［愛情純愛］由嗰一個Kiss開始，我地唔再係青梅竹馬: 67. 你是我的⋯

「吓？」梁玥嘉帶着紅紅嘅雙眼怔了一怔，對於宋千辰忽然間問起嘅問題感到有啲愕然，「唔⋯」

一時三刻間，梁玥嘉又諗唔出要點樣形容先好，又唔想講出「我地係青梅竹馬囉～」之類嘅說話，但除咗呢一句，又唔知道可以答咩好

「你當我係咩？」宋千辰直勾勾地望住梁玥嘉，喺清晰嘅雙眸之中梁玥嘉見到自己喺佢眼中嘅模樣

「一個⋯同我一齊大、好重要嘅人囉⋯」梁玥嘉將自己嘅想法隱藏起嚟，就好似冇帶着多餘嘅想法一樣講出呢句說話，「放心啦，你係重要嘅人。」

宋千辰望住梁玥嘉，心中有一種講唔出口嘅感覺，聽到梁玥嘉話比自己知自己係對佢嚟講重要嘅人⋯唔係一件值得高興嘅事咩？但宋千辰嘅心底卻冇特別覺得好開心，相反地有啲平淡⋯





「我講真㗎⋯」梁玥嘉見宋千辰一直望住自己，下意識迴避宋千辰嘅視線，微微耷低頭望住手上拎住嘅紙巾，「唔信我呀⋯？」

「唔係。」宋千辰搖搖頭，然後拎起放喺書枱上面嘅蛋糕盒，「特登買嚟比你陪罪。原諒我嗎？」

「嗯⋯」梁玥嘉嘅雙眼注視着蛋糕盒，稍微抬眼望宋千辰，然後點一點頭，「睇在蛋糕嘅份上就原諒你啦⋯」

梁玥嘉捉住宋千辰嘅衫袖，拉一拉宋千辰嘅手，宋千辰緩緩提手放到梁玥嘉嘅後腦勺摸咗兩下

「下次唔準鬧我⋯」梁玥嘉可憐巴巴地扁着嘴講道，「識咗咁多年你都冇試過咁樣鬧我㗎⋯」





「呃⋯」宋千辰苦笑咗一下，差啲就將只係因為緊張梁玥嘉之類嘅說話講咗出口，「以後都唔會鬧你啦⋯邊個叫你同佢一齊挽得咁開心⋯」

「所以你呷醋？」梁玥嘉微微側着頭，揚起嘴角微微一笑，「千辰你呷醋啦？」

「唔係⋯」宋千辰將蛋糕盒放番喺枱面，實際上係因心虛而想迴避梁玥嘉嘅視線

「千辰？」梁玥嘉撥開被子跪坐喺床上，身子向前傾，擺出期待嘅樣子，「千～辰？」

「冇呀⋯！」宋千辰嘅臉頰泛起淡淡嘅紅霞，迴避着梁玥嘉嘅視線，只敢用眼尾嘅餘光留意着梁玥嘉嘅一舉一動，無奈地瞄咗梁玥嘉一眼，「你諗多咗啦⋯你都講到出口話我重要，我又點會呷醋？」





宋千辰嘅說話令梁玥嘉忽然間覺得有啲唔自在，梁玥嘉微微耷低頭，想搵其他事令自己分心

「呃、我想食⋯！」梁玥嘉盤着腿坐喺床上，指住放喺枱面嘅蛋糕盒，「一齊食？」

「嗱。」宋千辰拎起蛋糕盒，拎到梁玥嘉嘅面前

梁玥嘉嘅臉上掛上天真嘅笑臉，好似小朋友見到自己感興趣嘅嘢一樣，為食嘅佢急不及待地打開蛋糕盒，有4件半熟芝士蛋糕喺入面

「嘻嘻⋯」梁玥嘉伸手入盒中，小心翼翼地拎出一件蛋糕，喺蛋糕嘅其中一邊咬咗一口，幸福感喺蛋糕裏滲出，「今次就原諒你啦！」

「慢慢食。」宋千辰見到梁玥嘉嘅笑容，嘴角都微微上揚，伸手摸一摸梁玥嘉嘅頭，「冇人同人爭，都係買比你食。」

梁玥嘉嘅眼裏帶點愕然，抬眼望向宋千辰，只見宋千辰正微笑着，梁玥嘉微微耷低頭迴避，一抹紅霞淡淡地印喺梁玥嘉嘅臉頰上

「我番去先啦，你慢慢食啦。」宋千辰企起身，輕輕地敲咗梁玥嘉嘅額頭一下





「咦？你走啦？」梁玥嘉下意識衝口而出問道

「係呀，番去啦～」宋千辰微笑道，摸一摸梁玥嘉嘅頭，「你都開心番啦唔係咩？」

「嗯⋯」梁玥嘉點點頭，但心裏卻覺得有啲失落：「千辰番去啦⋯？」

「做咩咁嘅樣？」企喺門前嘅宋千辰留意到梁玥嘉臉上嘅表情變化，本來已經捉住門柄嘅手鬆開咗，再一次行到床邊，半開玩笑地講道，「唔捨得我番去？定係你會掛住我呀？」

「嘻⋯冇呀。」梁玥嘉擠出笑容、搖搖頭

「我地住得咁近，想見一面唔難嘅～」宋千辰一隻手插喺hoodies嘅衫袋中，另一隻手拍拍梁玥嘉嘅頭，「再唔係你WhatsApp我、DM我都得。」

「嗯⋯！」梁玥嘉點點頭，望一望手上嘅蛋糕，「不如你食一個先番去！」





「吓⋯？」宋千辰愕一愕然，然後不禁笑了笑，喺心裏道：「睇嚟嘉嘉好唔想我咁快番去。」

宋千辰拉開喺書枱前嘅電腦椅坐低，喺蛋糕盒中拎咗一件蛋糕出嚟，望向梁玥嘉沒好氣地咬咗一口蛋糕

「嘻⋯」梁玥嘉高興地笑起嚟，心諗道：「太好啦～千辰陪我食蛋糕！」

宋千辰望住梁玥嘉，臉上掛住無奈嘅微笑

「如果可以留住呢一刻就好⋯」宋千辰喺心中默默地講道，「嘉嘉開心就得。」

已經唔知由幾時開始，喺宋千辰嘅心中，梁玥嘉嘅笑容變得愈嚟愈重要；宋千辰只希望梁玥嘉開心，但佢想梁玥嘉得到嘅快樂係由自己比佢

愈中意一個人就會變得愈小氣，宋千辰唔討厭李子迪呢個人，佢所討厭嘅，係同梁玥嘉好熟好friend嘅李子迪

梁玥嘉一句話就如同定海神針一樣，令宋千辰不安嘅心定落嚟⋯呢樣嘢應該只有梁玥嘉先做到








IG Link: https://www.instagram.com/nd_cotttocandy/?hl=zh-tw