［愛情純愛］由嗰一個Kiss開始，我地唔再係青梅竹馬: 70. 冒冒失失的

「陣間過嚟啦～」宋千辰望向梁玥嘉，伸手摸一摸梁玥嘉嘅頭講道

「哦。」梁玥嘉抬頭望住宋千辰，「好呀。其實宜家都可以過嚟，但等我拎一拎電話先⋯」

梁玥嘉好快地入房拎咗手機之後便著住居家服同人字拖踏出門口，隔離屋嘅門開咗一條縫，梁玥嘉入咗屋之後便閂上大門

「我入嚟㗎啦⋯」梁玥嘉直接換上睡拖行到去宋千辰嘅房門前將虛掩着嘅門推開，「你又唔開燈。」

梁玥嘉當宋千辰嘅房好似自己間房咁，應該話對佢嚟講宋千辰屋企嘅每一個角落都好熟悉，梁玥嘉直接就坐咗喺宋千辰嘅床上，拖鞋好似亂踢一通咁一正一反喺地上



宋千辰沒好氣地望咗梁玥嘉一眼，然後推埋房門，然後將身上嘅外套除落嚟搭喺椅背，雙手交叉喺身前捉住Hoodies向上掀，將Hoodies除咗落嚟

「嘩！」梁玥嘉眼尾留意到宋千辰企喺前面背對自己，便打算睇下佢做緊咩，點知一抬頭見到宋千辰除緊衫，上身赤裸着，「你、你做咩呀！」

「換衫。」宋千辰微微轉頭，輕輕一笑，若無其事咁講道

「你唔同我講！？」梁玥嘉用手掩着雙眼，撇開了羞紅嘅臉

「我正打算講話要換衫嘅時候你就直接入咗嚟坐喺床，咁我咪直接除囉～」宋千辰聳肩，然後轉身走向梁玥嘉



「你、你做咩呀！」梁玥嘉喺手指嘅縫中見到宋千辰正走向佢，慌張地問道

宋千辰行到床邊，彎下腰，視平線同梁玥嘉喺同一水平線上；梁玥嘉嘅呼吸因為緊張而開始急速起嚟，一隻手死死地掩着眼，另一隻捉緊被子，心臟跳得又重又快，每一下跳動都好似要從身體內衝出嚟一樣

「佢哄咁埋做咩呀到底要⋯！」梁玥嘉嘅內心緊張都不得了，佢唔敢放低手因為唔知宋千辰想點，「我嘅心跳聲大聲到我自己都聽到啦⋯！」

「你坐住咗我件衫⋯」宋千辰緩緩開口講道，手捉住咗居家服，「你坐住咗一半想點？」

梁玥嘉將手拎開，循住宋千辰嘅手嘅方向望去，見到比自己坐住咗半邊嘅衫，於是便挪移開比宋千辰拎番件衫



「梁玥嘉你亂諗啲咩呀！」梁玥嘉喺心中問自己，臉頰都紅紅的

「嘉嘉，我要換褲⋯」宋千辰望住仍然坐喺床上嘅梁玥嘉無奈地講道

「嗯。」梁玥嘉都冇聽清楚宋千辰講咩就回答

「嘉嘉，我話我要換褲⋯」宋千辰無奈地再重複多一次，「你想睇我換褲呀？」

「吓！？」梁玥嘉呢一下先清醒過嚟，然後瞬間企起身行出房門口，幫宋千辰閂上房門，企喺門口等同時心中道：「我點解會答佢嗯㗎！」

梁玥嘉嘅雙手捉住房門嘅門柄，微微耷低頭，剛才發生嘅事真係令佢尷尬得很，臉頰紅彤彤的、正在發滾中，頭頂就好似煲緊水嘅水煲一樣出煙，但唔係因為嬲而係害羞到出煙

「換完啦。」宋千辰喺再次打開房門嘅同時講道

梁玥嘉仲發緊呆，宋千辰開門嘅時候佢都未回神，便因為門忽然打開而失重心般向前跌咗兩步，手喺門打開嘅時候鬆開咗，梁玥嘉直接就撞入宋千辰嘅懷裏



宋千辰見梁玥嘉失重心撞上佢嘅胸膛，下意識就伸手輕輕地將梁玥嘉攬住，兩人視線對上

梁玥嘉微微抬起頭望住宋千辰、心臟「咚咚、咚咚」地跳動着，心跳嘅節拍強而有力

宋千辰微微耷低頭望住梁玥嘉，梁玥嘉臉上嘅紅霞仍未散去，一副羞澀嘅模樣⋯梁玥嘉一撞唔止撞入佢嘅懷裏，什至直撞入佢嘅心裏

「放手啦⋯想攬到幾時⋯」梁玥嘉細細聲地講道，宋千辰鬆開咗雙手

梁玥嘉輕輕推開宋千辰，從佢嘅身旁走過直接行入房，坐番喺床上面

宋千辰拉開電腦椅坐低，眼尾嘅餘光見到梁玥嘉默默低頭望住手機一言不發，宋千辰微微一笑，然後打開MacBook

「啱啱算咩⋯哄得太埋啦掛⋯」梁玥嘉抱住雙膝，喺心中喃喃自語道



梁玥嘉伸手將放喺床頭嘅枕頭拉到自己旁邊，將枕頭拉起攬住

「千辰佢⋯好專心⋯」梁玥嘉稍微抬起頭望住宋千辰嘅側面，心中默想道

望住宋千辰專心嘅模樣，心臟自覺地加快咗跳動嘅速度⋯戀愛真係一件好神奇嘅事，總會帶一個意想不到嘅人比你，或者呢個人一早就喺身邊，只係你唔會察覺你嘅心意係會留比呢個人⋯當你察覺到時，可能你都會覺得訝異，然後反問自己：「點解我會中意佢？之前都唔察覺自己會中意佢⋯」

宋千辰感覺到梁玥嘉嘅視線，便回頭望向梁玥嘉，梁玥嘉愣了一下，然後默默地耷低頭

要講出「我中意你」呢四個字其實好難，難就難在要對住令自己心動嘅人講出呢四個字、要面對對方聽到後嘅反應、要有「或者會失去一段友誼」嘅勇氣⋯普通人都會怕失去，更何況係相識十幾年嘅佢地

「呯！」「呀嘶⋯」

一聲巨響令宋千辰猛然回頭，一回頭只見梁玥嘉鴨子坐着喺床上，一手攬住佢嘅枕頭，一手摸住頭頂，一臉想喊嘅表情






IG Link: https://www.instagram.com/nd_cotttocandy/?hl=zh-tw