［愛情純愛］由嗰一個Kiss開始，我地唔再係青梅竹馬: 68. 可靠

「好啦，食完蛋糕啦！」宋千辰喺紙巾盒中抽咗張紙巾抹手，企起身行到垃圾桶旁邊，將抹手嘅紙巾掉入垃圾桶，「我番去啦。」

「嗯，好啦～」雖然心中都係有啲唔捨得，但都係點一點頭

宋千辰離開梁玥嘉嘅屋企，番到去隔離A室，梁玥嘉行番入房，望到仍然放喺床上打開咗嘅蛋糕盒

「除咗我爸媽，應該就只有千辰會咁縱容我⋯」梁玥嘉行到床邊拎起蛋糕盒，然後閂上，拎住蛋糕盒喺心中講道，臉上掛上甜甜嘅微笑容

梁玥嘉聽到客廳傳嚟爸媽討論嘅聲音，便開門行出房



「執好行李啦？」梁玥嘉企喺走廊嘅門框前，望住放喺地上嘅行李喼

「差唔多啦～」梁媽媽坐喺行李喼旁邊將衣服摺好然後放入收納袋，然後抬頭望一望走廊，朝喺房拎住衣物嘅梁爸爸講道，「你嗰個執好未呀？」

「執好啦。」梁爸爸閂上自己嘅黑色行李喼，將行李喼放好喺玄關

「記得買手信番嚟比我呀！」梁玥嘉笑笑口講道

「我地一定會買比你嘅～」梁爸爸行到梳化坐低



梁玥嘉嘅父母後日就去旅行享受久違嘅二人世界，佢地夫婦二人都好耐冇去只有佢地兩人嘅旅行，今次梁玥嘉就要喺屋企睇門口啦

雖然今次嘅旅行冇梁玥嘉份，但係佢嘅爸媽講好咗會買手信番嚟比佢，所以梁玥嘉都已經覺得好滿足

去到夜晚2點時，梁玥嘉蓋上iPad，拎起手機灘到床上

一嚟到長假期，早瞓成為咗一件好難嘅事，每一晚冇3點都唔會瞓，今晚亦如是⋯

雖然IG、Facebook都已經睇到冇嘢可以再睇，但唔知點解仍然唔捨得一灘落床就瞓，偏偏要拎住手機再多睇兩眼



「唉⋯都已經睇過晒⋯」梁玥嘉喺心中默念道，但手仍然拎住手機，繼續滑動着IG嘅頁面

曲起嚟嘅腳忽然踢到軟綿綿嘅嘢，梁玥嘉伸手入被中，一下子將藏喺被中嘅柴犬攬枕抽咗出嚟

「唔知千辰瞓咗未呢⋯」梁玥嘉望住柴犬攬枕，諗起宋千辰

另一邊廂，宋千辰早就灘咗喺床上睇手機，宋千辰打開IG，將頁面向左撥，搵到喺最頂嘅梁玥嘉，梁玥嘉嘅狀態係在線上

「瞓咗未？」宋千辰send咗一個message過去比梁玥嘉

本來同樣地睇緊IG嘅梁玥嘉收到宋千辰嘅message，不禁喜滋滋地露出笑容，然後直接㩒落彈出嚟嘅notice，頁面直接轉至同宋千辰嘅對話中

「未呀～啱啱灘咗落床一陣」梁玥嘉換咗個姿勢瞓，由側身灘轉為趴喺床上面

「都估到你㗎啦⋯煲完劇啦一定係」宋千辰望住自動調光中嘅螢幕微笑道，笑意都止唔住



「係」梁玥嘉好快地回覆咗一個字，然後又打道，「我爸媽後日就去旅行啦，今次睇我一個喺屋企看門口」

「我知呀，阿姨同咗我媽講」宋千辰回覆道，「我媽話你可以過嚟食飯」

「痴餐痴餐！」梁玥嘉笑了笑

正當梁玥嘉打緊下一個message內容嘅時候，宋千辰send咗一個新message過嚟：「有咩事搵我」

「好呀～」梁玥嘉刪去自己本來打咗嘅嘢，改為回覆宋千辰新send過嚟嘅message

「九秒九過嚟！」宋千辰望住螢幕笑了笑

「我會計住你係唔係真係九秒九過到嚟」梁玥嘉打趣地回覆道



望住宋千辰send過嚟嘅message，梁玥嘉嘅心中感覺份外安心，喺梁玥嘉嘅心中，宋千辰係一個可以比佢依靠嘅人，感覺上只要宋千辰喺佢身邊，就算天要塌落嚟都好，都會有宋千辰為佢撐住

「你真係一個好可靠嘅人」梁玥嘉忽然認真地打道，「令人覺得好安心」

宋千辰望住梁玥嘉新send過嚟嘅message，心裏平靜嘅海面忽然掀起海浪，宋千辰一下子坐咗起身，梁玥嘉突如其來嘅說話令宋千辰嘅嘴角上揚

「係咩」宋千辰故作鎮定地回覆，但比起要假裝冷靜獨自喺心中興奮，宋千辰更想知道梁玥嘉心中對佢嘅想法，「你係咁諗？」

「係呀，唔通呢？但呢個都係事實呀」梁玥嘉見到宋千辰嘅提問，心中莫名其妙地有少許緊張起嚟，直接就坐咗起身，「我覺得你一直都好可靠呀～值得依賴嘅人嚟」

梁玥嘉如此直白嘅回覆，令宋千辰開心到要飛上天似的，甜意都喺臉上嘅笑容中滲出嚟

「還好啦」宋千辰謙虛地回覆道，「可靠唔好咩？當你有咩事嘅時候可以有人比你依靠」

「有人比我依靠係你嘅目的？」梁玥嘉疑惑地問道，雖然心感疑惑，但臉上掛着嘅笑容卻係好似蜜糖一樣甜



明明只係望住喺螢光幕裏嘅字，但心⋯卻好似聽住對方親口講一樣，心，難以平靜⋯




IG Link: https://www.instagram.com/nd_cotttocandy/?hl=zh-tw