［愛情純愛］由嗰一個Kiss開始，我地唔再係青梅竹馬: 66. 投降和解

「我識咗你17年，比唔上一個你上到中學先識嘅人？」宋千辰質問梁玥嘉一樣，平日對梁玥嘉嘅溫和完全消失得無影無蹤，「既然係咁，你去搵佢囉！」

「我都話我唔係咁嘅意思咯！」梁玥嘉雖然仍然好嬲，但係比起嬲，佢知道解釋更加重要，但宜家嘅梁玥嘉，腦海中一片混亂，根本就唔知要點解釋先啱，「我嘅意思唔係佢重要過你呀！你咩事啫！你做咩要因為李子迪而鬧我啫！做咩你偏要覺得李子迪重要過你啫！點解你會覺得我中意李子迪啫！我係中意佢嘅話我一早就中意咗佢啦！你做咩要同佢比啫！你好討厭呀宋千辰！」

梁玥嘉帶着哭腔講道，一口氣講完之後就直接向番屋企嘅方向跑去，宋千辰一個人企喺原地

「我其實唔應該咁講係咪⋯」宋千辰喺心中懊悔地問自己

梁玥嘉番到屋企嘅時候，梁媽媽今日剛好放假喺屋企，梁媽媽見到梁玥嘉一聲不吭地行咗入房閂上房門





「死人宋千辰！」換好居家服嘅梁玥嘉坐喺床上用力地打宋千辰送比佢嘅柴犬攬枕，「死人宋千辰唔信我！我明明就係中意你！你偏偏就話我中意李子迪！話你知我唔中意李子迪又、唔、信！」

「叩叩。」梁媽媽行到梁玥嘉嘅房門前敲門，「嘉嘉你冇事呀嘛？」

「冇。」梁玥嘉沉着氣講道

待聽到梁媽媽行遠嘅聲音之後，梁玥嘉又開始一邊喃喃自語一邊打無辜嘅柴犬攬枕

「死人宋千辰！死人宋千辰！」梁玥嘉一拳一拳咁打落柴犬攬枕度，「唔信我！做咩唔信我！」





都唔知打咗幾耐，梁玥嘉嘅手慢慢地停咗落嚟，鼻子一酸，眼淚滑過臉頰

「做咩唔信我喎⋯我中意嘅明明係你⋯」梁玥嘉對住柴犬攬枕帶着哭腔講道，「做咩要話我中意李子迪⋯！明明就係你叫我去李子迪度⋯然後又話楠恩好似易教啲⋯！咩都你講晒啦！」

「叮噹～」門鈴忽然間響起，梁媽媽行到去門前開門

「千辰？」梁媽媽一臉疑惑咁望住企喺門口嘅男仔

「阿姨你好⋯嘉嘉係咪番咗嚟⋯？」宋千辰禮貌地問道





「係呀，但佢有啲唔妥，我問佢，佢又話冇事⋯」梁媽媽一臉擔心地同宋千辰講道，宋千辰心裏滿滿嘅唔好意思，因為令梁玥嘉唔妥嘅人係佢，「你嚟搵嘉嘉就啱啦，幫我睇下佢咩事好唔好呀？」

「嗯，好呀⋯」宋千辰點一點頭

「點嘉嘉交比你啦⋯佢喺房。」梁媽媽拍一拍宋千辰嘅博頭，好似交托一個重要任務比佢一樣

宋千辰閂上大門，喺門口將波鞋除落嚟，然行到去梁玥嘉嘅房門前

「叩叩。」宋千辰喺房門上敲咗兩下，「嘉嘉，係我，我入嚟㗎啦⋯」

宋千辰講完之後等咗一陣，房入面嘅人冇應佢，宋千辰唯有直接開門入去

一打開房門，房間因為冇開燈而有啲暗，宋千辰見到梁玥嘉面向床頭坐喺床上，用被包住自己，喺枕頭邊仲有一大堆捏成一團嘅紙巾，宋千辰輕輕閂上房門

「嘉嘉，我買咗你中意食嘅蛋糕嚟同你道歉呀～」宋千辰輕喚梁玥嘉嘅名字，將手上本來拎住嘅蛋糕盒放喺梁玥嘉嘅書枱上後行到床邊，將被子掀開





雖然房冇開燈，又閂咗窗簾，但仍然可以見到梁玥嘉嘅雙眼同鼻尖都紅紅的，手上拎住一張皺皺嘅紙巾，仍然抽着鼻子、抽抽噎噎地啜泣着

「嘉嘉⋯」宋千辰蹲喺床邊一臉抱歉地望住梁玥嘉，「唔好嬲我啦，對唔住呀，我唔應該鬧你⋯」

梁玥嘉都唔望宋千辰一眼，宋千辰心知自己今日講得太過火，所以點都好佢都要氹番梁玥嘉

「哎呀唔好嬲啦～我買咗你中意食嘅蛋糕比你食呀～你唔係中意食呢個工房嘅半熟芝士蛋糕咩？我買咗比你食呀，唔好嬲啦～」宋千辰起身坐到床邊右腳曲着放喺床上，左腳踩住地上，努力地氹着梁玥嘉，「嘉嘉，唔好嬲啦～」

梁玥嘉嘅內心已經冇嬲，但仍然因為宋千辰話佢中意李子迪而覺得好委屈，梁玥嘉一下子轉身過去面向住宋千辰

「你唔知你重要過佢好多好多㗎啦⋯！」梁玥嘉一邊用哭腔講，一邊用拳頭一下又一下咁打喺宋千辰嘅大腿上，「你同佢邊個重要你唔知㗎咩⋯！你點可以話我中意李子迪⋯！你點可以話我中意佢⋯！明明就係你推我過去！仲要話楠恩易教！你點可以覺得自己唔重要⋯！你明明就重要過佢好多好多⋯！你點可以咁樣諗我同誤會我⋯！」

望住眼前嘅淚人兒，宋千辰有啲心痛，點解啱啱唔信佢講嘅嘢？





「千辰你唔信我⋯！你同其他男仔都冇得比！你明唔明呀？」梁玥嘉用紙巾抹眼淚，宋千辰聽到梁玥嘉親口講佢同其他男仔冇得比時，本來不安嘅內心瞬間放心起嚟，「枉你同我識咗咁多年⋯！」

「嗯⋯」宋千辰將梁玥嘉準備打落佢大腿而懸喺半空嘅手捉住，將梁玥嘉嘅手放低喺床上，伸手摸一摸梁玥嘉嘅頭，「我錯啦，唔好嬲我啦⋯」

「我真係當佢係好兄弟⋯」梁玥嘉解釋，佢怕宋千辰唔明白

「你當李子迪係好兄弟，咁你當我係咩？」宋千辰故意想捉弄梁玥嘉一樣問道




IG Link: https://www.instagram.com/nd_cotttocandy/?hl=zh-tw