［愛情純愛］由嗰一個Kiss開始，我地唔再係青梅竹馬: 69. 沉重的話題

拎住喺手上嘅手機，忽然變成咗來電顯示嘅版面，宋千辰無奈地笑了一笑，然後按下接聽

「打過嚟做咩？」宋千辰一開口便問道，「仲唔瞓仲打過嚟？」

「唔想打字，而且，你都未瞓㗎啦把聲聽起嚟咁精神。」梁玥嘉笑嘻嘻地講道

「咁我好好人咁陪你傾一陣啦～」宋千辰講道，本來已經有少少攰嘅佢一聽到梁玥嘉把聲，莫名其妙地又稍為精神咗啲

其實梁玥嘉唔係因為唔想打字而打電話比宋千辰，只不過係想係瞓之前聽下宋千辰把聲，所以先揀打電話



如果要問梁玥嘉中意宋千辰啲咩，或者嚟到呢一刻，梁玥嘉自己都答唔出⋯

一直以嚟，其實宋千辰冇特別縱容、特別寵着梁玥嘉，只係好似一種習慣嘅存在⋯以前嘅寵係因為梁玥嘉係佢嘅青梅竹馬、一個重要嘅人；宜家嘅寵係除咗呢兩個簡單嘅原因外，佢中意梁玥嘉、想佢開心而寵佢

要由青梅竹馬升格為戀人最大嘅難處，大概係在於對關係嘅習慣、對對方嘅習慣同如何看待對方，轉捩點在於「喺某一日開始將對方作為異性看待」⋯

「千辰⋯」梁玥嘉嘅聲線忽然間沉咗落去，聽起嚟好似冇咗開心嘅感覺一樣

「嗯？」宋千辰冇特別覺得點，只係默默地嗯咗一聲表達佢聽緊



「如果有一日你有中意嘅人，你記得話我知。」梁玥嘉忽然認真地對宋千辰講道，喺電話另一邊嘅宋千辰聽到後都窒咗一窒

「吓⋯？做咩突然咁樣講？」宋千辰心裏感到疑惑，梁玥嘉突然間咁樣講好似將要發生啲咩事一樣

「冇，只係⋯作為朋友嘅提醒。」梁玥嘉拎住電話苦笑道，順便問道一樣再次開口，「咁你宜家⋯有冇中意嘅人？」

「吓⋯？」宋千辰更感錯愕，「做咩突然咁問？」

「覺得有啲好奇呀～」梁玥嘉故作輕鬆地講道，但呢個提問卻好似一塊石頭狠狠地壓住佢嘅心一樣，「好似都冇聽過你話過有中意嘅人，咁多年都。」



「冇中意嘅人都唔係一件好出奇嘅事啫～」宋千辰笑了笑講道，但冇人知道就喺剛才梁玥嘉問佢宜家有冇中意嘅人時，佢嘅心因為緊張而緊縮咗一下，「或者係因為冇咩人可以真係吸引到我中意佢，咁咪冇中意嘅人囉～再講，中意呢樣嘢都要睇緣份嘅～」

「緣份呀⋯」梁玥嘉若有所思地重複道，然後又道，「如果有一日我地都各自有自己中意嘅人，我地仲有冇可能可以好似宜家咁⋯？」

「唔⋯」一講到呢個問題，氣氛忽然間就變得好沉重，宋千辰都唔知道可以點答，因為佢都冇諗過呢一樣嘢

「不過到時先算啦！」梁玥嘉忽然間又笑了笑講道，「我諗暫時嚟講，應該都係得人地中意你。」

「人地中意我？」宋千辰忽然之間覺得臉紅耳赤，「你嘅意思係，你中意我？」

「邊隻字有提到話我中意你呀？」梁玥嘉又害羞又不知所措，兩個人各自害羞起嚟，「我嘅意思係，得其他人中意你呀！唔係話緊得我中意你呀！」

「所以你嘅意思係，除咗其他人中意我之外，你都中意我？」宋千辰帶着泛紅嘅臉頰，假裝平日開玩笑一樣輕鬆問道

「唔、唔係呀！」梁玥嘉簡直覺得係自己設咗個圈套忽自己踩落去一樣，感覺臉頰都發滾起嚟，「你諗多咗啦宋千辰！」



梁玥嘉輕輕拍着自己嘅額，反問着自己到底做緊啲咩，啱啱嚇到心臟都要跳出嚟！但係佢自己挖咗個窿比自己入去一樣，佢又唔可以嬲同時又覺得自己好蠢，仲要搞到自己害羞死

傾咗半個鐘之後，梁玥嘉話自己有啲攰而收線，但其實梁玥嘉並唔係瞓，而係灘喺床上面輾轉反側；而宋千辰喺收咗線之後都冇辦法瞓得着，腦海中全是梁玥嘉講嘅嘢，明明梁玥嘉已經否認咗，但宋千辰都係忍不住笑意，根本就瞓唔著

⋯

「路上小心呀！到咗日本之後記得同我講呀！」梁玥嘉望住拎住行李喼企喺門口嘅爸媽講道，「挽得開心啲啦！」

「嗯，知啦！你都要好好照顧自己呀！」梁媽媽講道，「我同爸爸過幾日就番㗎啦！」

「知啦知啦！快啲行啦！」梁玥嘉點點頭，比咗個Okay手勢，然後拎埋鎖匙閂上屋企嘅大門，同佢嘅爸媽一齊行去等升降機

「我同咗筠筠講㗎啦，你夜晚過去食飯啦～」梁媽媽口中講嘅筠筠就係宋千辰嘅媽媽



升降機停低，「叮」一聲打開門，梁玥嘉同企喺升降機入面行出嚟嘅人對視咗兩秒

「阿姨、叔叔。」宋千辰見到梁玥嘉嘅爸媽時乖乖地打招呼

「千辰呀，幫我地睇住嘉嘉！」梁媽媽拍一拍宋千辰嘅博頭講嘅同時，梁爸爸推住兩個行李喼入升降機等梁媽媽，「我地走啦！」

梁媽媽入咗升降機，梁玥嘉同宋千辰向佢地揮揮手講拜拜，升降機嘅門閂上，喺等待升降機嘅位置只剩下佢地兩人




IG Link: https://www.instagram.com/nd_cotttocandy/?hl=zh-tw