［愛情純愛］由嗰一個Kiss開始，我地唔再係青梅竹馬: 72. 童年陰影

屋內漆黑一片，電視、燈全都熄晒，宋千辰拎住手機開著手機電筒行出燈

「應該係跳咗制啫。」宋媽媽企起身同時，楊亦晟行到去門前，通過貓眼望出去

「出面走廊都黑晒。」楊亦晟講道

「嘉嘉咁怕黑，佢自己一個有冇問題㗎？」宋媽媽擔心地講道

宋媽媽一句話，令宋千辰記起梁玥嘉得自己一個喺屋企



「我去睇下。」宋千辰頓時拎埋鎖匙行到去門前，楊亦晟讓開咗，宋千辰動作迅速地打開門，以電筒照亮走廊，行去B室

梁玥嘉正喺屋內拎住開咗電筒嘅手機，但電筒嘅光無法令佢不安嘅心平穩落嚟，心中害怕又無助；望住漆黑一片嘅屋內，梁玥嘉淨係覺得好驚，可能對其他人嚟講，黑真係唔可怕，但對某啲怕黑嘅人嚟講，漆黑一片嘅環境係佢地內心嘅恐懼

梁玥嘉雙腳一軟，跌坐喺地上，腦袋中空白一片，佢都唔知可以點做，完全唔知道自己可以點樣，無助嘅佢鼻子一酸，不禁喊起嚟

喺梁玥嘉心中感覺到同當時一樣嘅害怕與無助⋯喺讀緊小學嘅時候，有一次放學之後，功課輔導班嘅同學貪挽話同大家挽遊戲，話包剪揼輸咗嘅人要入去閂咗燈嘅廁所十秒⋯

「梁玥嘉你輸咗！你要入去！」其中一個男同學講道



梁玥嘉覺得只係挽個遊戲，便冇太在意，然後轉身行咗入廁所，其他人喺外面將廁所燈閂上

因為當時正值冬天，冬天日短夜長，去到5點半左右時天都已經黑咗一半，所以閂上燈後嘅廁所黑漆漆一片的，只有少許光從門縫滲入廁所中，外面樹葉樹枝因風聲而磨擦嘅聲音更令人生畏

「10⋯9⋯8⋯7⋯6⋯」正當梁玥嘉獨自一人喺閂上燈嘅廁所入面倒數嘅時候，外面班男同學拎咗一支長棍將門堵上，卡住門柄，「5⋯4⋯3⋯2⋯1⋯」

當梁玥嘉數完十秒之後，便打算開門，卻發現門點拉都拉唔開

「開門呀！」梁玥嘉嗌道，但外面嘅同學已經跑番晒去課室，梁玥嘉點嗌都冇人開門比佢，最後便喺廁所喊起嚟



呢個「遊戲」嘅最後，係輔導班嘅老師見梁玥嘉好耐都未番嚟去搵佢，打開門時便見到喊到雙眼紅腫嘅梁玥嘉⋯

當時嘅風聲、枝葉磨擦嘅聲音喺梁玥嘉嘅腦海中響起，梁玥嘉頓時微微顫抖起嚟，臉頰都因為用雙手抹去嘅淚水而變得濕濕的，正當梁玥嘉唔知點算嘅同時，手機響起

「嘉嘉，你Okay嗎？我喺門口。」電話裏頭傳嚟宋千辰嘅聲音，梁玥嘉頓時用手支撐着身子企起身，每踏一步都可以感覺到雙腳什至整個人都顫抖着

梁玥嘉行到去門前將屋企嘅大門打開，見到嘅係宋千辰拎住手機電筒企喺門前，宋千辰正想開口嘅時候，梁玥嘉已經直接伸手攬住宋千辰，宋千辰對梁玥嘉嘅舉動並不愕然

「我喺度，唔洗驚⋯」宋千辰輕輕地攬住顫抖着嘅梁玥嘉柔聲講道

梁玥嘉點都唔鬆手，宋千辰行到入屋之算，反手將門閂上，兩人企喺門後，宋千辰伸手摸一摸梁玥嘉嘅頭安慰佢

「今晚停電，你一個人Okay嗎？」宋千辰問梁玥嘉道

正當梁玥嘉打算回答嘅時候，宋千辰嘅手機響起嚟，宋千辰放喺耳邊三秒都冇，便將手機遞比梁玥嘉，梁玥嘉帶着哭腔嗯咗一聲之後，便將已經掛斷嘅電話遞番比宋千辰



「阿姨叫我過去瞓⋯」梁玥嘉細聲講道

「嗯⋯」宋千辰無奈地點一點頭，「你拎你要拎嘅嘢過嚟啦⋯」

「嗯，陪我拎⋯」梁玥嘉微微點一點頭，然後捉起宋千辰嘅手腕，拉住宋千辰向睡房行去

梁玥嘉拎咗牙刷、鎖匙同用作手機充電嘅尿袋之後就跟咗宋千辰番過去

「千辰呀，我擺咗張墊褥喺你房，你今晚瞓就自已鋪啦，另一張被喺你衣櫃頂層，你凍就拎嗰張落嚟啦。」宋媽媽講道，然後拎走梁玥嘉手上嘅牙刷，「嘉嘉，阿姨幫你將牙刷放去洗手間，你今晚安心喺度瞓啦～」

「嗯⋯」梁玥嘉乖巧地點點頭

「你瞓床啦，我瞓地下得啦⋯」宋千辰閂上房門，拉過電腦椅，企喺上面打開衣櫃拎出放喺最頂層嘅棉被



「嗯⋯」梁玥嘉點點頭，然後坐到床上

宋千辰將包住棉被嘅膠袋拆咗出嚟，膠袋放番喺衣櫃入面，而張被則放咗喺床尾

房間裏漆黑一片，電腦因為冇咗WiFi而上唔到網，宋千辰將墊褥灘開打橫放喺書枱前，床同墊褥形成一個T字，佢將張被拎落嚟打開，灘喺墊褥上蓋住被睇手機

「我想去刷牙⋯」梁玥嘉落咗床，蹲喺墊褥旁邊望住宋千辰

「吓？」宋千辰翻身望向梁玥嘉，「哦，去囉。」




IG Link: https://www.instagram.com/nd_cotttocandy/?hl=zh-tw