［愛情純愛］由嗰一個Kiss開始，我地唔再係青梅竹馬: 71. 突如其來

「你有冇事呀⋯？」宋千辰企起身行到去床邊，坐喺梁玥嘉隔離，「做咩撞落去個架度？」

啱啱梁玥嘉企起身，一不小心撞上咗喺宋千辰床尾上方嘅層架，痛得眼淚都快要流出嚟

「你撞到邊度呀？」宋千辰擔心地望住梁玥嘉，伸手幫佢輕力地揉揉

「痛！」梁玥嘉望住宋千辰，雙眼都已經淚汪汪，眼見宋千辰一臉無奈同時又溫柔地幫佢揉着，心中閃過一絲暖意，「我都話千辰你溫柔又可靠㗎啦～」

「對住你唔可靠點得？」宋千辰聽到之後無奈地笑咗一笑，望住梁玥嘉掛喺臉上嘅笑容，心中又不禁認真地道：「我唔係對所有人都溫柔，我對你嘅溫柔，只因為你係特別嘅存在⋯」



「嘻嘻⋯所以我好放心咁依賴你呀～」梁玥嘉天真地笑道

「你真係覺得我係一個溫柔又可靠嘅人⋯？」宋千辰忽然收起笑容，一臉認真地望住梁玥嘉，本來幫佢揉着嘅手喺原位停咗落嚟，「咁你淨係依賴我一個，好唔好？」

「突然間做咩⋯咁講⋯？」梁玥嘉喺心中問道同時定睛地望住宋千辰，同宋千辰四目交投

梁玥嘉唔明白，心裏嗰種唔協調感係因為啲咩，望住宋千辰，佢嘅心就變得難以平靜落嚟

宋千辰望住梁玥嘉，睇得出梁玥嘉嘅緊張，因為梁玥嘉嘅視線都唔敢一直停留喺自己身上



「千辰你溫柔呀⋯」梁玥嘉嘅聲線都微微顫抖着，「唔、唔通呢？而且你一直都係我依賴嘅人呀⋯」

「我嘅意思係，以後。」宋千辰堅定嘅視線同語氣令梁玥嘉心中不禁感到疑惑

梁玥嘉輕輕抿唇，總覺得宋千辰有一種唔一樣嘅感覺，但卻又講唔出到底係邊度唔一樣，邊度唔同咗

「突然間咁講嘅⋯？」梁玥嘉笑了笑，企圖用笑將話題帶過

「你估下。」宋千辰當然唔會比佢矇混過關，佢只係輕輕一笑、講咗三個字



「好似喺同李子迪溜完冰嗰日開始，千辰忽然間就變成咁⋯有啲霸道嘅感覺⋯」梁玥嘉喺心中道，「千辰會唔會都⋯有啲中意我⋯？」

梁玥嘉自顧自地諗完之後，臉頰就淡淡泛起紅霞，佢拎起枕頭放喺身前同曲起嘅雙腿之間，雙手攬住枕頭並將頭埋望枕頭之中

「嗯⋯」梁玥嘉用喉嚨發音一樣嗯咗一聲，緩緩開口

「仲痛唔痛？」宋千辰聽到梁玥嘉嘅回答，嘴角微微揚起，然後柔聲問道，「死蠢⋯」

「少少⋯」梁玥嘉細聲地講道，然後抬頭望宋千辰

一抬頭嘅瞬間，梁玥嘉見到宋千辰輕輕皺着眉頭同時，神情帶點溫柔地輕輕幫佢揉着撞到嘅地方，不禁又心動起嚟

「千辰一直以嚟都係咁，對我好細心好溫柔⋯係唔係因為我成日都好大頭蝦呢？所以顯得千辰特別細心⋯」梁玥嘉冇郁，微微耷低頭不語，「如果換作第二個⋯佢會唔會都係一樣？」

「望住我做咩？」宋千辰感覺到來自梁玥嘉嘅視線，望咗梁玥嘉一眼便問道，嘴角微微上揚



「冇⋯」梁玥嘉移視移開，下巴靠着抱喺懷中嘅枕頭，心中道：「唔小心入咗神⋯」

宋千辰定睛望住梁玥嘉，梁玥嘉抬眼望宋千辰，兩人四目交投，心中泛起陣陣漣漪，有一種衝動，想不顧一切吻上去，但，彼此喺心底裏清楚知道，佢地若然再一次越過界線，佢地就番唔到去以前咁

宋千辰停咗落嚟，然後行番去書枱前坐低，梁玥嘉安靜地望住宋千辰嘅背影，心裏覺得踏實又安心

⋯

「有咩事同我講，我過嚟。」宋千辰企喺門口對梁玥嘉講道

「得啦！囉嗦⋯」梁玥嘉行到去自己家門前，拎出鎖匙開門，梁玥嘉回頭一望，見到宋千辰仲企喺門口，「你唔番入去？」

「等你入咗去先。」宋千辰淡然地講道，梁玥嘉沒好氣地笑了笑，然後推開門入屋



宋千辰眼見梁玥嘉閂咗門之後先入番屋入面，閂上大門

梁玥嘉入到屋內，屋內只有佢自己一個，梁玥嘉默默地嘆咗一口氣，然後開咗客廳嘅廳，番到房嘅時開埋房燈，然後拎埋衫褲去沖涼

宋千辰行番入房，佢爸媽喺廳睇電視，宋千辰都番房睇電腦、戴上耳機聽歌做自己嘢

「屋企好靜⋯」梁玥嘉沖完涼後行出客廳，坐喺梳化上，手上拎住手機

雖然平日放學番到嚟之後屋企都係得自己一個，但去到夜晚呢個鐘數，爸媽一定喺屋企，客廳一定會傳嚟電視嘅聲音同埋爸媽傾計講嘢嘅聲音；宜家都已經11點，屋企仍然係得梁玥嘉自己一個人，佢唔習慣⋯

「今晚開燈瞓啦都係⋯」梁玥嘉心諗，本來就怕黑嘅佢平日唔開燈瞓係因為爸媽喺屋企，但宜家佢爸媽唔喺屋企去咗旅行，已經冇佢唔開住房燈瞓嘅理由，「唉，番房啦⋯」

「咔！」

正當梁玥嘉起身，打算行去玄關閂上廳燈嘅時候，客廳嘅廳忽然一下子自動熄咗，嚇得梁玥嘉成個人都微微顫抖咗一下，企喺原地唔敢郁；同時，喺隔離單位嘅宋千辰都一樣，本來開住嘅房燈突然一下子熄咗



「咩事呀？」宋千辰除低耳機，打開房門打算問爸媽，點知一打開房門，連外面嘅走廊同客廳燈都熄咗




IG Link: https://www.instagram.com/nd_cotttocandy/?hl=zh-tw