但都係不經意地瞄咗梁玥嘉一眼

「呀～」梁玥嘉好似嘆氣一樣嗌咗一聲，然後拎起手機，有意無意地講咗一句，「拍拖真係好麻煩⋯同愛情有關嘅事都好麻煩⋯」



梁玥嘉有意無意嘅一句說話引起宋千辰嘅注意，宋千辰望向梁玥嘉，梁玥嘉一臉頹廢地灘喺床上面睇手機

「你將來唔會拍拖嘅？」宋千辰假裝不在意地講道，實際上好在意梁玥嘉將會回答嘅內容

「唔知呀～遇到中意嘅人咪試下拍下囉～」梁玥嘉一直望住手機螢幕，但並唔係因為佢好專心咁睇手機，只係因為佢唔想望住宋千辰講

「咁遇唔到呢？」宋千辰一講完，頓時喺心中問自己：「我又喺度講咩呀⋯」

「唔⋯」梁玥嘉猶疑咗一下，佢都唔係冇中意嘅人，只係口咁講啫，「冇嘅話都冇辦法，順其自然囉。」



宋千辰欲言又止，想講嘅說話到咗嘴邊但又講唔出，只好將說話都吞番落去，然後望住梁玥嘉

梁玥嘉察覺到便微微抬眼望住宋千辰，同宋千辰對望着，過咗兩秒，淡淡嘅尷尬感同害羞從心底湧出，兩人不約而同地移開視線

梁玥嘉嘅臉頰慢慢地變得滾燙起嚟，佢察覺到嘅時候，為咗唔比宋千辰見到便頓時將頭埋進枕頭裏

宋千辰對於梁玥嘉嘅舉動感到疑惑，但都冇特別有啲想講，只係默默地戴上耳機

去到晏就嘅時候，本來大家都一直沉默，各自做自己嘅嘢

「呼⋯」宋千辰將耳機除咗落嚟，望向床嘅時候見到梁玥嘉正望住佢

「咕⋯」梁玥嘉嘅肚子叫咗一聲，宋千辰不禁失笑，梁玥嘉嘅臉頰瞬間紅起嚟，尷尬地笑，「嘻嘻⋯肚餓⋯你餓唔餓？」

「咕⋯」梁玥嘉嘅話語剛落，宋千辰嘅肚子都叫咗一聲，宋千辰尷尬地笑了笑，然後撥了撥頭髮，「餓。」



「不如煮麵食～我唔想番過去換衫⋯」梁玥嘉頹廢地講道，「你去煮呀不如⋯」

「你唔去？」宋千辰反問道

「呢度係你屋企嘛！過門都係客！」梁玥嘉坐起身，比佢搵到個理由可以理直氣壯咁耍廢

「冇當你係客，大家都咁熟。」宋千辰托住頭道

「喂呀～」梁玥嘉一個側身灘番落床踢着腿踢着被，「唔要呀⋯」

宋千辰望住梁玥嘉沒好氣地笑起嚟，宋千辰企起身捉住梁玥嘉嘅手腕將佢拉起身

「呀⋯我唔要呀⋯」梁玥嘉捉住張被，好似要誓死痴喺床上一樣



「行啦，你同我一齊去啦。」宋千辰無奈地拉住梁玥嘉嘅手腕，「我煮啦我煮啦，行啦。」

「耶～」梁玥嘉奸計得逞一樣笑道，然後跟喺宋千辰身後行出去行到廚房煮嘢食

「你又知我要食出前一丁嘅？」梁玥嘉企喺宋千辰隔離，望住宋千辰從櫥櫃上拎咗兩包出前一丁落嚟，「咁醒嘅你？」

「我係邊個呀，點會唔知。」宋千辰笑了笑，「太睇少我啦你。」

梁玥嘉稍微抬頭望向宋千辰，宋千辰一臉正經地拎住筷子

平凡而又寧靜嘅下午，令梁玥嘉覺得好自在

同宋千辰一齊好自然，唔需要刻意偽裝，亦唔需要小心翼翼，喺佢粗心大意嘅背後有宋千辰嘅細心溫柔

宋千辰對佢嘅了解令佢覺得好安心，喺佢身邊可以做自己，可以開懷大笑、可以傷心落淚，自己嘅每一面都可以喺宋千辰面前展示，所以感覺自在



「等多陣就有得食。」宋千辰望向梁玥嘉講道

「嗯、嗯⋯」梁玥嘉窒咗一窒，喺宋千辰望向佢嘅一刻，心底有種衝動想拉住宋千辰嘅衣領，掂起腳尖，輕吻一下




IG Link: https://www.instagram.com/nd_cotttocandy/?hl=zh-tw